Еврейнүүдтэ 10 - Библи

¹ Иудейн Хуули болбол бодото юумэнүүдэй тон зүб хэбынь бэшэ, харин һайн юумэнүүдэй һүүдэрынь лэ гээшэ. Жэлһээ жэлдэ, хододоо нэгэ адли амитадые тахил болгон үргэжэ, Бурханда ерэжэ байһан хүнүүдые Хуули яажа эрхим һайн болгохоб.

² Хэрбээ Бурханда мүргэл хэжэ байһан хүнүүдэй нүгэлнүүдынь үнэхөөрөө хүлисэгдэһэн байбал, тэдэ хүнүүд нүгэлтэйбди гэжэ өөһэдыгөө тоолохоёо болёод, тахил үргэхэеэ болихо һэн.

^3-4 Бухануудай болон тэхэнүүдэй шуһа хүнүүдэй нүгэлнүүдые хэзээдэшье арилгажа шадахагүй. Тиимэһээ тэдэниие жэл бүри үргэл болгожо асардаг. Тиигээд тэдэ тахилнууд хүнүүдтэ нүгэлнүүдыень һануулаад байдаг.

⁵ Тиимэһээ Христоос энэ газар дэлхэйдэ ерэхэдээ, Бурханда иигэжэ хэлээ: – Үргэл болон бэлэгүүдые хүсэнэгүйт. Тиихэдэ Намда махабад бэе олгоот.

⁶ Түгэс шатаалта үргэл болон нүгэл сагааруулгын үргэлнүүд Таниие баярлуулаагүй.

⁷ Тиигээд Би удаань хэлээб: «Харыт, Би ерээб. Нам тушаа хуйламал ном соо бэшээтэй. Бурхамни, Танай хүсэл бэелүүлхэ һанаатайб».

⁸ «Тахил, үргэлнүүдые, үргэлэй шэрээ дээрэ үргэгдэһэн түгэс шатаалта үргэлнүүдые, нүгэлнүүдээ арилгахын тула тахигдаһан тахилнуудыешье Та абаха дурагүй байгаат, тэдэниие һайшаагаагүйт», – гэжэ Тэрэ түрүүн айладаба. Эдэ бүхы тахилнуудые Хуулиин ёһоор үргэдэг байһаншье хадань, Тэрэ тиигэжэ айладаа.

⁹ «Ай, Бурхамни, Танай эрхэ хүсэлые бэелүүлхэеэ Би ерэнэб», – гэжэ удаань Тэрэ хэлэбэ. Тиихэдээ Бурхан бүхы хуушан тахилнуудые болюулжа, орондонь Христоосые тахил болгон табина.

¹⁰ Иисүүс Христоосой Бурханай эрхэ хүсэл бэелүүлэн, Өөрынгөө бэеые нэгэтэ болон хэтын хэтэдэ үргэл болгон асарһан хадань бидэ булта нүгэлнүүдһээн мултаран арюудхагдаабди.

¹¹ Хэдышье иудейн санаартадай үдэр бүхэн өөрынгөө алба гүйсэдхэн, нэгэ адли юумэеэ оло дахин тахил болгон асардаг байхадань, тэдэ тахилнуудынь нүгэлнүүдые хэзээшье арилгажа шададаггүй.

¹² Христоос болбол нүгэлнүүдэй түлөө нэгэ тахил тахяад, хэтын хэтэдэ Бурханай баруун талада һуугаа.

¹³ Тэрэ мүнөө дайсадыень хүлэйнь ула доро Бурханай оруулхыень хүлеэнэ.

¹⁴ Нүгэлнүүдээ арилгажа байһан хүнүүдые Христоос нэгэ үргэлөөрөө хэтын хэтэдэ эрхим түгэс болгоо.

¹⁵ Арюун Һүлдэшье энээн тухай бидэндэ гэршэлэн хэлэнэ:

¹⁶ – Тэдэ үдэрнүүдэй һүүлдэ тэдэнтэй баталха хэлсээн иимэ: Өөрын хуулинуудые тэдэнэй һанал бодолдо хадуулгахаб, зүрхэ сэдьхэлдэнь бэшэхэб гэжэ Эзэн хэлэнэ.

¹⁷ Би тэдэнэй зэмые хүлисэжэ, нүгэл тухайнь дахин дурдахагүйб.

¹⁸ Нүгэлнүүдэй хүлисэгдэһэн хойно тэдэнэй түлөө дахин үргэл хэхэ хэрэггүй.

