Ерэмияа 42 - Библи

«Манай түлөө зальбарыт!»

¹ Тиихэдэ бүхы сэрэгэй ноёд Карээһаагай хүбүүн Ёханаантай, Һошаяагай хүбүүн Езааниятай хамта, бүхы улад зонтоёо

² намда ерэжэ, иигэжэ хэлэбэ: – Манай гуйһан гуйлтые дүүргыт! Манай түлөө, энэ үлөөшэ зоной түлөө Эзэн Бурхандамнай зальбарыт. Олон байһанаа үсөөн болообди, та өөрөө харана ха юмта даа.

³ Эзэн Бурхамнай манай дабшаха харгы зам харуулаг лэ, юу хэхыемнай заажа үгэг лэ.

⁴ Би харюусааб: – Би ойлгооб. Танай гуйһанай ёһоор, би Эзэн Бурхандаа зальбархаб. Айладхаһан юумыень нюунгүй бултыень таанадта хэлэжэ үгэхэб.

⁵ Тиихэдэм тэдэ намда иигэжэ хэлэбэ: – Эзэн Бурханайнгаа захиралтые дүүргээгүй һаамнай, Эзэн манай урдаһаа гэршэ болон байг лэ.

⁶ Муу, һайншье бидэндэ байгаа һаань, бидэ Эзэн Бурханайнгаа захиралтануудые сахин дүүргэхэбди. Тэрэнэй үгэ дуулаа һаамнай, бидэндэ һайн байхал.

Эзэнэй харюу

⁷ Арбан үдэрэй үнгэрһэнэй удаа Эзэн намда айладхал буулгаба.

⁸ Тиихэдэнь би Карээһаагай хүбүүн Ёханааниие, тэрээнтэй байгааша сэрэгэй бүхы ноёдые, бүхы зониие дуудабаб.

⁹ Би тэдээндэ иигэжэ хэлэбэб: Израилиин Эзэн Бурханда минии зальбархые таанад гуйгаа бэлэйт. Эзэн Бурхамнай иигэжэ айладхана:

¹⁰ – Энэ орон нютагта үлөө гээшэ һаатнай, Би таанадые суглуулхаб, һалгаахагүйб. Би таанадые һуурижуулхаб, татан гаргахагүйб. Таанадта ушаруулһан гай тодхор тухайгаа би харамсалнаб.

¹¹ Вавилооной хаанһаа бэшэ бү айгты. Би таанадтайб, тэрэнэй мэдэлһээ Би таанадые абархаб.

¹² Минии таанадта үршөөл хайраяа үзүүлхэдэ, тэрэ таанадые хайрлаха, орон нютаг руутнай бусахыетнай зүбшөөхэ. Энэ болбол Би, Эзэн, айладхана мүн!

^13-15 Теэд таанад, Иудын газар нютагта үлөөшэд, Эзэн Бурханайнгаа үгэнүүдтэ һөөргэдэжэ байха ёһогүйт. Таанад «Үгы, бидэ энэ газарта байхаяа һананагүйбди, дайн дажартай ушархагүйн тула, үлэсхэлэн хооһон байхагүйн тула Египедтэ байхабди» гэжэ хэлэхэ ёһогүйт. Иимэ юумэ хэлээ һаатнай, Түмэн Сэрэгтэ Эзэн, Израилиин Бурхан, иигэжэ айлдахаха: «Египет руу ошожо, ажаһуухаяа һанаа һаатнай,

¹⁶ танай айдаг дайн дажар танда хүрэхэ, айдаг үлэсхэлэн хооһон байдалтнай таанадые дахаха. Тиигээд таанад Египедтэ хосорхот.

¹⁷ Египет руу ошожо байха һанаатай зон бултадаа дайн дажарта гү, али туража, үгышье һаа, үбдэжэ үхэхэ, нэгэшье хүн амиды мэндэ үлэхэгүй, хэншье Минии татахаяа байгааша гай тодхорһоо зайлахагүй».

¹⁸ Израилиин Түмэн Сэрэгтэ Эзэн Бурхан иигэжэ айладхана: «Иерусалимай улад зондо Минии уур хилэнгэй адхарһандал адляар таанад дээрэ, Египет ошоо һаатнай, тиимэ Минии уур сухал таанад дээрэ адхарха. Та бүгэдэ үзэмжэгүй муухай юумэн ябахат, зон таанадые наада барижа, нэрыетнай хараалай орондо хэлэдэг болохо. Таанад энэ орон нютагаа бэшэ харахагүйт».

¹⁹ Би үргэлжэлүүлбэб: – Иудын орон нютагта үлөөшэ зон, таанадые Египет руу бү ошогты гэжэ Эзэн һэргылнэ. Би таанадта энээн тушаа хэлэжэ байна гээшэб.

²⁰ Эзэн Бурханаа таанадай түлөө гуйха тухайм намайе гуйгаа бэлэйт, Тэрэнэй захиралтые бултыень сахин дүүргэхэбди гэжэ хэлээ һэнта.

²¹ Минии мүнөө хэлэхэдэ, таанад Эзэн Бурханайнгаа үгэ дууланагүйт.

²² Тиимэл хадаа мэдэжэ байгты: ошохоёо һанаһан газартаа дайн дажарһаа, туража, үбшэлжэ таанад үхэхэт.