Иоов 26 - Библи

Иоовой түгэсхэлэй үгэ

¹ Иоов харюу үгэбэ:

² – Шадалаа һалаһан намда ямар ехээр туһалба гээшэбта.

³ Ухаагаа муудаһан намда үнэтэ зүбшэл үгэбэт. Ямар хэрэгтэй бэлиг ухаа үгэбэ гээшэбта?

⁴ Энэ үгэ хэлэхэһээ урид таанар хэнһээ заабари абаба гээшэбтэ? Хэнэй һүнэһэн шамаар дамжуулжа яриба гээшэб?

⁵ Бурханай үмэнэ газарай гүн доро хүлгүй оёор, бунханда ороһон хүнэй һүнэһэн айһандаа шэшэрэлдэжэ байдаг.

⁶ Үхэлэй орон Тэрэнэй хараса доро ямаршье хаалтагүй, Үхэл Тэрэнэй урда һалганана.

⁷ Эзэн хүлгүй оёор дээгүүр Хойто зүгые тогтоогоод, хооһон зайда газар дэлхэйе үлгэжэрхёо.

⁸ Тэрэнэй хүсөөр уһа шиигтэй үдхэн үүлэн агаар мандалда тогтон байдаг. Хүндэ уһанай үүлэн мананай сасаран тарахагүйнь гайхалтай.

⁹ Түхэреэн һарын нюур үүлээр бүтүүлжэ шадана.

¹⁰ Гэрэл болон харанхын хилые далайн нюруу дээрэ тогтоогоо.

¹¹ Тэрэнэй уурлахада, тэнгэриин бахананууд айн шэшэрнэ.

¹² Тэрэ хүсэ шадалаараа далайе номгоруулдаг, Рааһаб шүдхэрые диилэн дарадаг.

¹³ Тэрэнэй амисхалаар һалхин номгоржо, тэнгэри сэлмэдэг. Өөрын мутараар шуурга үүсхэдэг могойе таһа татаба.

¹⁴ Энэ хадаа Тэрэнэй хүсэ шадалай багахан хэсэг болоно. Бидэ Тэрээн тухай шэбэнээл дууланабди. Асар хүсэтэ абяанай шэнжые хэншье хүсэд ойлгожо шадахагүй.