Эзэкээл 4 - Библи

Иерусалим хотын ерээдүй бүһэлэлтэ тухай

¹ Эзэн Бурхан иигэжэ айладхаба: – Хүнэй үри Эзэкээл, хирпиисэ абажа, урдаа табяад, Иерусалим хотын дүрсэ дээрэнь зура.

² Тэрэниие тойроһон бүһэлэлтэ, ханануудые, тойроод обоолһон шорой, хотон хүреэнүүдые, хэрэм эбдэдэг түхеэрэлгэнүүдые зураарай.

³ Удаань түмэр хайруулга абажа, шинии болон хотын хоорондохи хана мэтээр табяарай. Тиигээд тэрэ хотодо добтолон оро. Тэрэ хото бүһэлжэ, добтолоорой. Энэ болбол Израилиин арад түмэндэ дүлгэ тэмдэг болохо юм.

⁴ Тиигээд ши зүүн таладаа хэбтэжэ, Израилиин арад зоной гэм зэмые өөр дээрээ даажа хэбтэхэш.

⁵ Хэдэн олон жэлнүүдтэ, түхэреэн жэлдээ, гурбан зуун ерэн хоногой туршада ши хажуулдин хэбтэжэ, тэдэнэй гэм зэмые амасан байхаш.

⁶ Энээнэй дүүрэһэнэй удаа баруун таладаа эрьелдэжэ, жэлһээ жэлдэ, жэлдээ дүшэн үдэрэй туршада, гэм зэмэйнь түлөө хэһээлтэ амасан байхаш.

⁷ Бүһэлэгдэһэн Иерусалим руу эрьежэ, гараа тэрээн руу һунган, Иерусалим тушаа уридшалан айладхаарай.

⁸ Хараарай, аргамжаар Би шамайе хүлихэб, тиихэдэмни, ши бүһэлэлтын дүүрэтэр нэгэ хажууһаа нүгөө хажуу тээшээ эрьелдэжэ шадахагүй байхаш.

⁹ Шэниисэ, ешмээн, горох, зарма, шара будаа болон хара будаа абажа, хамта худхаад, хилээмэ баряарай. Тэрэ гурбан зуун ерэн үдэрэй туршада зүүн таладаа хэбтэхэ үедөө ши энээнииел эдихэ ёһотойш.

¹⁰ Үдэртөө шамда хорин шээкэлэй хоол үгтэхэ. Энэ хадаа үглөөдэр болотор шамда хүрэдэг байха.

¹¹ Хоёр аяга уһан шамда үгтэдэг байха. Үглөөдэр болотор энэ шамда хүрэхэ ёһотой.

¹² Хүнэй хатаһан бааһаар гал түлижэ, тэрэ гал дээрээ хилээмэ шаран болгожо, зоной хараһаар байтар эдидэг байха ёһотойш.

¹³ Эзэн Бурхан үргэлжэлүүлэн иигэжэ айладхаба: – Хариин арад зон руу Минии сүлэн эльгээхэдэ, Израилиин арад түмэн иигэжэ гажа буруу юумэ хэжэ, сээртэй бузартай эдеэ хоол тэндээ иигэжэ барижа байхал.

¹⁴ Гэбэшье би иигэжэ харюусабаб: – Хайрлыт, Эзэн Бурхан! Би өөрыгөө хэзээдэшье бузарлаагүй бэлэйб. Бага наһанһаа хойшо би үхэһэн малай һэе гү, али арьяатанда барюулһан амитанай хүүр хэзээдэшье эдижэ үзөөгүйлби. Сээртэй ямаршье эдеэ хоол баряагүйлби.

¹⁵ Тиихэдэмни Эзэн Бурхан: – Зай, тиигэбэл, хүнэй бааһанай орондо шамда үхэрэй аргал үгэнэб. Тэрэниие шатаажа, гал дээрэнь хилээмэ болгоходошни болохо, – гэжэ айладхаба.

¹⁶ Тиигээд Тэрэ иигэжэ нэмэбэ: – Хүнэй үри Эзэкээл! Иерусалимда эдеэ хоол хомор болгохо гэжэ байнаб. Эдихэ хоолоо, ууха уһаяа хэмжэжэ эхилхэдээ, зон ехэ уйдан һанаагаа зобохо.

¹⁷ Эдеэ хоолынь, уһаниинь дуталдажа, зон аргагүйдэжэ, гэм зэмэйнгээ түлөө хосорхо.