Ерэмияа 7 - Библи

Ерэмияа Һүмын хажууда

^1-3 Иудын хан түрын улад зоной мүргэхэеэ ерэдэг Эзэнэй Һүмын хаалгын хажууда ошохыемни Эзэн намда захирба. Намайе тэндэ зогсоожо, Өөрынь, Израилиин Бурхан, Түмэн Сэрэгтэ Эзэнэй, иимэ үгэнүүдые соносхохыемни Тэрэ захираа: – Өөһэдынгөө ажабайдал болон үйлэ хэрэгүүдээ заларуулан заһагты, тиигэбэлтнай, Би таанадые эндээ саашадаашье ажаһуухыетнай зүбшөөхэб.

⁴ «Энэ болбол Эзэнэй үргөө, Эзэнэй үргөө, Эзэнэй үргөө» гэһэн дэмы найдуулһан хуурмаг үгэнүүдтэ бү этигэгты.

⁵ Хэрбээ ажабайдалаа болон үйлэ хэрэгүүдээ үнэхөөр заларуулан заһабалтнай, бэе бэедээ үнэн сэхээр хандадаг болоо һаатнай,

⁶ ерүүл хүниие, үншэн хэнзые, бэлбэһэн эхэнэрые харшалангүй, ямаршье гэм зэмэгүй хүниие энэ орон нютагта алангүй, гай тодхор асардаг ондоо бурхадта мүргэхэеэ болёо һаатнай,

⁷ үбгэ эсэгэнэртэтнай хэтэ мүнхэдөө Минии үршөөһэн энэ газарта, энэ орон нютагта таанадые саашадаашье ажаһуухыетнай үлөөхэб.

⁸ Үзөөрэйгты, таанад худал хуурмагта найдажа байнат, энээнһээ аша үрэ гарахагүй!

⁹ Таанад хулгай хэжэ, алажа, забхайржа, худалаар тангариглажа, Баалда үргэл үргэн, мэдэхэгүй ондоо бурхадта мүргэжэ байгаад,

¹⁰ энээнэй удаа ерэжэ, Минии нэрээр нэрлэгдэһэн энэ үргөө соо урдамни зогсоод, «Бидэ абарагдаабди!» гэжэ хэлэнэт. Тиигээд эдэ бүхы жэгшүүрилтэ зүйлнүүдые саашадаашье хэжэл байнат.

¹¹ Минии нэрээр нэрлэгдэдэг энэ үргөө, танай һанамжаар, дээрмэшэдэй үүр болоо юм гү? Үзөөрэйгты, Би бүхы юумэ хаража байнаб!

¹² Намайе хүндэлхэ газар болгон түрүүшээр Шилоодо шэлэһэн газартамни ошожо, арад түмэн Израилиимни муу муухай ябадалһаа боложо тэдээндэ юу хэһыемни харыт.

¹³ Би таанадта оло дахин хэлээ һэм, теэд таанад дуулаагүйт, Би таанадые дуудаа һэм, теэд харюусаагүйт. Мүнөө хадаа эдэ бүхы үйлэ хэрэгүүдэйтнай түлөө

¹⁴ таанадай найдадаг, Минии нэрээр нэрлэгдэдэг үргөөдэ болон таанадта, үбгэ эсэгэнэртэтнай үгэһэн газартаа Би Шилоодо хандаһантайдал адляар хандан, үйлэ хэрэг хэхэб!

¹⁵ Таанарай аха дүү болохо Эпрааимай бүхы үри һадаһадые гарган хаяһан шэгээрээ Би таанарые Өөрын хажууһаа гарган хаяхаб. Би, Эзэн, энээниие айладхана мүн!

Арад зон Эзэнэй мэдэлһээ гаранхай

¹⁶ – Ерэмияа, ши хадаа энэ арад түмэнэй түлөө бү зальбара, бү уйла, маани мэгзэм бү үргэ. Намайе бү гуй. Юуб гэхэдэ, Би шамайе дуулахагүйб.

¹⁷ Иудын хотонуудаар болон Иерусалимай үйлсэнүүдээр юу хэжэ байһыень ши харанагүй гүш?

¹⁸ Үхибүүдынь түлеэ суглуулжа, эсэгэнэрынь гал носоожо, эхэнэрнүүдынь Тэнгэриин хатанда бообо хэхын тула талха зуурана. Намайе гомдоохын тула тэдэ ондоо бурхадта сэржэм үргэнэ.

