Ерэмияа 30 - Библи

Израилиин Бурханай арад түмэндөө найдуулга

¹ Израилиин Эзэн Бурхан намда иигэжэ айладхаба:

² – Минии үгэнүүдые бултыень номдо бэшэ.

³ Юуб гэхэдэ, Өөрынгөө арадые, Израиль болон Иудын хан түрые һэргээн бодхоохо сагни дүтэлжэ байна. Элинсэг хулинсагтань үгэһэн газарта тэдэниие бусаан асархаб, тиихэдэм тэдэ тэрэ газар дайдые дахин эзэмдэн ажаһууха. Энэ болбол Би, Эзэн, тунхаглана мүн!

⁴ Израиль болон Иудын хан түрын зондо Эзэн иигэжэ айладхажа байна:

⁵ Угаа һүрдэһэн дуу Би дууланаб, амгалан тайбанай бэшэ, айһанай абяа дуу.

⁶ Асуугты, бодоод үзэгты: эрэ хүн үхибүү түрэжэ шадаха гү? Теэд үхибүү түрэжэ байһан эхэнэртэл, эрэ хүн бүхэнэй гараа гэдэһэн дээрээ хээд байхые юундэ Би харанабиб? Юундэ бултанайнь шарайнууд сухигар бэ?

⁷ Оёо! Тэрэ угаа муу үдэр дүтэлжэ байна. Тэрээндэ адли үдэр үзэгдөөгүй. Энэ болбол Минии улад зоной зоболонгой үе саг, теэд тэдэ амиды мэндэ гарасалдаха.

⁸ Түмэн Сэрэгтэ Эзэн айладхана: Тэрэ дүтэлжэ байгаа үдэр Би тэдэнэй хүзүүн дээрэхи хөөмэгшые эбдэхэб, гэнжыень таһалхаб. Тиихэдэм тэдэ хариин зоной богоол болохоёо болихо.

⁹ Харин Намда, Өөрынгөө Эзэн Бурханда, мүн Минии хан шэрээдэ һуулгаһан Давидай уг удамда тэдэ алба хэжэ эхилхэл.

¹⁰ Минии зараса Яков, бү ай, Израилиин зон, бү һүрдэ. Баряанда байһан холын нютагһаатнай Би таанадые абархаб. Таанад гэртээ бусажа, амар амгалан ажаһуухат. Таанадые хэншье айлгахагүй.

¹¹ Би таанадтай байхаб, абархаб. Таанарые арадуудай хоорондо тараагаа һэм, тэдэ арадуудые Би усадхахаб. Гэбэшье таанадые усадхахагүйб. Харин таанадые хэһээнгүй орхихогүйб, теэд хэһээхэдээ, үнэн зүбөөр хэһээлтэ амасуулхаб! Энэ болбол Би, Эзэн, айладхана мүн!

¹² Эзэн арад зондоо иигэжэ айладхана: Шархатнай эдэгэшэгүй, гэмтэһэнтнай угаа хүндэ.

¹³ Таанад тушаа һанаа зобохо хүн үгы, ярыетнай эмшэлхэ арга үгы, эдэгэхэ ямаршье найдал байхагүй.

¹⁴ Бүхы амарагуудтнай таниие мартаа, бэшэ таанадые хэрэгсээхэеэ болёо. Дайсанай сохилтоор, шэрүүн хэһээлтээр таанадые дайрааб, юуб гэбэл, гэм зэмэтнай угаа ехэ. Нүгэлтнай тоолошогүй олон.

¹⁵ Гэмтэһэн тухайгаа бэшэ бү гомдол баригты, үбшэнтнай эдэгэшэгүй. Гэм зэмэтнай угаа ехэ, нүгэлтнай тоолошогүй олон, тиимэһээл Би таанадые хэһээгээб.

¹⁶ Теэд мүнөө таанадые залгигша бүхэн өөрөө залгюулха, дайсадтнай өөһэдөө баряанда орохо, таниие тоногшод өөһэдөө тонуулха, танһаа олзо буляан абагшад өөһэдөө олзолуулагдаха!

¹⁷ Дайсадтнай таниие «Сион – хэндэшье хэрэггүй, хэншье тэрэниие анхархагүй» гээд хэлээ. Теэд Би танда тэнхээ үгэхэб, шархыетнай эдэгээхэб. Энэ болбол Би, Эзэн, айладхана мүн!

¹⁸ Эзэн айладхана: Яковай майхангуудые һайн һайханаар һэргээн бодхоохоб, гэр бүлэ бүхэниие хайрлахаб, Иерусалим дахин һэргэхэ, ордон урдынхидал адляар бодохо!

¹⁹ Тэндэ ажаһуугшад магтаал дуулаха, баясан-сэнгэн хашхаралдаха. Минии үршөөхэдэ, тэдэ олошорхо. Минии дээгүүр үргэхэдэ, тэдэ доромжолуулхаяа болихо.

²⁰ Тэдэнэй урданай хүсэ шадал һэргэхэ, тэдэ Минии урда дахин шанга болохо. Дарлагшадыень хэһээхэб!

²¹ Ударидагшань – тэдэнэй нэгэн, захирагшань – өөһэд дундаһаань тодорхо. Минии тэдэниие урихада, тэдэ дүтэлэн ерэхэ. Урилгагүйгөөр Нам руу дүтэлхэеэ зүрхэсэхэ хэн байхаб даа?

²² Тэдэ Минии арад түмэн. Би тэдэнэй Бурхан болохоб. Энэ болбол Би, Эзэн, тунхаглана мүн!

²³ Үзөөрэйгты, Эзэнэй уур хилэн – шуурган, аймшагтай бордоһон! Тэрэ муу зоной толгой дээрэ бууха.

²⁴ Тэрэнэй һанаһанаа бэелүүлээгүйдэ уур хилэнгынь буурахагүй. Ерээдүй сагта зон эдэ бүгэдые ойлгохо.