Эхин 8 - Библи

¹ Тиигээд Бурхан Ной тухай, тэрээнтэй суг ханза-онгосо соо ябаһан амитадые һанаандаа оруулжа, һалхи үлеэлгэхэдэнь, үерэй уһан татажа эхилбэ.

² Тиигээд Эзэн газарай гүнһөө гарагша уһа шэргээбэ, огторгойһоо адхарһан бороое тогтообо.

³ Зуун табин үдэрэй туршада үерэй уһан бага багаар шэргэбэ.

⁴ Долоодохи һарын арбан долооной үдэр ханза-онгосо Арараат уула дээрэ газардан тогтобо.

⁵ Үерэй уһан аалиханаар татажа, арбадахи һарын нэгэндэ зарим хада уулануудай орой харагдаба.

⁶ Тэрээнһээ хойшо дүшэн хоногой үнгэрһэнэй удаа Ной ханза-онгосынгоо сонхо нээгээд,

⁷ хирээе газаашань табиба. Уһанай тататар хирээ ойро тойронгоор ниидэжэ байба.

⁸ Үер дүүрэбэ гү гэжэ мэдэхэеэ Ной гулабхаа шубуу газаашань табиба.

⁹ Зүгөөр гулабхаа һууха хуурай газар олонгүй бусажа, Ной сонхоор гараа һарбайн, досоошонь оруулба. Газарай нюруу үшөөл уһан доро байба.

¹⁰ Долоо хоноһоной һүүлээр Ной гулабхаагаа дахин газаашань табиба.

¹¹ Тэрэнь үдэшэлэн бусахадаа, хушуундаа олива модоной нарай набша зуугаад ерэбэ. Тиихэдэнь Ной уһанай татаһые ойлгобо.

¹² Тэрэ үшөө долоон хоног хүлеэгөөд, дахин гулабхаагаа табиба, тэрэнь һөөргөө бусабагүй.

¹³ Тэрэ жэлэй нэгэдэхи һарын нэгэндэ, Нойн зургаан зуун нэгэ наһатай болохо үедэ үерэй ехэ уһан одоошье шэргэбэ. Ной ханза-онгосын хушалта нээгээд харахадаа, газарай хуурай боложо байһые обёорбо.

¹⁴ Хоёрдохи һарын хорин долооной үдэр газарай хүрьһэн дууһан хатаба.

¹⁵ Бурхан Нойдо айладхаба:

¹⁶ – Мүнөө һамгантаяа, хүбүүдтэеэ, бэреэдтэеэ ханза-онгосоһоо гарахадаш болохо.

¹⁷ Мүн хамаг амитадые – гэрэй, зэрлигшье амитадые, мүлхин амидарагшадые, жэгүүртэниие сүлөөдэ таби. Иигэжэ тэдэ үдэжэ, хаа-хаанагүй таран олошорог.

¹⁸ Иигэжэ Ной һамгантаяа, хүбүүдтэеэ, бэреэдтэеэ хамта ханза-онгосоһоо гаража,

¹⁹ янза бүриин амитадые, мүлхигшэдые, шубуудые түрэл түрэлөөрнь сүлөөдэ табиба.

Бүхы амитадтай Эзэнэй баталһан хэлсээн

²⁰ Ной Эзэндэ үргэл үргэхэ шэрээ бүтээгөөд, янза бүриин сээргүй амитад болон шубуудһаа нэгэ нэгые шэлэжэ, амиинь таһалан, түгэс шатаалта үргэл болгон шатааба.

²¹ Эзэндэ энэ үнэр ехэ һайшаагдажа, Тэрэ иигэжэ шиидэбэ: – Саашадаа Би хүнэй түрэлхиин муу шанар, хара һанаанда голхорон, хүрьһэтэ газарта хараал шэнгээхэеэ болёоб. Дахин Би хэзээшье амиды амитадые иимэ аргаар усадхахагүйб.

²² Түби дэлхэйн байгаа сагта хододоо үрэһэ тариха, ургаса хуряаха уларил, үбэлэй хүйтэн, зунай халуун, үдэр, һүнинүүд таһарангүй байг лэ.