Эзэкээл 36 - Библи

Израилиин хада уулануудта айладхал дамжуулагдаба

¹ Эзэн намда иигэжэ айладхаба: – Хүнэй үри Эзэкээл, Израилиин хада уулануудта Минии иимэ үгэ хүүр дамжуула:

² Дайсад таанадые баһажа, «тэрэ эртэ урдын хаданууд мүнөө манай болоо» гэжэ хүхилдэнэ.

³ Тэдэ бүхы талаһаа таанадые һандаргажа, үгы хэжэ байна. Хариин эзэрхэг зон таанадые наада барина.

⁴ Тойроод байгааша арадуудай олзо, наадалха зүйлынь бологшо хада ууланууд, гүбээнүүд, урасхалнууд, гол нюруунууд, һандарһан газарнууд, хооһорһон хотонууд, Минии, Эзэн Бурханай, айладхал шагнагты.

⁵ Угаа ехээр уурлан, тэдэ арадуудай, илангаяа Эдоомой арад түмэнэй, урдаһаа тулахаб гэжэ айладханаб! Таанадые баһан, тэдэ бусадһаа шангаар энеэгээ бэлэй, газар бэлшээрииетнай эзэмдээ.

⁶ Таанад бусад арадуудай наадалха зүйл боложо, ехэ зобоот. Тиимэһээ Би, Эзэн Бурхан, угаа сухалдаад байнаб.

⁷ Тойроод байгааша арадуудтнай өөһэдөө наада энеэдэнэй зүйл болохо гэжэ Би, Эзэн Бурхан, шахаа тангаригаа үгэнэб.

⁸ Израилиин хаданууд, таанад дээгүүр модод ургажа, Минии арад түмэндэ үрэ жэмэс бэлэглэхэ. Минии зон гэртээ һаяар бусаха юм.

⁹ Би таанад тушаа һанаагаа табихаб. Тиихэдэм газартнай хахалагдажа, ургаса таригдаха.

¹⁰ Израилиин улад зон таанад руу бусажа, хотонуудые һэргээн бодхоожо, ажамидардаг болохо.

¹¹ Улад зон, адууһа мал олошорхо, үнэржэн үдэн байха. Иигэжэ таанад хаясаанай бэшэ, олон зоной орон нютаг болохот. Би таанадые урданһаа үшөө ехээр үршөөхэб. Тиихэдэм Намайе Эзэн гээд мэдэдэг болохот.

¹² Израилиин арад түмэнөө Би гэртэнь һөөргэнь асархаб. Хада ууланууд, тэдэ зомни таанадые эзэлэн ажаһууха, таанад – Минии арадай угай газар гээшэт, хододоо баян ургаса үгэжэ, үхи хүүгэдые үдхэн байха эрхэ нүхэсэл тэдээндэ олгуулхат.

¹³ Ургаса һайн таанад дээгүүр урганагүй, улад зон туража үхэн алдана гэжэ таанад тушаа хэлэдэгынь зүб.

¹⁴ Харин мүнөө сагһаа эхилжэ хододоо баян ургасатай байхат, зон туража үхэхэеэ болихо, үнэр олон болохо.

¹⁵ Ондоо арадууд таанадые шоо үзэхэеэ, наадалхаяа болихо. Арад зондоо баян ургаса үршөөн байхат.

¹⁶ Эзэн намда иигэжэ айладхаба:

¹⁷ – Хүнэй үри Эзэкээл! Израилиин арад түмэн өөрын газар дээрэ ажаһуухадаа муу хэрэгүүдые үйлэдэжэ, һарынхияа үзэжэ байһан эхэнэртэл газарые бузарлаа бэлэй.

¹⁸ Тэдэ алалсаа хюдалсаа үйлэдөө, онгонуудта мүргөө, иигэжэ газар бузарлаа болоно. Тиимэһээ Би тэдээндэ угаа ехээр уурлажа,

¹⁹ арадуудай дундуур тараагааб. Өөһэдынь хэһэн хэрэгүүдэй хэмээр хэһээгээб.