Бурханай хажуудань ябаял

¹⁹ Аха дүүнэрни, Иисүүсэй үхэлэй ашаар бидэ Нангин Газарта орохо дүүрэн эрхэтэйбди.

²⁰ Тэрэ болбол хүшэгэй саагуур – Өөрын бэеэр – бидэндэ шэнэ, мүнхын амидаралда хүргэдэг харгы зам нээгээ.

²¹ Бидэ Бурханай гэр хараха агууехэ санаартатайбди.

²² Тиимэһээ үнэн сэдьхэлтэйгээр, дүүрэн һүзэг этигэлтэйгээр, бузар һанал бодолнуудһаан сэбэрлэгдэһэн зүрхэ сэдьхэлтэйгээр, сэбэр уһаар угаагдаһан бэетэйгээр Бурханай ойро ошоёл.

²³ Бурхан найдуулһанаа дүүргэхэ гэжэ этигэлтэй һаа, этигэжэ байһан тэрэ найдуулгаяа бата баримталан ябаял.

²⁴ Хүнүүдэй бэе бэедээ анхарал табижа, бэе бэедээ инаг хайраяа харуулхадань, дэмбэрэлтэй һайхан юумэ хэхэдэнь туһалжа байял.

²⁵ Маанадай зариман суглаагаа хаяжа ошодог заншалтай. Тиигэхэеэ болёод, орондонь Эзэнэй ерэхэ Үдэрэй ойртохо туһамынь бэе бэеэ бүри ехээр зоригжуулжа, урмашуулжа байял.

²⁶ Үнэн зүбые мэдэрһэн хойноо бидэнэй зорюута нүгэл хэжэ ороболнай нүгэлнүүдые арилгаха тахил дахин бидэндэ байхагүйл.

²⁷ Тиимэһээ зарга шүүбэриин болохые, Бурханда эсэргүүсэһэн хүнүүдые һүнөөхэ дошхон галые аймшагтайгаар хүлеэхэмнай үлэнэ.

²⁸ Моисейн Хуули буруушааһан хүн хоёр гурбан хүнэй гэршэлбэл, ямаршье үршөөл хайрагүйгөөр үхэлөөр хэһээгдэдэг.

²⁹ Зүгөөр Бурханай Хүбүүндэ зэбүүрхэдэг, өөһэдыень нүгэлнүүдһээнь арилгаһан Бурханай хэлсээнэй шуһые нангин гэжэ тоодоггүй хүнүүд, үршөөл хайрын Һүлдые доромжолдог хүнүүд тэрээнһээ долоон доро хэһээлтэдэ хүртэхэ ёһотой!

³⁰ «Би үһөөгөө абахаб, Би харюулхаб», баһа «Эзэн арад зоноо шүүхэ», – гэжэ хэлэгшые бидэ мэдэнэбди.

³¹ Амиды Бурханай гартань орохонь аймшагтай!

³² Таанадтай урдань юунэй тохёолдоһые һанаандаа оруулагты. Бурханай гэрэл туяагай таанадые гэрэлтүүлхэдэ, таанад зоболонгуудые дабан, агууехэ баатаршалга гаргабат.

³³ Таанадые урдань хүнүүд гомдохоодог, доромжолдог бэлэй, тиимэһээ тон тиигэжэ доромжолуулжа байһан хүнүүдые таанад хамгаалхада бэлэн байдаг бэлэйт.

³⁴ Таанад түрмэдэ һууһан хүнүүдэй зоболонгые хубаалсадаг, зөөри зөөшыетнай буляажа абахадань, баяртай байдаг һэнта, юундэб гэхэдэ, таанад тэнгэридэ хэтэдээ оршодог бүри һайн зөөри зөөшэтэй байһанаа мэдэжэ байгаат.

³⁵ Зоригоо бү алдагты, тиигэбэл агууехэ шагналда хүртэхэт.

³⁶ Бурханай эрхэ хүсэлые бэелүүлэн, найдуулһан юумыень абаха гэбэл, таанад тэсэбэритэй байха ёһотойт.

³⁷ Үшөө нэгэ хэды болоод, удангүй һаатангүй Заларан ерэгшэ ерэхэл.

³⁸ Үнэн сэдьхэлтэн этигэл һүзэгэйнгөөл ашаар амидарха, хэрбээ хэн нэгэнэй таталзабалнь, Би тэрэниие һайшаахагүйб.

³⁹ Бидэ татагалзан хосорогшод бэшэбди. Харин һүзэг этигэлтэй зомди, абарагдахабди.