Эстээр 7 - Библи

¹ Тиигэһээр Эстээрэй бэлдэһэн найр нааданай газарта эзэн хаан Һамаантай хамта дахин хүрэжэ ерэбэ.

² Найрай хоёрдохи үдэр тэдэ үзэмэй дараһан архи шэмэжэ һуухадаа, хаан Эстээртэ хандан: – Хатан Эстээр, юу хүсэнэбши? Хүсэһэн бүхы юумыешни би дүүргэхэб. Шамда юун хэрэгтэйб? Хаанта улас түрынгөө хахадыеньшье хамаагүй үгэхөөр бэлэмби, – гэбэ.

³ Тиихэдэнь Эстээр хатан харюусаба: – Минии эзэн хаан, хэрбээ танай һанаанда минии тааража, хүсэлыемни та үнэхөөрөө бэелүүлхэб гэбэл, ами наһыемни абараат гэһэнтэй жэшэмээр байна. Тиихэдэ ганса минии ами наһа бэшэ, арад түмэниием мүн лэ абаржа хайрлаат!

⁴ Маанадые мүнгэнэй түлөө усадхаха гэжэ байна. Хэрбээ минии арад түмэниие нээрээшье богоол болгон худалдаха гэжэ байгаагүй һаань, эзэн хаамни, танда би нэгэшье хандахагүй байгааб.

⁵ Ахашвероош хаан Эстээр хатанһаа: – Иимэ юумэ түсэблэгшэ тэрэ этэгээдшни хэн бэ? Тэрэ хүн мүнөө хаана байнаб? – гэжэ асууба.

⁶ – Тэрэ дайсан болбол энэ ёро муута Һамаан! – гэжэ Эстээрэй харюусахада, хатан хаан хоёрһоо Һамаан һүрдэн айгаа бэлэй.

⁷ Хаан аргагүй ехээр уурлажа, уужа байгааша үзэмэй дараһан архияа орхёод, ордоной сэсэрлиг руу ябашаба, харин Һамаан Эстээр хатанһаа ами наһыень хайрлаха тухай гуйха гэжэ зорюута тэндээ үлэбэ. Эзэн хаан өөрыень хайрлангүй шиидхэхэнь гэжэ Һамаан ойлгоһон байгаа.

⁸ Сэсэрлиг соо нэгэ хэды саг байгаад, хаан дараса уужа байгааша үргөөдөө бусаба. Эстээр хатанай байгааша һандали дээрэ Һамаанай һунаад хэбтэхые тэрэ хараад: – Минии ордон соо, минии хажууда энэ бузар амитан хатаниием хүсөөрөө эдлэхэнь гү?! – гэжэ уурлан үгүүлбэ. Хаанай хэлэмсээр тайган түшэмэлнүүд Һамаанай толгойе бүтүүлэн бүглэбэ.

⁹ Тайган түшэмэлнүүдэй нэгэн Харбонаа хаанда: – Һамаанай гэрэй дэргэдэ һаяхан бодхооһон табин тохой үндэр үлгүүр бии. Танай ами наһа абарһан Мордохайе тэндэ үлгэхэ гэжэ байһан юм, – гээд хэлэбэ. Ахашвероош хаан: – Тиигэбэл, өөрыень тэндэ дүүжэлэн үлгэгты! – гэбэ.

¹⁰ Иигэжэ Мордохайе алахаар бодхооһон үлгүүртэ Һамаан өөрөө үлгүүлэгдэбэ. Энээнэйл удаа одоол хаанай уур сухал номгороо бэлэй.