Гэршэлгэ 7 - Библи

¹ Тэрэнэй һүүлээр газар дэлхэйн дүрбэн буланда дүрбэн Эльгээмэлнүүдэй зогсожо байхые харабаб. Тэдэ Эльгээмэлнүүд газар дайда руу, уһан далай руу, ой модо руу һалхилхагүйн тула дэлхэйн дүрбэн һалхиие халхалан барижа байгаа.

² Гартаа амиды Бурханай тамга баряад, зүүн зүгһөө ерэжэ ябаһан баһа нэгэ Эльгээмэлые харабаб. Тэрэ Эльгээмэлынь газар дайдада, уһан далайда гэм хоро хүргэхэ эрхэтэй дүрбэн Эльгээмэлнүүдтэ хандан, иигэжэ шангаар хашхарба:

³ «Бурханай бүхы албатанай магнай духадань тамга даража тэмдэглээдүйдэмнай газар дайдадашье, уһан далайдашье, ой модондошье гэм бү хэгты».

⁴ Хэды хүн духадаа тамга табюулааб гэжэ хэлсэхые дуулааб. Израилиин бүхы угсаата зоной зуун дүшэн дүрбэн мянган хүниинь тамга даруулаа:

⁵ Иудын угсаатанһаа арбан хоёр мянган хүн, Рэүбээнэй угсаатанһаа баһал арбан хоёр мянга, Гаадай угсаатанһаа арбан хоёр мянга,

⁶ Ашээрэй угсаатанһаа арбан хоёр мянган хүн, Напталиигай угсаатанһаа арбан хоёр мянга, Мэнашшээгэй угсаатанһаа арбан хоёр мянга,

⁷ Симеоной угсаатанһаа арбан хоёр мянга, Левиин угсаатанһаа арбан хоёр мянган хүн, Иссахаарай угсаатанһаа арбан хоёр мянга,

⁸ Зэбүлүүнэй угсаатанһаа арбан хоёр мянга, Иосифой угсаатанһаа арбан хоёр мянга, Бэньямиинэй угсаатанһаа арбан хоёр мянган хүн духадаа тамга даруулаа.

Тоолошогүй олон хүнүүд

⁹ Тэрэнэй удаа харахадамни, тооложо барагдашагүй олон зон урдамни үзэгдэбэ. Тэдэ зоной дунда бүхы үндэһэ яһатан, арадууд, угсаатан, янза бүриин хэлэтэй хүнүүд ерээд байгаа һэн. Тэдэ зон хаан шэрээгэй урда, Үргэлэй Хурьганай урда зогсобо. Тэдэнэр сагаан хубсаһа үмдэнхэй, гартаа пальма модоной мүшэрнүүдые баринхай.

¹⁰ Тэдэ иигэжэ хашхаралдана: «Хаан шэрээдэ Һуугааша манай Бурхан, мүн Үргэлэй Хурьганда абаралга».

¹¹ Хаан шэрээе, ахамадуудые, дүрбэн амитадые тойроод, бүхы Эльгээмэлнүүд зогсожо байба. Тэдэнэр хаан шэрээгэй урда уруугаа хаража бултадаа унаад, Бурханда мүргэбэд.

¹² Тиихэ зуураа, тэдэ иигэжэ хэлээ: «Болтогой! Манай Бурханда магтаал соло, сэсэн бодол, баяр баясхалан, нэрэ хүндэ, эрхэ засаг, хүсэ шадал хэтын хэтэдэ үршөөгдөө! Болтогой!»

¹³ Тиигээд нэгэ ахамадынь: «Сагаан хубсаһа үмдөөд байһан ямар хүнүүд гээшэб? Тэдэ хаанаһаа ерээб?» – гэжэ намһаа һураа.

¹⁴ «Ноён аа, та мэдэнэт», – гэжэ харюусааб. Тиихэдэмни намда тэрэ иигэжэ хэлэбэ: «Эдэ хүнүүд гайтай ехэ гасалан зоболон үзэжэ ерэгшэд мүн. Эдэнэр хубсаһа хунараа Үргэлэй Хурьганай шуһанда угаажа, сагаан болгобо.

¹⁵ Тиимэһээ эдэ хүнүүд Бурханай хаан шэрээгэй урда зогсоод, Тэрэнэй һүмэ дотор үдэр һүнигүй Тэрээндэ алба хэнэ. Тиин хаан шэрээдэ Һуугааша эдэ хүнүүдые хамгаалха.

¹⁶ Тэдэ хүнүүд саашадаа үлэн хооһоор ябахагүй, ундаа хүрэжэ зобохогүй, ааяма шанга наранда шаруулхагүй, бүгшэм халуунһаа боложо ядархагүй.

¹⁷ Юундэб гэхэдэ, хаан шэрээгэй урда зогсожо байгааша Үргэлэй Хурьган тэдэ хүнүүдэй адуулагша эзэниинь боложо, мүнхэдөө амидаралай уһанда тэдэниие залан абаашаха. Эдэ хүнүүдэй нюдэнэй нулимсые Бурхан Өөрөө аршаха».