Эзэкээл 9 - Библи

Иерусалимай зониие хэһээхэ тушаа Эзэн захирба

¹ Эзэн Бурханай угаа шангаар иигэжэ айладхахые дуулабаб: – Хотые хэһээгшэд дайнай зэбсэг баряад наашаа ерэг лэ.

² Тиихэдэнь тэрэ дары зургаан хүн нангин үргөөгэй гадаа хойто бартаануудһаа зэр зэбсэгээ баряад ерэбэ. Тэдэнэй дунда маалинга хубсаһа үмдэнхэй, бүһэдөө бэшэлгын хэрэгсэлнүүдтэй нэгэ хүн ябалсаа. Тэдэ ерэжэ, үргэлэй гуулин шэрээгэй хажууда зогсобо.

³ Тиихэдэнь Израилиин Бурханай херүүбүүд дээрэ оршоһон алдар соло нангин үргөөгэй богоһо руу шэлжэрбэ. Эзэн Бурхан маалинга хубсаһа үмдэгшэ, бүһэдөө бэшэлгын хэрэгсэлнүүдые зүүгшэ хүниие дуудаба.

⁴ Тэрээндэ Эзэн иигэжэ айладхаба: – Иерусалим хотые бүхыдэнь ябажа, хото соо боложо байгааша жэгшүүритэй муухай хэрэгүүдые буруушаан, һанаагаа зобожо байгааша зониие шэлэн, магнай дээрэнь тэмдэг таби.

⁵ Бэшэ зон тушаа Бурханай иигэжэ айладхахые дуулаа һэм: – Хото соогуур хойноһоонь ябажа, хайрлангүй, үмэгшэлэнгүй тэдэ зониие алагты.

⁶ Хүгшэн зониие, залуушуулые, эхэнүүдые, хүүгэдыешье алагты. Харин магнай дээрээ тэмдэгтэй зондо гар бү хүрэгты. Нангин үргөөһөөм эхилэгты. Тиигэжэ нангин үргөө соо байгааша ахамадуудһаа тэдэ эхилбэ.

⁷ Бурхан иигэжэ тэдээндэ айладхаба: – Нангин үргөө бузарлагты! Үхэһэн зоной бэенүүдээр хашааень дүүргэгты! Гараад эхилэгты! Тиигээд тэдэ гаража, хото соо зониие хюдажа эхилбэ.

⁸ Алалсаан боложо байхада би гансаараа үлөөд, газарта унажа, иигэжэ хашхарбаб: – Эзэн Бурхан! Иерусалимда Та иимэ ехээр уурлаа гээшэ гүт? Израилиин бүхы зониие хюдахатнай гээшэ гү?!

⁹ Тиихэдэм Эзэн иигэжэ харюусаба: – Израилиин болон Иудын хан түрын улад зон угаа ехэ зэмэтэй. Тэдэ газар дэлхэй дүүрэн алалсаа хюдалсаа үүдхэжэ, Иерусалим хотые гэмтэ ябадалаар дүүргээ. Намайе, Эзэниие, орон нютагһаань арсажа, өөһэдыень харалсахаа болиһон тухаймни тэдэ хэлэнэ.

¹⁰ Тиимэһээ Би тэдэниие хайрлахагүйб, энэрэл үзүүлхэгүйб. Хэһэн юумыень өөһэдтэнь амасуулхаб.

¹¹ Тиигэһээр байтар маалинга хубсаһа үмдэгшэ, бүһэдөө бэшэлгын хэрэгсэл зүүгөөшэ хүн бусажа, Эзэндэ: – Танай захиралтые дүүргээб, – гэжэ дуулгаба.