Ерэмияа 38 - Библи

Ерэмияа нүхэн руу хаягдаба

¹ Маттаанай хүбүүн Шэпаатияа, Пашхуурай хүбүүн Гэдаалияа, Шэлээмияагай хүбүүн Юкаал болон Малхияагай хүбүүн Пашхуур арад түмэндэ минии хэлэжэ байгаашые шагнаа һэн. Би Эзэнэй айладхал дамжуулан, иигэжэ хэлээб:

² «Хэн хото соо үлэнэб, тэрэ байлдаанда, үлэсхэлэн хооһон байдалһаа, мүн үбшэ хабшанһаа боложо үхэхэ. Харин Вавилооной сэрэгтэ бэеэ тушааһан хүн амиды мэндэ үлэхэ».

³ Эзэнэй иигэжэ айладхаашые тэдээндэ би мүн лэ дамжуулбаб: «Энэ хотые Вавилооной сэрэгтэ тушаахамни. Тэдэ хотые эзэмдэхэ».

⁴ Тиихэдэм түшэмэлнүүд хаанда ошожо, «Энэ хүн саазалуулагдаха ёһотой. Элдэб юумэ хэлэжэ, тэрэ сэрэгшэдэй зориг мохооно, һүр һүлдыень дарана. Хотын бүхы зондошье тэрэ иимэ юумэ хэлэнэл. Арад зондо туһа бэшэ, тушаа хэнэ гээшэ», – гэжэ дуулгаба.

⁵ Цэдэкиия хаан тэдээндэ: «Энэ урдатнай тэрэ байнал даа. Һанаһаараа тэрээнтэй юумэ хэгты, би таанадай урдаһаа юушье хэлэхэгүйб», – гэбэ.

⁶ Тэдэ намайе абажа, тайжа хүбүүн Маалхияагай газар дорохи нүхэн руу хаяба. Тэндэ ямаршье уһан үгы, гансал шабар һэн. Би тэрэ шабар руу хаюулагдаа һэм.

⁷ Харин тайган болохо эфиоп хүн Эбэдмээлэх (тэрэ хаанай ордон соо хүдэлдэг бэлэй) намайе нүхэн руу хаяһан тухай дуулаад, Бэньямиинэй Хаалгануудай дэргэдэ элдэб хэрэгүүдые шүүбэрилжэ байгааша хаанда дүтэлэн,

⁸ хаанда иигэжэ хэлэбэ:

⁹ – Үндэр түрэлтэ хаан! Эдэ зон буруу юумэ хээ. Тэдэ Ерэмияа лүндэншые нүхэ руу хаяа, тэрэ тэндэ туража үхэхэл, юуб гэбэл, хото соо эдеэ хоол дууһаа.

¹⁰ Тиихэдэнь хаан күшиит Эбэдмээлэхэй гурбан хүниие абажа ошоод, нүхэн сооһоо намайе гаргахые захирба.

¹¹ Эбэдмээлэх зонтой хамта ордоной абдар таһаг руу ошожо, хуушан хубсаһа тэндэһээ абаад, аргамжа тэдээнээр хэжэ, нам руу доошонь һанжуулба.

¹² Бэеыемни үрэхэгүйн тула һанги набта болоһон хубсаһа һуга доогуураа хэхыемни Эбэдмээлэх хэлээ. Би тиибэб.

¹³ Иигэжэ тэдэ олһоор намайе татан гаргажа, би досоо хашаа соо харууһан доро байдаг болоо һэм.

Цэдэкиия Ерэмияатай зүбшэнэ

¹⁴ Нэгэтэ Цэдэкиия хаан минии хойноһоо хүниие эльгээжэ, нангин үргөөгэй гурбадахи үүдэнэй хажууда асаруулба. Тиигээд хаан иигэжэ хэлэбэ: – Би шамда асуудал табихаб. Үнэн зүбөөр харюуса.

¹⁵ Би Цэдэкиияда хэлээ һэм: – Минии үнэн зүбые хэлэхэдэ, та намайе саазалхат. Зүбшэл заабари хэлээ һам, та намайе хайхархагүйт.

¹⁶ Тиихэдэм Цэдэкиия хаан нюусаар намда тангариглажа, «Бидэндэ ами наһа бэлэглэһэн Бурханаар тангаригланаб, би шамайе саазалхагүйб, алахаяа һанаашадташье үгэхэгүйб», – гэбэ.

¹⁷ Тиихэдэнь би Түмэн Сэрэгтэ Израилиин Бурханай иимэ айладхал Цэдэкиияда дуулгабаб: – Вавилооной сэрэгтэ бэеэ тушаагаа һаа, амиды мэндэ үлэхэт. Энэ хотошье галдагдахагүй. Таанад өөһэдөө, гэр бүлэнүүдтнайшье амиды үлэхэт.

¹⁸ Харин бэеэ тушаагаагүй һаатнай, энэ хото Вавилооной сэрэгтэ үгтэхэ, тэдэ хотые дууһан галдаха, таанадшье тэндэһээ тэрьедэжэ шадахагүйт.

¹⁹ Цэдэкиия хаан намда иигэжэ хэлэбэ: – Вавилооной тала барин ошоһон манай зонһоо айдаһам хүрэнэ. Би тэдэнэй гарта ороо һаа, үхэтэрөө зобоолгохолби.

²⁰ Би тэрээндэ: – Та тэдэнэй гарта орохогүйт. Эзэнэй айладхал дуулахыетнай гуйнаб. Тиихэдэ бүхы юумэн танда таатай, аятай болохо, амиды мэндэ үлэхэт.

²¹ Харин бэеэ тушаахаяа арсаа һаатнай, юун болохо байһые Эзэн намда харуулаа.

²² Тэрэ үзэгдэл соогоо би Иудын хаанай ордон соо орхигдоһон эхэнэрнүүдые хараа һэм. Тэдэ эхэнэрнүүд Вавилооной сэрэгэй ахамадуудта абаашагдаха. Тэдэ эхэнэрнүүд хаанай нүхэд өөрыень мэхэлбэ, тэдэ хааниие буруушаана. Хүлэйнь шабар шабхада ороходо, нүхэдынь

²³ бүхы эхэнэрнүүдтнай болон үхи хүүгэдтнай Вавилооной зоной мэдэлдэ орохо, та өөрөө Вавилооной хаанай баряанда орохот. Энэ хото дууһан галдагдаха.

²⁴ Цэдэкиия иигэжэ намда хэлээ һэн: – Хэндэшье энэ хөөрэлдөөн тухай бү хэлээрэй. Тиигэбэл, амиды мэндэ байхаш.

²⁵ Тушаалтадай минии шамтай хөөрэлдэһэн тухай дуулаад, шамда ерэжэ, юун тухай хөөрэлдэһэн тушаамнай асуугаа һаань, «алахагүйбди шамайе» гэжэ хэлээ хадань,

²⁶ намайе һөөргэнь Ёнатаанай шорон болоһон гэртэ бү эльгээгыт гэжэ гуйһан тухаймни дуулгаарай.

²⁷ Тушаалта зоной намда ерэжэ, намайе һурагшалхадань, би тэдээндэ хаанай хэлэхыемни зааһан үгэнүүдые хэлэбэб. Тэдэ нюусаар хөөрэлдөөемнай шагнажа шадаагүй һэн тула юушье хэлэнгүй, абяагүй гаража ошоо һэн.

²⁸ Иигэжэ Иерусалимай эзэлэгдэн абтатар би хаанай ордоной досоо хашаанууд соо баригдан байгаа бэлэйб.