Эстээр 1 - Библи

Баштии хатанай панхарууталга

¹ Энэ үйлэ хэрэг хадаа эзэн хаан Ахашвероошой хан шэрээгээ эзэлэн һуугаа үедэ болоһон гэхэ. Ахашвероош хаан Энэдхэгһээ Эфиопи хүрэтэр зуун хорин долоон аймагые зонхилдог һэн.

² Хаан Сүүзэ гэдэг ниислэл хотодо ажаһуугаа.

³ Хаан шэрээдэ заларһанһаа хойшо гурбадахи жэлдээ найр хэбэ. Перс болон Мидиин уласай түшэмэлнүүд, сэрэгэй ноёд, аймаг нютагай зонхилогшод ба элдэб ноёд һайд уригдажа, хааниие бараалхаба.

⁴ Хахад жэлэй туршада хаан найр зугаа дэлгэжэ, хан түрынгөө агууехэ баялиг, өөрынгөө ялас гэмэ алдарта нэрэ элирхэйлжэ, бүгэдые гайхуулба.

⁵ Энээнэй удаа тэрэ ордонойнгоо сэсэрлиг соо долоон хоногой туршада үргэлжэлһэн найр наада дэлгэжэ, ниислэл хото Сүүзэдэ ажаһуудаг бүхы зониие ехэ, багатайнь уриба.

⁶ Найрай болоһон газар хадаа мүнгэн сахаригуудаар бүһэлөөтэй гантиг баханануудта сагаан, шад улаан үнгэтэй миндаһан утаһаар татаһан саб сагаан, бэхэ мэтэ үнгэтэй хүшэгэнүүдээр шэмэглэгдэнхэй байба. Шала сагаан, улаан гантиг, эржэн, оюун гэхэ мэтэ үнэтэй эрдэни шулуунуудаар шэгэдхэн шэмэглээтэй бэлэй. Алта, мүнгөөр бүриһэн хажуулжа хэбтэхэ олон тоото һандалинууд байгаа.

⁷ Элдэб гоё алтан хундаганууд соо ундан улад зондо дурадхагдаба. Үзэмэй дараһан архи хаанай агууехэ баялигайнь хэмээр, харамгүй аягалагдаа.

⁸ Хаанай буулгаһан зарлигай ёһоор ерэһэн хүн бүхэн өөрөө хэр зэргэ үзэмэй дараһан архи уухаа мэдэжэ, аягалагшад хүн бүхэнэй хүсэһэнэй ёһоор үзэмэй дараһан архи аягалжа байха ёһотой байгаа.

⁹ Тэрэ үедэ Ахашвероош хаанай ордондо Баштии хатаниинь эхэнэрнүүдтэ зорюулһан тусхай найр наада мүн лэ дэлгэбэ.

¹⁰ Найрай долоодохи үдэр Ахашвероош хаан халамгай хүхюун болоходоо, өөрынгөө зараса болохо долоон тайган түшэмэлээ ерүүлбэ. Мэһүмаан, Биззэтаа, Харбонаа, Бигтаа, Абагтаа, Зэтаар ба Хархаас гэжэ тэдэ нэрэтэй бэлэй.

¹¹ Хатан Баштии аргагүй һайхан байгаа. Ахашвероош хаан титим үмдэхүүлжэ тэрэниие асараад, ерэгшэ бүхы ноёд түшэмэлнүүдтэ, улад зондо харуулжа гайхуулха гэһэн байгаа.

¹² Тиигээд тайган түшэмэлнүүдэй Баштии хатанда ерээд, эзэн хаанай захиралтые дамжуулхадань, хатан ошохоёо арсаба. Энээниие хаан дуулажа, угаа ехээр уурлаба.

¹³ Ямар нэгэн хуули, эрхэ тухай шухала асуудалай гарахада, Ахашвероош хаан урданай хэрэг түүхэ һайн мэдэдэг сэсэн мэргэшүүлтэй, хуули ёһо мэдэдэг зонтой зүбшэдэг зантай байгаа.

¹⁴ Перс болон Мидиин уласай эгээл үндэр тушаалнуудые эзэлдэг, хааниие һанаһан сагтаа бараалхаха эрхэтэй Харшэнаа, Шэтаар, Адматаа, Таршииш, Мээрэс, Марсэнаа, Мэмухаан гэдэг сэсэн мэргэшүүлдээ хаан хандаба.

¹⁵ – Тайган түшэмэлнүүдээр дамжуулан, би Баштии хатанда захиралта үгөө бэлэйб. Гэбэшье минии, хаанай, үгые тэрэ дуулабагүй. Хуулиин ёһоор тэрээнтэй яаха ёһотойбиб? – гэжэ тэрэ асууба.

¹⁶ Хаанда болон бусад түшэмэлнүүдтэ Мэмухаан: – Баштии хатан хадаа ганса эзэн хаан танай урда бэшэ, Ахашвероош хаанай бүхы улас түрын түшэмэлнүүдэй, бүхы улад зоной урда буруу юумэ хээ.

¹⁷ Энэ хэрэг тушаа бүхы эхэнэрнүүд дуулаха аабза. Тиигээд үбгэеэ хүндэлэнгүй, «Ахашвероош хаанайшье Баштии хатанаа дуудахадань, тэрэнь ерээгүй һэм шуу» гэлдэн байхал.

¹⁸ Энээнһээ хойшо Перс, Мидиин уласай бүхы хатан абхайнууд Баштии хатанай хэһэн хэрэг тушаа дуулажа, ноён нүхэдтөө тиимэл аргаар хандажа эхилхэ. Энээнһээ боложо, олон зон өөһэд хоорондоо эбээ таһаран, бэе бэеэ доромжолжо эхилхэ. Хэрэг иигээд дууһахагүйнь лабтай.

¹⁹ Эзэн хаан, танай һанаанда таарамжатай һаань, иимэ зүбшэл хэлэхэ байнаб: Баштии Ахашвероош хаанай нюур хэзээшье бэшэ харахагүй гэһэн зарлиг буулгаад, энэ зарлигаа Перс, Мидиин уласай хуули ёһонуудта оруулха. Хэншье тэрэ хуули болюулжа шадахагүй болоно. Баштии хатанһаа үлүү һайхан эхэнэрые шэлэн абажа, хатан болгохо.

²⁰ Тиигээд хаанай тэрэ зарлигые энэ ехэ гүрэн түрөөр зарлан дуулгахада, ядуу, баяншье эхэнэрнүүд эрэ нүхэрөө хүндэлэн байдаг болохол, – гэжэ хэлэбэ.

²¹ Эдэ үгэнүүд хаанда болон түшэмэлнүүдтэ һайшаагдаба. Мэмухаанай хэлэһэнэй ёһоор, хаан хэрэг бүтээжэ,

²² улас түрынгөө бүхы аймаг нютагууд руу яһатан бүхэнэй хэлэн дээрэ бэшэг эльгээжэ, эрэ хүн гээшэ гэрэйнгээ эзэн байха ёһотой мүн гэһэн зар тунхаглаба.