Еврейнүүдтэ 4 - Библи

¹ Тэрэ найдуулһан амаралтадань хүртэнгүй үлэшэхэгүйн тула бидэ булта болгоомжотой байха ёһотойбди.

² Сүл губяар ябаһан зондол тон адли бидэ Һайн Мэдээсэл дуулаабди. Тэдэнэр Бурханай үгые дуулаһаншье һаа, һайн болоогүй. Ушарынь хэлэхэдэ, тэдэ Бурханай үгые шагнажа байхадаа, тэрэ үгыень этигэл һүзэгтэйгээр тогтоожо абаагүй.

³ Харин бидэ, һүзэглэһэн хүнүүд, Бурханай найдуулһан амаралтадань хүртэжэ байнабди. Тэрээн тухай «Би уур сухалдаа тэдэниие амаруулха гэһэн газартаа хэзээшье оруулхагүйб гэжэ тангариглааб», – гэжэ Тэрэ Өөрөө хэлээ. Газар дэлхэйе бүтээхэ сагһаа хойшо Тэрэ ажалаа гүйсэдхэһэншье һаа, тиигэжэ хэлээ.

⁴ Нангин Бэшэг соо долоодохи үдэр тухай иигэжэ бэшээтэй: «Хэжэ байгаа ажалаа Бурхан долоодохи үдэртөө дүүргэжэ, хэжэ байгаа бүхы ажалнуудһаа долоодохи үдэртөө Бурхан амарба».

⁵ «Тэдэниие амаруулха гэһэн газартаа хэзээшье оруулхагүйб», – гэжэ тэндэ баһа бэшээтэй байдаг.

⁶ Һайн Мэдээсэл түрүүн дуулаһан хүнүүд этигэлгүй байһан хадаа амаралтада хүртөөгүй. Тэрэ амаралтада хүртөөгүй зон үшөөшье байна.

⁷ «Мүнөөдэр» гэгдэдэг ондоо үдэрые Бурханай шэлэһыень тэрэ харуулна. Нилээд сагай үнгэрһэн хойно Тэрэнэй Давидаар дамжуулан хэлэһэниинь Нангин Бэшэг соо үгтэнхэй: «Таанад мүнөөдэр Бурханай дуу дуулахадаа, үсэд зан бү гаргагты».

⁸ Хэрбээ Бурханай найдуулһан амаралтые Нүүнэй хүбүүн Иисүүсэй үгэбэл, Бурхан тэрэнэй һүүлдэ ондоо үдэр тухай хэлэхэгүй һэн.

⁹ Гэхэтэй сасуу Бурхан Өөрынгөө хүнүүдтэ субботын амаралтын үдэрые амалаа.

¹⁰ Бурханай найдуулһан амаралтада хүртэһэн хүнүүд Өөрынгөө хэрэгүүдһээ амаржа байһан Бурхандал адли баһал хэрэгүүдһээ амаржа байха.

¹¹ Этигэлгүй байһанайнгаа тула унаһан тэдэ хүнүүдтэл адли нэгэмнайшье унангүй, тиимэ амаралтада хүртэхын тула бүхы шадалаараа шармайе.

¹² Бурханай үгэ амиды ба хүсэтэй юм, хоёр талаһаан хурсалуулагдаһан ямаршье эриһээ хурса. Тэрэнь һүнэһэ һүлдэ хоёрой уулзалта, бүридэл болон уураг тархи, алишье юумэн хүрэтэр хүрэдэг. Тэрэ зүрхэнэй хүсэлэн ба бодолнуудые шиидхэжэ байдаг.

¹³ Бурханһаа далда, нюуса юумэн гэжэ үгы. Харин бүхы юумэн Тэрэнэй харасада элиржэ, нээгдэдэг. Тиин бидэ булта Тэрээндэ өөһэд тухайгаа тоосоо хэхэ ёһотойбди.

Иисүүс бодото Ахамад Санаарта

¹⁴ Бидэ Бурханай дэргэдэ байһан Бурханай Хүбүүн Иисүүс гэдэг агууехэ Ахамад Санаартатайбди. Тиимэһээ өөһэдынгөө шүтэжэ байгаа һүзэг этигэлые хатуугаар сахижа ябаял.

¹⁵ Манай Ахамад Санаарта бидэнэй ядаруу тулюур байдал тухай һанаагаа зобонгүй ябажа шадахагүй. Тэрэ бидэндэл тон адли бүхы талаһаа туршуулбашье, нэгэшье нүгэл хээгүй.

¹⁶ Тиин бидэ зоригжожо, буян хэшэгтэй Бурханай хаан шэрээдэ ойртожо үзэел даа. Бидэ маанадтал туһа болохо хэмжээгээр тэндэ үршөөл хайрада хүртэжэ, буян хэшэг олохобди.