¹⁹ Теэд тэдэ Намайе гомдооно гү? Үгы! Тэдэ өөһэдыгөө бузарлан, өөһэдыгөө гомдохооно.

²⁰ Тиимэһээ Би, Эзэн Бурхан, Өөрынгөө бушаганама уур хилэнгые үргөөгэй оршодог энэ газар дээрэ, хүн ба адагуусан дээрэ, талын модод ба газарай үрэ жэмэс дээрэ буулгахам. Гал дүлэн носожо, хэншье тэрэниие унтараажа шадахагүй.

²¹ Израилиин Бурхан, Түмэн Сэрэгтэ Эзэн иигэжэ айладана: Израилиин арад түмэн, таанад түгэс шатаалта үргэл хэдэгта, тиихэдэ үшөө үлэһыень өөһэдөө эдихэдэ хамаагүй үргэл гэдэг байнат. Бултыеньшье эдиит!

²² Би таанадай үбгэ эсэгэнэрые Египедэй орон нютагһаа гаргахадаа, түгэс шатаалта үргэл тухай хэлээгүй, захираашьегүй бэлэйб.

²³ Гансал Минии үгэ дуулажа, Би тэдэнэй Бурхан, тэдэ Минии арад түмэн болохыень, тэдээндэ һайн байхын тула Минии захиһаар ажаһуухыень айладхан захираа һэм.

²⁴ Гэбэшье тэдэ Минии үгэ дуулаагүй, анхаралаа хандуулаагүй, харин үсэд, муу сэдьхэлэйнгээ табисуураар ажаһуужа, өөһэдыгөө хойшо татаба.

²⁵ Таанадай үбгэ эсэгэнэрэй Египедэй орон нютагһаа гараһан тэрэ үдэрһөө хойшо мүнөө хүрэтэр Би таанадта бүхы зарасанараа – лүндэншэдөө дахин-дахин эльгээжэл байгааб.

²⁶ Теэд таанад Минии үгэ дуулаагүйт, шэхээ табяагүйт, үсэрхэжэ, үбгэ эсэгэнэрһээ бүри муу болоот.

²⁷ Ерэмияа, эдэ бүхы үгэнүүдые шинии хэлээшье һааш, тэдэ шамайе шагнахагүй. Тэдэниие дуудаашье хадаш, тэдэ шамда харюусахагүй.

²⁸ Тиихэдэнь тэдээндэ «Энэ үндэһэн арад Эзэнэй, өөрынгөө Бурханай, үгэ дууланагүй, һургаал абанагүй. Үнэн зүб юумэн хосороо, тэдэнэй аманһаа бэшэ гарахагүй!» гэжэ хэлээрэй.

Бэн-Һинноомой хүндыдэ хэһэн нүгэл

²⁹ Иерусалимай улад зон, үһэеэ тайража хаяад, нюсэгэн добо толгой дээрэ гашуудан уйлагты. Юуб гэхэдэ, Би, Эзэн, энэ үе удамда уурлан хилэнтэжэ, голожо, орхибоб.

³⁰ Иудын улад зон Минии хараһаар байтар муу муухай юумэ үйлэдөө. Минии нэрээр нэрлэгдэдэг үргөө соо тэдэ өөһэдынгөө шүтөөнүүдые табиба. Тиигээд тэрэ үргөө бузарлагдаа.

³¹ Басагад, хүбүүдээ галда шатаахаяа Бэн-Һинноомой хүндыдэ Тоопэт гэжэ нэрэтэй мүргэлэй обоо зохёон тэдэ түхеэрбэ.

³² Үзөөрэйгты, Тоопэт бэшэ, Бэн-Һинноомой хүнды бэшэ, харин Хюдалгын хүнды гэжэ энэнь нэрлэгдэхэ үдэрнүүд ерэхэеэ байна. Тоопэдтэ хүдөөлүүлхэ газар дуталдажа эхилхэ.

³³ Эдэ зоной һэенүүд тэнгэриин шубууд болон газарай арьяатанай эдишэ болохо. Тэдэниие үргөөхэ хүн олдохогүй.

³⁴ Энэ газар ханха зайдан болохо. Иудын хотонуудаар болон Иерусалимай үйлсэнүүдээр зугаа нааданай, баяр баясхалангай абяа дууе, түрэ найрай жаргалтай абяа Би таһалдуулхаб!