Һургаал 18 - Библи

Үгэ хүсэтэй

¹ Үсэд хүн өөрынгөө дуратай юумэ хэдэг. Ухаатай заабари шагнахадаа, сухалдадаг.

² Тэнэг хүн мэдэлгэ ухаанһаа сэдьхэлээ ханадаггүй. Ухаатайб гэжэ өөрыгөө харуулхань тэрээндэ үлүү шухала.

³ Муу хүнэй ерэхэдэ зэбүүрхэл баһал бии болодог. Нэрээ хухалалгатай хамта эшэгүүри ерэнэ.

⁴ Хүнэй аманһаа гараһан үгэ гүнзэгыһөө гараһан уһантай адли. Сэсэн ухаанай ундан шолшогоноһон уһа горхон мэтэ.

⁵ Нүгэлтэнэй тала бариха гээшэ хэрэг шүүлгэ дээрэ гэмгүй хүниие хардаһантай адли муухай хэрэг.

⁶ Тэнэгэй аман һүйд асарна. Тэрэнэй үгэнүүд һандарал үүсхэдэг.

⁷ Тэнэгэй аманиинь өөрыень һүйдхэдэг. Тэрэнэй үгэнүүд өөртэнь занга болодог.

⁸ Хоб тараагшын үгэнүүд хото руу ороһон амтатай эдеэн мэтэ.

⁹ Ажалдаа оролдодоггүй хүн зөөриеэ үрин һалгаагшада адли.

¹⁰ Эзэнэй нэрэ бата бэхи хэрэм. Үнэн шударга хүн тиишээ тэрьелээд, абаралта олоно.

¹¹ Баян хүнэй эд зөөри тэрээндэ бэхи хото, үндэр хана мэтээр һанагдадаг.

¹² Бардам сэдьхэл һүйдхэлэй урда ехэлиг. Хүндэлэлэй урда хүнэй сэдьхэл даруу байдаг.

¹³ Хүниие хүсэд шагнангүй харюу хэлэхэнь тэнэгэй хэрэг ба эшэгүүритэй.

¹⁴ Хүнэй урма зориг үбшэниие тэсэхэдэ туһалдаг. Сүхэрһэн зоригһоо найдал талиидаг.

¹⁵ Бэрхэ хүн мэдэлгэ эзэмшэдэг. Сэсэн ухаатын шэхэн мэдэлгэ бэдэржэ шагнадаг.

¹⁶ Бэлэг үгэһэн хүнэй урда бүхы үүдэнүүд нээгдэжэ, дээдэ түшэмэлтэй ушаруулна.

¹⁷ Ондоо хүнэй ерэжэ шалгахаһаа урид түрүүлжэ хэлэһэн хүн лэ зүб шэнги байдаг.

¹⁸ Жээрэб хаялга арсалдаа тогтоодог ба хүсэ ехэтэйшүүлые хоёр тээшэнь һалгадаг.

¹⁹ Гомдоһон ахаяа бусаахань бүхэ ханатай хото эзэлэгшэһээ хэсүү. Хэрүүл арсалдаан томо суургатай хаалга мэтэ.

²⁰ Өөрынь үгэ хүүрээр хүнэй зосоо садхалан болохо: хэлээрээ олоһон юумээрээ садаха.

²¹ Хэлэнэй үзүүртэ амин ба үхэл байдаг. Хэлэндээ болгоомжотой хүн һайн үрэ үзэдэг.

²² Эхэнэрые олобол, һайниие олонош. Эзэнэй талархалда хүртэһэнэйш тэмдэг мүн.

²³ Ядуу хүнэй туһа эрижэ гуйхада, баян хүн бүдүүлиг харюу үгэдэг ушар олон.

²⁴ Дан олон нүхэд һүйдхэлдэ асаржа магад. Зарим ушарта анда нүхэр аха дүүһээ үлүү байдаг.