Ерэмияа 9 - Библи

¹ Минии толгойн уһаар дүүрэн байгаа һаань, минии нюдэдэй нулимсын булаг болоо һаань, алагдаһан улад зонойнгоо хойноһоо үдэр, һүнигүй уйлаха һэм.

² Элһэн сүл губида аяншадай хонохо газар намда байгаа гээшэ һаань, өөрын арад түмэнөө орхижо, тэдэнһээ ошохо байгааб. Тэдэ бултадаа забхайрагшад, урбагшадай үүр гээшэл!

³ Татаһан һурша ном мэтэ худал хэлэтэйл тэдэ. Энэ газар нютагта худал үгэ үнэн сэхэһээ хүсэтэй болоо. «Минии арад муу муухай юумэ хойно хойноһоо үйлэдэнэ, Намайе Бурхан гэжэ тооногүй», – гээд Эзэн айладхана.

⁴ Хүн бүхэн хүршэһөө болгоомжолог, ямаршье аха дүүдээ бү этигэг. Юуб гэбэл, нэгэ ахань нүгөөдэеэ ула мүрөөрнь гүрдэнэ, хүршэнь нүгөө хүршэеэ худалаар хоблоно.

⁵ Хүн бүхэн хүршэеэ мэхэлжэ, үнэн сэхэеэ хэлэдэггүй, худал хэлэхэдээ һурамхи болонхой, нүгэл хэлгэдэ бүхы хүсэеэ зорюуланхай.

⁶ Харата һанаанай оршон соо ажаһуунат. Өөһэдөөшье угаа харатайт. Арад түмэнэйнь Өөрыень буруушааһан тухай Эзэн айладхаа.

⁷ Тиимэ ушарһаа Түмэн Сэрэгтэ Эзэн иигэжэ тунхаглаа: Түмэрэй шанар мэдэхын тула хайлуулжа шалгадаг гээшэл. Тэрээндэл адляар Өөрынгөө арадые шалгахам. Бэшэ ондоо арга үгы.

⁸ Тэдэнэй хэлэн – хорото годли, тэдэ хододоо худал хэлэдэг. Хэн нэгэн хүршэтэеэ һайнаар амаараа хөөрэлдэбэшье, дотороо урьха занга тэрээндэ бэлдэжэ байха юм.

⁹ Иимэ зүйлэйнь түлөө Би тэдэниие хэһээхэгүй юм гүб?! Иимэ арад түмэнһөө үһөөгөө абахагүй юм гүб?! Энэ болбол Би, Эзэн, айладхаа мүн!

¹⁰ Уула тухай уйлажа, ори дуун болохоб. Үргэн талын бэлшээринүүд тухай гашуудан бархирхаб. Тэдэ зэлүүд хооһон болоо, тэрээгүүр хэншье гарахагүй. Үхэр һүрэгэй мөөрэхэнь дуулданагүй, огторгойн шубууд, бүхы ан арьяатан зугадан тэрьедээ.

¹¹ Эзэн айладхана: «Иерусалимые һандарһан шулуун обоо, сүүбэн шонын үүр болгохоб. Иудын хотонуудые ажаһуугшадгүй хооһон болгохоб».

Юундэ энэ орон нютаг хооһорооб?

¹² Би асуубаб: «Эзэн, юундэ энэ орон нютаг хооһорооб? Хэнэйшье дээгүүрнь гарахын аргагүй болотороо юундэ тэрэ элһэн сүл губи мэтэ хооһорооб? Энээниие ойлгожо шадаха сэсэн мэргэн хүн хэн бэ? Энээниие соносхохо тухай хэндэ Та айладхаһан байнабта?»

¹³ Эзэн харюусаба: – Ушарынь гэхэдэ, тэрэ арад Минии зааһан хуулиие орхижо, үгыемни дуулабагүй, Минии айладхаһанай ёһоор үйлэ хэрэг ябуулбагүй.

¹⁴ Харин үсэрхэжэ, үбгэ эсэгэнэрэйнгээ һургаһанай ёһоор Баалда мүргэн-шүтэн байба.

¹⁵ Тиимэһээ Минии, Түмэн Сэрэгтэ Эзэнэй, Израилиин Бурханай, иимэ арадтай юу хэхые шагнагты: хараарайгты, хорлохын тула тэдэниие үрмэдэһөөр хооллулхаб, һүлһэтэй уһаар ундалуулхаб.

¹⁶ Би тэдэниие өөһэдыньшье, үбгэ эсэгэнэрэйньшье мэдээгүй үндэһэ яһатанай дунда тараахаб. Тэдэниие дууһан хюдатараа хойноһоонь сэрэг ябуулжал байхаб.

¹⁷ Түмэн Сэрэгтэ Эзэн иигэжэ айладхана: Һайса бодожо үзэгты! Тиигээд хүдөөлгэндэ уйлан дууладаг эхэнэрнүүдые дуудагты! Эрхим иимэ дуушадые ерүүлхээр хүниие эльгээгты.

¹⁸ Улад зон иигэжэ хэлэбэ: «Хүдөөлгэнэй гашуудалтай дуу бидэндэ дуулахаяа тэдэ яаралтай ерэг, нюдэнһөөмнай нулимсын дуһалтар, нюдэнһөө нёлбоһоной урасхал мэтэ урдатар дуулаг лэ».

¹⁹ Сионһоо ори дуун соностоно: «Аа, бидэнтэй сүйд болоо! Гутамшаг бузар юумэндэ орообди! Газар нютагаа орхихо баатай болообди, манай гэрнүүд һандаргагдаа».

²⁰ Би, Ерэмияа, хэлээ һэм: «Эхэнэрнүүд, Эзэнэй үгые шагнагты! Тэрэнэй айладхал анхарагты! Басагадаа шаналан гашуудаха ёһололдо, хүн бүхэнөө – гашуудалай дуунда һургагты.

²¹ Үхэл сонхоорнай дамжан ороно. Үйлсэнүүдһээ үхи хүүгэдые, хотын талмайнуудһаа эдир хүбүүдые усадхахын тула үхэл хатал ордонгууд руумнай орожо байна.

²² Зоной һэе хүүрнүүд задагай талмайнууд дээрэ шэбхэ мэтэ хэбтэхэ, таряа хадагшын һүүлээр хэнэйшье суглуулхагүй таряанай боолтонууд мэтэ. Эдэ үгэнүүдые минии соносхохые Эзэн захираа».

²³ Эзэн иигэжэ айладхана: Мэргэн хүн мэргэн ухаагаараа, хүсэ шадалтай хүн шадалаараа, баян хүн эд баялигаараа бү һайрхаг.

²⁴ Харин һайрхагша нэгэн Намайе газар дэлхэй дээрэ хайра энэрэл, хэрэг шүүбэрилгэ болон үнэн зүбые үйлэдэгшэ Эзэн мүн гэжэ ойлгодог, мэдэдэгээрээ һайрхаг лэ. Энээндэ Би дуратай байхалби. Энэ болбол Би, Эзэн, айладхана мүн!

^25-26 Эзэн иигэжэ тунхаглана: «Египедэй, Иудын, Эдоомой, Аммооной, Моһаабай болон элһэн сүл губида ажаһуудаг, һаншагайнгаа үһэ тайрадаг зониие Минии шүүбэрилхэ саг дүтэлжэ байна. Эдэнэр бэлгэеэ отолуулаагүй. Харин Израилиин улад зон бэлгэеэ отолуулһаншье һаа, энэ ёһололой далда удхые – Намтай хэлсээгээ сахиха гээшые дүүргээгүй».