²⁰ Туугдан ошоһон газар нютаг бүхэндөө тэдэ Минии нангин нэрэ бузарлаа: «Эзэн Бурханай арад аад, орон нютагһаа гаран ошохо баатай болоо гэжэ хариин зон хэлсэнэ».

²¹ Тиимэһээ нэрэ хүндэеэ хараха баатай болооб.

²² Израилиин улад зондо иигэжэ дуулга: таанадай түлөө бэшэ, ошоһон арад бүхэнэйнгөө урда танай бузарлагша Өөрынгөө нэрэ хүндын түлөө Би нэгэ хэрэг үйлэдэхэм.

²³ Өөрынгөө нангин байһые хариин арадуудта гэршэлхэдэм, тэдэ Намайе Эзэн Бурхан гээд ойлгохо. Энэ болбол Би, Эзэн Бурхан, айладхана мүн!

²⁴ Арадуудай дундаһаа таанадые суглуулан, өөрынтнай газар руу асархаб.

²⁵ Сэбэр уһаар таанадые сүршэхэб, онгонуудые зайсуулхаб, иигэжэ муу муухай бузарһаа һалахат.

²⁶ Үсэд зүрхыетнай үгэ дууламгай шэнэ зүрхөөр һэлгэхэб. Шэнэ һанаа бодолтой болохот.

²⁷ Өөрын һүнэһэ таанад руу оруулжа, таанадые Өөрын хуули, зарлигуудые сахигшад болгохоб.

²⁸ Танай үбгэ эсэгэнэртэ үгэгшэ газартам дахин ажаһуудаг болохот. Таанад – Минии арад түмэн, Би танай Бурхан болохоб.

²⁹ Бузарлагша зүйлһөө таанадые аршалхаб, баян ургаса үршөөхэдэм, үлэсхэлэн байдал оройдоошье үзэхэгүйт.

³⁰ Элбэг-дэлбэг үрэ жэмэс модод үгэг, баян ургаса таряалангууд хэшээг гэжэ Би үршөөхэб. Үлэн хооһон байһандаа арадуудта шоо үзүүлхэгүйт бэшэ.

³¹ Хэһэн муу муухай хэрэгүүдээ һанажа, өөһэдһөө жэрхэжэ эхилхэт.

³² Израилиин улад зон, мэдэгты, таанадай түлөө эдэ бүгэдые хэнэ бэшэб. Хэһэн хэрэгһээ эшэжэ зобон байгты. Энэ хадаа Би, Эзэн Бурхан, айладхана мүн!

³³ Таанадые нүгэлһөөтнай арюудхаһанай удаа хотонуудаа һэргээн бодхоожо, тэндээ байрлахыетнай таанадта зүбшөөхэб.

³⁴ Танай газараар үнгэрһэн хүн бүхэн зэлүүд хооһон байһыень хараһан байха. Харин мүнөө тэрэ газар дахин хахалагданхай, таригданхай байдаг болохо.

³⁵ Ханха зайдан, хооһон байһан газар мүнөө Эдээмэй сэсэг мэтэ болоо, һандарһан, хооһорһон, тонуулһан хотонууд бүхэлэгдөө, ажаһуугшадтай болоо гэжэ зон хэлсэхэ.

³⁶ Хүршэ арадуудтнай Минии, Эзэнэй, һандарһан хотонуудые һэргээн бодхоодогые, хооһорһон, үгырһэн газарнуудые ургаса тарин ногооруулдагые мэдэдэг болохо. Би, Эзэн, найдуулһанаа дүүргэдэг мүн!

³⁷ Намһаа дахин туһа гуйхыетнай, хонин һүрэг мэтээр олошорхыетнай Би зүбшөөхэб.

³⁸ Мүнөө һандараад байгааша хотонууд Иерусалимдахи һайндэрнүүдэй үедэ үргэлэй хонидой олон байдагтал, улад зоноор дүүрэн болохо. Тиихэдэ таанад Намайе Эзэн гээд ойлгохот.