Эзраа 1 - Библи

Киир хаанай захиралта

¹ Персиин хаан Киирэй түрүүшын жэлээ хааншалжа байхада Ерэмияагаар дамжуулһан үгэнүүдэйнгөө бэелүүлэгдэхын тула Эзэн Кииртэ нүлөө үзүүлжэ, тэрэ бүхы хаан түрөөрөө бэшэмэл аргаар болон үгэнүүдээр иигэжэ тунхаглахые захирба:

² «Персиин хаан Киир иимэ зарлиг буулгана: Огторгойн Эзэн Бурхан газар дэлхэйн бүхы хаан түрэнүүдые минии мэдэлдэ үгөө. Иудын Иерусалимда Тэрээндэ шүтэн мүргэдэг Һүмэ барихыемни Тэрэ захираа.

³ Эзэн Бурханай арад зонһоо хэн байнаб, тэдэ Иудын газарта, Иерусалим хото ошожо, Израилиин Эзэн Бурханай һүмын барилгада хабаадалсаг. Бурханиинь тэдээнтэй хамта байхань болтогой!

⁴ Харин арадһаа үлэгшэдтэ бултандань, хаанашье байгаа һаань, нютагай зон алта мүнгөөр, үхэр малаар, мүн ондоошье зөөри зөөшөөр, Иерусалимдахи Бурханай һүмын барилгада ехэ үргэл хэжэ туһалалсаг».

Бусаха замдаа бэлэдхэл

⁵ Иудын, Бэньямиинэй уг гарбалай аха заханар, санаартад болон левидүүд, мүн Бурханай зүрхэ сэдьхэлынь зоригжуулһан бусадшье хүнүүд Эзэнэй һүмэ барилсахаяа Иерусалим тээшэ түхеэрбэд.

⁶ Нютаг зон һүмын үргэлдэ нэмэри оруулһанһаа гадна мүнгэн амһартануудые, алтан болон бусад үнэтэ хэрэгсэлнүүдые, үхэр мал үгэбэ.

⁷ Персиин хаан Киир Иерусалимһаа өөрынгөө бурханай һүмэдэ Навуходоносорой абаашажа табиһан Эзэнэй һүмэдэ хабаатай бүхы амһартанууд болон эд хэрэгсэлнүүдые

⁸ үнэтэ хэрэгсэлнүүдэйнгээ сан баригша Митрэдаадаар гаргуулжа, тэрэнь Иудын тайжа Шэшбаццаарта бүрин тоогоорнь тушаажа үгэбэ.

⁹ Тэдэнииень тоолон нэрлэбэл: гушан алтан табаг, нэгэ мянга хори юһэн мүнгэн табаг,

¹⁰ гушан алтан аяга, дүрбэн зуун арбан мүнгэн аяга ба мянган бусад амһартанууд.

¹¹ Бүхы алтан, мүнгэн амһартануудынь табан мянга дүрбэн зуу байба. Вавилоонһоо Иерусалим тээшэ нүүлгэнэй болоходо, эдэ бүгэдые Шэшбаццаар абажа ерэһэн юм.