Эзэкээл 34 - Библи

Израилиин бирагүй хонишодто гай гасалан тудаха

¹ Эзэн намда иигэжэ айладхаба:

² – Хүнэй үри Эзэкээл! Израилиин ноёд болбол муу хонишод байна. Тэдэ ноёдые шүүмжэлэн, Минии, Эзэн Бурханай, иигэжэ айладхаһые ши дуулга: Израилиин хонишод, таанадта гай гасалан тудаха! Хонид тушаа бэшэ, гансал өөһэд тушаа һанаагаа таанад табинат.

³ Һү, тоһыень эдеэд, нооһоорнь хубсалаад байнат. Эгээл тарган хонидые гарганат! Харин хонин һүрэг тэжээхэ, хооллуулха тушаа һанаагаа табинагүйт.

⁴ Һуларһан хонидто тэнхээ оруулаагүйт, үбшэн үлбэрыень эмшэлээгүйт, гэмтэһэниие боожо байгаагүйт. Таанад тэдээндэ хайра гамгүйгөөр хандаат.

⁵ Хонишонгүй байхадаа тэдэ бутаржа, хээрын ан арьяатанай хүнэһэн болон тараа.

⁶ Минии хонид бүхы дэлхэйгээр таран төөреэ. Хада уулаар, гүбээнүүдээр тэдэ төөрин ябаа, хэншье тэдэниие бэдэрээгүй.

⁷ Хонишод, таанад мүнөө Минии, Эзэнэй, айладхал шагнагты.

⁸ Би, Эзэн Бурхан, Өөрөөрөө тангариглан тунхагланаб: Минии хонид харууһагүй орхигдожо, ан арьяатанай хүнэһэн болобо. Хонишод тэдэниием бэдэрээгүй, гансал өөһэд тушаа һанаагаа табяа.

^9-10 Тиимэһээ Би, Эзэн Бурхан, таанадые хэһээхэб! Хонидоо таанадһаа холодуулхаб, адуулхыетнай дахин тэдэнээ үгэхэгүйб! Эдишэ болгон гаргахыетнай зүбшөөхэгүйб!

¹¹ Эзэн Бурхан иигэжэ айладхана: – Би Өөрөө хонидоо бэдэрхэб, харууһалхаб.

¹² Тараад байһанайнь удаа хамтадхан суглуулхадаа хонишоной һүрэгөө шалган байдагтал Би тэдэнээ шалгахаб. Хонидни бүрхэг харанхы үдэр арадуудай дундуур таран төөреэ бэлэй. Би мүнөө тэдэниие абархаб!

¹³ Хариин зоной дундаһаа тэдэниие суглуулан гаргахаб, түрэл орон нютаг Израиль руунь асаржа, хада уулаар, гол нюруугаар, һайн бэлшээринүүдээр адуулхаб.

¹⁴ Тунга ногоон бэлшээридэ Израилиин хада уулаар тэдэ бэлшэхэ, аюулгүй амгалан тиирэхэ.

¹⁵ Би Өөрөө хонидоо адуулхаб, аюулгүй тайбан газарта амаруулхаб. Энэ болбол Би, Эзэн Бурхан, айладхана мүн!

¹⁶ Үгы болоһыень оложо, тараһыень бусаажа, гэмтэһыень боожо, үбшэн үлбэрыень эмшэлжэ байхаб. Харин таргыень, эрьюу болоһыень үүсэлхэб, юуб гэхэдэ, хони яажа зүбөөр харууһалхые Би мэдэнэб.

¹⁷ Эзэн Бурхан хонидынь болохо Израилиин арад түмэндэ иигэжэ айладхана: – Таанад Минии һүрэг гээшэт. Би Өөрөө һүрэгэйнгөө хонидой дунда, хонидой ба тэхэ ямаануудай дунда зарга шүүбэри шиидхэхэб. Алинтнай тэнхээ тамир һайтайб гэжэ мэдэхын тула ехэ наринаар хойноһоотнай адаглан байхаб.

¹⁸ Эгээл һайн тунга ногоондо бэлшэжэ байһан аад, заримашуултнай дашууржа, эдижэ бараагүй ногоогоо хүлөөрөө гэшхэн дэбһэн байна. Нүгөөдүүл сэбэр тунгалаг уһанһаа уужа байтараа хүлөөрөө уһа булангиртуулна.

¹⁹ Харин үлөөшэ хонид таанадай гэшхэһэн ногоо, булангиртуулһан уһа ууха юм аал?!

²⁰ Мүнөө хадаа Би, Эзэн Бурхан, тэнхээ тамиргүй хони хүсэ шадалтай хонидһоо илгахаб.

²¹ Хүсэ шадалтай хонид, таанад эбэрээрээ мүргэн, тэнхээгүй хонидые үлдэнэт.

²² Харин Би тэдэниие абархаб, хулгайда орожо, түлхюулжэ байхыень болюулхаб. Тиигээд һайень мууһаа илгахаб.

²³ Таанадые адуулдаг хонишоноор Өөрынгөө албатан Давидые томилхоб. Тэрэ таанад тушаа һанаагаа табидаг болохо.

²⁴ Минии албатан Давид ударидагшатнай, харин Би, Эзэн, танай Бурхан болохоб. Энэ болбол Би, Эзэн, айладхана мүн!

²⁵ Амгалан тайбан байдал үршөөһэн тухай хэлсээ таанадтай баталхаб. Тиигэжэ ан арьяатаниие тала дайдаһаа, ой модонһоо үлдэхэб, тиихэдэм таанад аюулгүй амгалан ажамидархат.

²⁶ Минии нангин хада уулые тойрон ажаһуухат. Хэрэгтэй сагтатнай хура бороо эльгээжэ, таанадые үршөөн үреэн байхаб.

²⁷ Талын модод үрэ жэмэс үгэн байха, газар баян ургаса бэлэглэхэ. Би таанадые богоол байдалһаа сүлөөлжэ, өөрын газар дээрэ амгалан ажаһуухыетнай зүбшөөхэб. Тиихэдэм Намайе Эзэн гээд мэдэхэт.

²⁸ Хариин зон таанадые бэшэ тонохогүй, ан арьяатан өөрын хүнэһэн болгохогүй. Амгалан тайбан, аюулгүй тэнюун ажаһуухат.

²⁹ Баян хэшэг үгэхыень газарые баадхахаб, тиихэдэм тэдэ үлэсхэлэн хооһон байдалһаа боложо туража үхэжэ байхаяа болихо. Үндэһэ яһатад таанадые шоо үзэхэеэ болихо.

³⁰ Минии, Эзэн Бурханай, Өөрын арад түмэн болохо Израилиие аршалан байһые хүн бүхэн ойлгохо. Энэ Би, Эзэн Бурхан, айладхана мүн!

³¹ Таанад хонидни, Би танай Бурхамби, таанад тушаа хододоо һанаагаа зобоноб.