Эстээр 9 - Библи

Иудейнүүд харшалагшадаа диилээ

¹ Еврей он тоололгын арбан хоёрдохи һарын, иудей хэлээр адаар һарын арбан гурбан болобо. Тэрэ үдэр эзэн хаанай нэрээр гаргаһан анханай зарлигай ёһоор дайсад иудейнүүдые диилэхэбди гэжэ һанаа бэлэй. Гэбэшье тад ондоогоор хэрэг эрьебэ, иудейнүүд харшалагшадаа диилээ һэн.

² Иигэжэ Ахашвероош хаанай мэдэлэй Перс, Мидиин улас түрын бүхы нютаг можонуудаар ажаһуугша иудейнүүд хотонуудаар сугларжа, добтологшо дайсадтаа харюу үгэхөөр бэлэн болобо. Ондоо үндэһэ яһатан иудейнүүдһээ айһан ушарһаа урдаһаань эсэргүүсэхэеэ зүрхэлбэгүй.

³ Улас түрын бүхы можо нютагуудай ноёд, захирагшад, түшэмэлнүүд, хаанай зүбшэгшэд Мордохайһаа айһандаа иудейнүүдтэ туһалба.

⁴ Хаанай ордондо Мордохай үндэр тушаалтай, нэрэ хүндэтэй боложо, тэрээн тушаа һураг суу можо нютагуудаар үргэнөөр тараба. Мордохайн нэрэ хүндэ улам дээшэлжэл, бэхижэжэл байба.

⁵ Иигэжэ иудейнүүд өөһэдыень үзэн ядадаг дайсадаа хайра гамгүй һэлмээр сабшан хюдажа, өөһэдын дураар хэрэг үйлэдэбэ.

⁶ Ниислэл хото Сүүзэдэ иудейнүүд табан зуун хуниие алажа усадхаба.

^7-10 Гадна иудейнүүдэй дайсад Һаммидаатын Һамаанай арбан хүбүүд болохо Паршандаат, Далпоон, Аспаата, Поратаа, Адальяа, Аридатаа, Пармаштаа, Арисай, Аридай, Байзатаа гэгшэдые тэдэ алаба, харин хэнэйшье эд зөөри дээрмэдэбэгүй.

¹¹ Ниислэл хото Сүүзэдэ алуулһан зоной тоо хаанда тэрэл үдэртөө мэдээсэгдээ һэн.

¹² Хаан Эстээртэ: – Мүнөөдэр иудейнүүд ниислэл хото Сүүзэдэ табан зуун хүниие, тэрэ тоодо Һамаанай арбан хүбүүдые алаа. Бусад можо нютагуудаар юу хээ гээшэб! Ши мүнөө үшөө ямар гуйлтатайбши? Гуйһан юумыешни сүм дүүргэхэб. Шамда үшөө юун хэрэгтэйб? Хүсэһэн лэ юумыешни бэелүүлхэб, – гэбэ.

¹³ – Агууехэ хаанай зүбшөөгөө һаа, үглөөдэр Сүүзэдэ иудейнүүд дайсадаа мүн лэ элирүүлэн хюдаха эрхэтэй байг лэ. Тиихэдэ Һамаанай арбан хүбүүдэй хүрэг бэенүүдые баханада үлгэг лэ, – гэжэ Эстээр хэлэбэ.

¹⁴ Хаан энээниие зүбшөөжэ, Сүүзэдэ зарлиг тараагдаба. Һамаанай арбан хүбүүдэй бэенүүд баханада үлгэгдэбэ.

¹⁵ Еврей литээр адаар гэдэг һарын арбан дүрбэндэ ниислэл хото Сүүзэдэ ажаһуудаг иудейнүүд дахин суглараад, үшөө гурбан зуун дайсадаа алаба, гэбэшье эд зөөридэнь гар хүрөөгүй бэлэй.

^16-17 Еврей литээр адаар гэдэг һарын арбан гурбанда бусад можо нютагуудай иудейнүүд мүн лэ сугларжа, дайсадһаа бэеэ аршалан, далан таба мянган хүниие алан усадхаба, харин эд зөөридэнь гар хүрөөгүй бэлэй. Тиигээд үглөөдэрынь, арбан дүрбэндэ, тэдэ амаржа, найр наада дэлгэн, баясан сэнгэн байба.

¹⁸ Ниислэл хото Сүүзэдэ ажаһуугааша иудейнүүд арбан гурбанда, арбан дүрбэндэ суглараад, дайсадаа усадхаа. Тиигээд арбан табанда амаржа, найр наада дэлгэбэ, баясан баярлан байба.

