Эхин 9 - Библи

Бурхан Нойтой хэлсээ батална

¹ Бурхан Нойе ба хүбүүдыень үреэбэ: – Үри хүүгэдээр үнэр үдхэн боложо, энэ дэлхэйе хүн амитадаар дүүргэгты.

² Газар дайдын бүхы ан амитад, тэнгэриин жэгүүртэд, далайн загаһад хүн таанадһаа айжа һүрдэжэ байг: эдэнэр булта танай захирал мэдэлдэ үгтэнэ.

³ Урда тээнь ногоо ургамал таанадта үгэһэн мэтээр бүхы хүдэлэгшэ амитадые таанадта эдеэ хоол болгон үргэнэб.

⁴ Зүгөөр хорюултай нэгэл юумэн байха: шуһатай мяха бү эдигты. Энээниие хориноб, юундэб гэхэдэ, амитанай амин гээшэ шуһан соонь оршодог.

⁵ Харин хүнэй ами наһа таһалдуулһанай түлөө Би шуһа адхагшые – арьяатаншье байг, аха дүүгээ хорооһон хүншье байг, хатуугаар хэһээхэб.

⁶ Хэрбээ хэн нэгэн хүниие алаа һаа, өөрөө алуулха. Юундэб гэхэдэ, хүн гээшэ Минии, Бурханай, түһөөгөөр бии болгогдоо.

⁷ Олошорон, үнэржэн ябагты, түби дэлхэйе эзэмдэн ажаһуухатнай болтогой!

⁸ Бурхан Нойдо, тэрэнэй хүбүүдтэ айладхаба:

⁹ – Би таанадтай болон таанадай үри һадаһадтай хэлсээ баталнаб.

¹⁰ Мүн баһа ханза-онгосо сооһоо гараһан хамаг амитадтай: шубуудтай, адууһа мал, ан арьяатадтай – түби дэлхэйн бүхы амитадтай хэлсээ баталнаб.

¹¹ Соносогты: энээнһээ сааша үерэй уһан болбол ажамидаралые үрэбхихэгүй, энээнһээ сааша уһан галаб газар дэлхэйе хохидоохогүй.

¹² Минии таанадтай мүн бүхы амитадтай хэтэ мүнхын хэлсээнэй һүлдэ тэмдэг иимэ байха:

¹³ үүлэд соо Өөрынгөө номо-һолонго үлгэбэб. Энэ болбол газар дэлхэйн амитадтай Минии баталһан хэлсээнэй гэршэ тэмдэг.

¹⁴ Газар дээгүүр үүлэдые бөөгнэрүүлэн суглуулхадам, дундуурнь һолонго толорхо.

¹⁵ Тиихэдэнь Би таанадтай ба хамаг амитадтай баталһан Өөрынгөө хэлсээн тушаа һанахаб – амитан олониие хосороогшо асари үер дахин тохёолдохогүй.

¹⁶ Үүлэн соогуур һолонгын толорхые харахадаа, түби дэлхэйдэ ажамидарагшадтай хэһэн Өөрынгөө хэтэ мүнхын хэлсээе һанахаб.

¹⁷ Энэ болбол түби дэлхэй дээр ажамидарагшадтай Минии баталһан хэлсээнэй гэршэ тэмдэг мүн.

Нойн хүбүүн Хаамай нүгэл

¹⁸ Ханза-онгосо сооһоо гараһан Нойн хүбүүд гэбэл, Шээм, Хаам ба Яапэт. Хаамынь хожом Ханаһаан гэдэг хүбүүтэй болоо һэн.

¹⁹ Нойн эдэ гурбан хүбүүдһээ түби дэлхэйн хүн түрэлтэн үнэржэһэн юм.

²⁰ Ной газар элдүүрилжэ, үзэм модоной сэсэрлиг таряад,

²¹ нэгэн удаа үзэмэй дараһан архи уужа, һогтоһондоо хубсаһаа тайлажа хаяад, гэртээ нюсэгэн унтажа байгаа ха.

²² Ханаһаанай эсэгэ болохо Хаам нюсэгэн эсэгэеэ хараад, аханартаа дуулгаба.

²³ Тиихэдэнь Шээм Яапэт хоёр нэмэргэнүүдые хэдэрээд, ара нюргаараа майхан руу ороод, эсэгынгээ нюсэгэн бэедэ нэмэргэ хаяба. Тэдэнэр хажуу тээшээ зорюута хаража, эсэгынгээ нюсэгые обёороогүй һэн.

²⁴ Ной тэлэрхэдээ, бага хүбүүн Хаамайнгаа юу хэһые мэдэжэ,

²⁵ иигэжэ хэлэбэ: – Хаам, шинии хүбүүн Ханаһаанай уг удам хараалда хүртэбэ! Тэдэ Шээм, Яапэдай үри һадаһадай богоол болохо!

²⁶ Шээм, Эзэн Бурхан шамайе үреэхэнь болтогой! Ханаһаанай бүхы уг удам шинии үри һадаһадай богоол болохо.

²⁷ Бурханай хүсөөр Яапэдэй уг удам үнэр үдхэн боложо, Шээмэй үри һадаһадтай хамта нэгэн амин бүлэ болон амидаржа, Хаамай хүбүүн Ханаһаанай үриие богоолшолхо.

²⁸ Галаб эрьеһэнэй һүүлээр Ной үшөө гурбан зуун табин жэл ажаһуугаа.

²⁹ Юһэн зуун табин наһатайдаа тэрэ наһа бараа һэн.