Эзэкээл 13 - Библи

Худал лүндэншэд

¹ Эзэн намда иигэжэ айладхаа:

² – Хүнэй үри Эзэкээл! Минии бэшэ, өөһэдын үгэнүүдые хэлэжэ, лүндэн табижа байгааша худал лүндэншэдые гэмнэн хэлэ. Минии, Эзэнэй, үгэ дуулахыень баадха.

³ Эзэн Бурхан иигэжэ айладхана: – Минии бэшэ, өөрын үгэ хэлэжэ, ямаршье үзэгдэл хараагүй аад, хараабди гэжэ тунхаглажа байгааша худал лүндэншэд гай гасалан амасаха!

⁴ Израилиин улад зон, таанадай лүндэншэд хотын һандарал шулуунууд соо ажаһуугааша үнэгэдтэл адли ямаршье аша туһагүйл.

⁵ Сүмэрһэн ханануудые тэдэ хамгаалнагүй, ханануудые бодхооношьегүй, юрэдөө, Эзэнэй хилэнсэгтэ үдэрэй дайн дажарһаа Израилиие хамгаалнагүй.

⁶ Тэдэ худал хуурмагаар үзэл хараабди гэжэ, Минии, Эзэнэй, тэдэниие эльгээгээгүй байхада «Эзэн тунхаглажа байна» гэжэ хэлэжэ, худалаар лүндэн табина. Тиигээд тэдэ өөһэдын үгэнүүдые бэелхэ гээд зониие дэмы найдуулна.

⁷ Тиимэһээ Би тэдэниие иигэжэ һэргылнэб: хараһан үзэлтнай худал, уридшалан хэлээшэтнай худал! Тэдэ Минии үгэнүүд гээд хэлэнэт, харин Би таанадта юушье айладхаагүйб!

⁸ Тиимэһээ Эзэн Бурхан иигэжэ айладхана: – Таанад худалаар хэлэнэт, үзэлтнайшье худал. Тиимэһээ Би таанадай урдаһаа тулахаб.

⁹ Худал үзэл үзэдэг, уридшалан хэлэнэбди гэжэ худал тунхагладаг лүндэншэдые Би хэһээхэб. Минии улад зоной зүбшэжэ байхада тэдэ хамта байлсахагүй, нэрэнүүдынь Израилиин арад түмэнэй тоо бүридхэл соо бэшэгдэхэгүй, һөөргөө Израилиин газар уһан руу тэдэ бусахагүй. Тиихэдээ тэдэ Намайе Эзэн Бурхан гээд мэдэхэ.

¹⁰ Бүгэдэ юумэн амгалан тайбан гэжэ хэлэн, тэдэ Минии арад түмэниие мэхэлнэ. Амгалан тайбан юумэн үгы! Арад зоноймни бата бэшэ хана барихадань, тэдэ ерэжэ сагаанаар будана.

¹¹ Тэрэ худал лүндэншэдтэ ханань унахаяа байна гэжэ дуулга. Аадар бороо эльгэхэдэмни, мүндэр тэрэниие сохихо, шанга һалхин үлеэхэ.

¹² Ханын унахада, «будаһантнай хаанаб?» гэжэ хүн бүхэн таанадһаа асууха.

¹³ Тиимэһээ Эзэн Бурхан иигэжэ тунхаглана: – Уур сухал дундаа Би шанга һалхи, аадар бороо, мүндэр эльгэжэ, хана унагаахаб.

¹⁴ Таанадай будаһан ханые унагаахаб, тиихэдэмни байрань харагдаха. Тэрээнтэй хамта таанадшье хосорхот. Тиихэдээ Намайе Эзэн гэжэ мэдэхэт.

¹⁵ Ханада, мүн тэрэниие будагшад дээрэ уур хилэнгээ шэглүүлхэб. Хана үгы болоо, тэрэниие будагшадшье үгы гээд таанадта дуулгахаб.

¹⁶ Тэдэ Израилиин худал лүндэншэд Иерусалимда бүхы юумэн һайн гэжэ худал лүндэн табижа, худал үзэгдэлнүүдые тунхаглажа байгаа. Теэд һайн юумэн оройдоошье үгы ха юм! Энэ болбол Би, Эзэн Бурхан, айладхана мүн!

¹⁷ Эзэн иигэжэ айладхана: – Хүнэй үри Эзэкээл! Арад түмэнэйшни дунда уридшалан юумэ хэлэдэг эхэнэрнүүдые анхара. Тэдээндэ хэһээгдэхэт гэжэ дуулга.

¹⁸ Эзэн Бурхан иигэжэ айладхана гээд соносхо: «Элдэб янзын һахилай зүйлнүүдые, шэдитэ бүд бугааг, толгойдоо нэмэрхэ шэдитэ нэмэргэнүүдые таанад оёжо, бусад зониие зонхилхо хүсэ засаг хэн нэгэндэ үгэнэбди гэжэ һананат. Минии арад зоной ами наһые зонхилон байхабди, өөрынгөө аша туһада энээниие хэрэглэхэбди гэжэ һананат, теэд иигэжэ шадахагүйт!

¹⁹ Адха таряанай, зүһэм хилээмэнэй түлөө таанад Намайе арад зоноймни урда бузарланат. Амиды мэндэ үлэхэ зониие аланат, үхэхэ зониие амиды байлганат. Арад түмэндэм худал юумэ дуулганат.

²⁰ Ами наһа, үхэл хаталые хинан хүтэлбэрилэн байхаяа һэдэн, таанад шэдитэ бугаагуудые хэрэглэнэт. Би тэдэ юумыетнай үзэн яданаб! Би тэрэ бугаагуудые таһа татажа, барижа байһан хүнүүдыетнай сүлөө табихаб.

²¹ Нэмэргэнүүдыетнай удара татахаб, иигэжэ Минии арад түмэн таанадай нүлөөнһөө сүлөө болохо. Тиихэдэм таанад Намайе Эзэн гээд мэдэрхэт.

²² Минии дайрангүй орхихоёо һанаһан арюун сэбэр ябадалтай зондо таанад һаад хэнэт. Харин муу муухай ябадалтай зониие муу ябадалтай зандаа үлэхэдэнь урмашуулжа, дэмжэжэ байнат.

²³ Тиимэһээ таанадай худал үзэл үзэхые, худалаар уридшалан юумэ мэдэхые Би болюулхаб. Таанадай һабарһаа арад зоноо абархаб. Иигэжэ Намайе Эзэн гээд мэдэрхэт».