¹⁹ Тэрэ үеһөө хойшо хүдөөгэй иудейнүүд адаар һарын арбан дүрбэниие баяр нааданай, һайндэрэй үдэр болгожо, найр наада эмхидхэжэ, бэе бэедээ бэлэг баридаг заншалтай болоо һэн.

Пүүриим һайндэр

²⁰ Мордохай энэ бүхы үйлэ хэрэгүүд тухай бэшэжэ, Ахашвероош хаанай мэдэлэй холо ойрын нютаг нугануудаар иудейнүүдтэ бэшэг эльгээжэ,

²¹ жэл бүри адаар һарын арбан дүрбэ, арбан табаниие баяр болгон тэмдэглэхые захиба.

²² Ушар гэбэл, иудейнүүд тэдэ үдэрнүүдтэ дайсанай гарһаа мултаржа, уйдхар гашуудалынь баяр наадан боложо, гашуудалайнь үдэр баярай үдэр болон хубилаа бшуу. Тиимэһээ Мордохайн эльгээгшэ захяагай ёһоор иудей зон тэрэ үдэрые баярай үдэр болгон тэмдэглэжэ, найр наада дэлгэн, бэе бэеэ амтан эдеэгээр хүндэлжэ, ядаруу зондо бэлэг баридаг болонхой.

²³ Тэрэ гэһэнһээ хойшо иудейнүүдэй эхи үндэһэ табяаша зүйлнь заншалта боложо, Мордохайн тэдээндэ бэшэһэнэй ёһоор бүтээ бэлэй.

²⁴ Бүхы иудейнүүдэй дайсан Агаагай удам угсаа болохо Һаммидаатын Һамаан ямар һарада, ямар үдэртэ алалга хюдалга ябуулбал зохистойб гэжэ мэдэхын тула шоо-пүүр хаян байгаа.

²⁵ Эстээрэй хааниие бараалхахада, тэрэ зарлиг гаргажа, иудейнүүдэй урдаһаа Һамаанай һэдэгшэ хорото үйлэ хэрэг өөрынь толгой дээрэ буугаа бэлэй: иигэжэ Һамааниие хүбүүдтэйнь хамта баханада үлгөө һэн.

²⁶ Энээнһээ хойшо иудейнүүд тэрэ баяр наадые «пүүр» гэжэ үгэһөө «пүүриим» гэжэ нэрлэдэг. Еврейнүүд үзэһэн хараһан, тохёолдоһон бүхы үйлэ ябадалаа, мүн Мордохайн эльгээгшэ захяа тухай

²⁷ өөһэд хоорондоо болон үеһөө үедэ дамжуулан, захин хэлсэжэ, иудей угай хүн бүхэн тэрэ хоёр үдэрые жэл бүри тэрэл һарадаа, тэрэл үдэртөө Мордохайн заабарилһанай ёһоор заабол тэмдэглэхэ заншал тогтоогоо бэлэй.

²⁸ Эдэ үдэрнүүд тушаа иудей айл бүхэн үеын үедэ хаанашье амидаржа ябаа сагтаа һанажа, тэмдэглэжэ байдаг. Еврей зон эдэ үдэрнүүдые бү мартаг, уг унгинь үеһөө үедэ сахин ябаг!

²⁹ Иудей Мордохайн үргэмэл басаган Перс, Мидиин улас түрын хатан, Абиһааилай Эстээр «пүүриим» гэдэг һайндэр тухай Мордохайн бэшэһэн захяае бүрин дүүрэн дэмжэжэ, хаанта уласай албан ёһоор бэшэг гарган баталба.

³⁰ Мордохай тэрэ бэшэгые Ахашвероошой улас түрын зуун хорин долоон аймаг можонуудаар ажаһуугааша бүхы иудейнүүдтэ эльгээбэ. Энэ захяа соогоо Мордохай Эстээр хатантай хамта иудей арад түмэндөө халуун мэндэ дамжуулан, амгалан тайбан, үнэн шударга байдал хүсэн юрөөн байгаа бэлэй.

³¹ Мордохай иудейн Эстээр хатан хоёрой захиһанай ёһоор иудейнүүд «пүүриим» һайндэрые тэрэл сагтань үеһөө үедэ заабол тэмдэглэдэг байхые захяа соогоо бэшээд, һайндэрэй урда иудей хүн бүхэн масаг барижа, Эзэнһээ үреэл хайра гуйха ёһотойе заабарилаа һэн.

³² Эстээр хатанай зарлигай ёһоор «пүүриим» һайндэрые иигэжэ тэмдэглэдэг боложо, энэнь ном соо бэшэгдэнхэй.