Ерэмияа 33 - Библи

Эзэнэй найдуулга

¹ Минии үшөө түрмэдэ, досоохи хашаа соо байха үедэ Эзэнэй үгэ дахин намда хүрэжэ ерэбэ.

² Газар дэлхэйе түхөөһэн, байгуулһан, һуурижуулһан Эзэн намтай хөөрэлдөө. Эзэн иигэжэ айладхаа:

³ – Намайе дуудыш, тиихэдэш шамда харюусахаб. Шинии мэдэхэгүй агууехэ, гайхамшаг зүйлнүүдые харуулхаб.

⁴ Би, Израилиин Эзэн Бурхан, Иерусалимай болон Иудын хаанай ордон бүһэлэгдэн, добтолгодо ороод, һандаргагдаха гээд айладханаб.

⁵ Минии уур сухал дундаа усадхахаяа һанаһан зоной үхэһэн бэенүүдээр байшангуудые дүүргэһэн Вавилооной сэрэгтэй заримашуул тэмсэхэ. Хотын зоной муу муухай үйлэ хэрэгүүдһээ боложо, Би энэ хотоһоо буруу хараа бэлэйб.

⁶ Теэд Би энэ хотые болон ажаһуугшадыень аргалхаб, элүүр энхэ болгохоб. Амар амгалан байдал, аюулгүй байдал тэдээндэ үршөөхэб.

⁷ Иудын болон Израилиин зониие баряанһаа бусаажа, хэрэгүүдыень амжалтатай болгохоб, хуушанайхидань адляар һуурижуулхаб.

⁸ Минии урда хэһэн нүгэл шэбэлһээнь арюудхан, гэм зэмыень, Минии урдаһаа буһалгаалһыень хүлисэхэб.

⁹ Иерусалим хадаа баярай, нэрэ хүндын һүлдэ боложо, Би тэрэнээр омогорхон байхаб. Иерусалимай түлөө Минии хэһэн һайн һайхан хэрэгүүд тушаа, энэ хотодо үршөөһэн Минии хэрэгүүд тухай дэлхэйн үндэһэ яһатан бүхэн дуулажа, айха, шэшэрхэ.

¹⁰ Эзэн иигэжэ айладхана: – Энэ газар дайда эзэгүй хооһон, ямаршье амитан тэндэ байдаггүй гэжэ зон хэлсэнэ. Тэдэнэй зүб: Иудын хан түрын болон Иерусалимай үйлсэнүүд хооһон, тэндэ хэншье үгы. Гэбэшье энэ газарта таанад дахин

¹¹ баяр, хүхилдөөнэй, түрэ хуримай абяануудые соносохот. Зоной дуу дуулахые шагнахат. Тэдэ хадаа баяр баясхалан хүргэн, Минии Һүмэ соо үргэл хэхэ. Тэдэ иигэжэ хэлэн байхал: «Түмэн Сэрэгтэ Эзэндэ баясхалан хүргыт. Тэрэ хадаа угаа һайн. Тэрэнэй үршөөл хайра мүнхэ». Би энэ орон нютагые урданайхидань адли амжалта түгэс болгохоб. Энэ болбол Би, Эзэн, айладхана мүн!

¹² Түмэн Сэрэгтэ Эзэн иигэжэ айладхана: – Энэ элһэн сүл губидал адли газарта бэлшээриин газарнууд, малшадай гэрнүүд бии болохо.

¹³ Уулархаг нютагташье, нюруу газарташье, Иудын урда хан түрэдэшье, Бэньямиинэй газар дайдада, Иерусалимые тойроод байһан хүдөө нютагуудааршье, Иудын хан түрын хотонуудааршье хонишод хонидоо тоолохол байха. Энэ болбол Би, Эзэн, айладхана мүн!

¹⁴ Эзэн иигэжэ айладхал буулгаба: – Израилиин болон Иудын хан түрын улад зондо найдуулан хэлэһэн үгэнүүдээ бэелүүлхэ сагни дүтэлөө.

¹⁵ Тэрэ үедэ Би Давидай уг удамые хаан шэрээдэ һуулгахаб. Тэрэ үнэн зүбөөр хэрэгүүдые бүхы газар дэлхэйгээр эрхилхэ.

¹⁶ Тэрэ сагта Иудын хан түрын улад зон абарагдаха, Иерусалимай зон ажана амгалан амидарха. Тэрэниие «Эзэн – Манай Үнэн Зүб» гээд нэрлэхэ.

¹⁷ Давидай үри һадаһан хододоо Израилиин хаан шэрээ эзэлдэг байха гээд Би, Эзэн, найдуулнаб.

¹⁸ Левит санаартад хододоо Намда алба хэжэ байха, түгэс шатаалта үргэл үргэдэг байха.

¹⁹ Эзэн намда айладхана:

²⁰ – Үдэр, һүни тухай Би зарлиг гаргааб, тэдэ саг соогоо ерэдэг байха. Зарлиг хэзээдэшье хазагайруулагдахагүй.

²¹ Тон тиимэ хэлсээ Өөрын албатан Давидтай баталааб, тэрэ хаан болохо уг удамтай хододоо байха. Левит санаартадтай тон тиимэ хэлсээ баталааб, тэдэ Намда алба хэдэг байха. Эдэ хэлсээнүүд хэзээдэшье эбдэгдэхэ ёһогүй.

²² Огторгойн одо мүшэдые гү, али далайн эрьеын элһэ тооложо барахагүйдэл адли олон Давидай уг удамые, мүн левит санаартадые болгохоб.

²³ Эзэн намда айладхаба:

²⁴ – Израиль болон Иудын хан түрые шэлэһэн аад, Минии тэдэниие буруушааһан тухай зоной хэлсэжэ байһые ойлгоо гүт? Тэдэ Минии арад түмэн руу дээрэлхыгээр хаража, үндэһэ яһатан байна гэжэ тооногүй.

²⁵ Теэд Би үдэр, һүнитэй хэлсээ баталанхайб, газар дэлхэй, тэнгэри тухай хуули ёһонуудые Би зохёогооб.

²⁶ Эдэ бүгэдые хэһэн хадаа Би Яковай уг унгитай ба Минии албатан болохо Давидтай хэлсээгээ бэелүүлхэб. Абраһаамай, Исаак гэгшын, Яковай уг удамуудые хүтэлбэрилхэ Давидай нэгэ үри һадаһые Би шэлэхэб. Өөрынгөө арад зондо энэрэл хайраяа үзүүлхэб, амжалта туйлуулхаб.