Эхин 40 - Библи

Иосиф шорондо

¹ Иосифой түрмэдэ ороһоной удаа нэгэ хэды сагай үнгэрөөд байхада Египедэй хаанай ахалагша манзашан, үзэмэй дараһан архи аягалагшан хоёр эзэн хаанайнгаа урда зэмэтэй болобо.

² Фараон өөрынгөө эдэ хоёр түшэмэлдэ уурлан,

³ тэдэниие Иосифой һууһан түрмэ шороной ноёдто тушаажа, тэрэ шорон руу хаяхыень захирба.

⁴ Тиихэдэнь шороной дарга тэдэниие Иосифой гарта дамжуулжа, хаража байхыень даалгаба ха. Тэдэ хоёр түшэмэл түрмэдэ удаан сагта һуухадаа

⁵ нэгэтэ һүни, нэгэн доро тус тустаа һонин зүүдэ зүүдэлбэд.

⁶ Иосифой үглөөгүүр тэдээндэ ерэхэдэ, тэдэ хоёр ехэл сэдьхэлээ хүдэлгэһэн янзатайнууд байба.

⁷ – Ямар юумэнһээ һанаагаа зобобот? – гэжэ Иосиф асууба.

⁸ – Бидэ хоёр зүүдэ хараабди, зүгөөр удхыень тайлбарилха хүн эндэ үгы, – гэжэ тэдэ харюусаба. – Бурханһаа ондоо хэншье зүүдэнэй удха зүб тайлбарилжа шадахагүй. Намда зүүдээ хөөрэжэ үгыт, – гэбэ Иосиф.

⁹ Тиигээд хаанай ахалагша үзэмэй дараһан архи аягалагшан зүүдээ хөөрэбэ: – Минии урда үзэмэй модоной һөөг ургажа байна гэжэ зүүдэлээб.

¹⁰ Тэрэ һөөг гурбан һалаатай. Тиигээд тэрэмни гэнтэ һалбаржа эхилбэ, сэсэглэбэ, тиигээд сэсэгэй һуурида жэмэс эдеэшэбэ.

¹¹ Гартамни фараоной хундага байһан ушарһаа би тэрэ үзэмэй шүүһые шахажа, архи болгоод, хундага руу юулээд, түргөөр гартань барюулааб.

¹² – Зүүдэнэйтнай тайлбари иимэ, – гэжэ Иосиф хэлэбэ. – Гурбан һалаа гурбан хоног гээшэ.

¹³ Гурба хоноод байхада фараон таниие дахин дээшэнь үргэхэ, анхан эзэлжэ байһан тушаалдатнай бусааха, урданайхидаал мэтэ тэрээндээ хундага баридаг болохот.

¹⁴ Зүгөөр та бүхы юумэнэйнгээ һайжархада, нам тухай һанаарайт. Намда үршөөл хайраяа үзүүлжэ, фараондо нам тухай хэлэжэ, энэ түрмэһөө сүлөөлхэ арга хыт даа.

¹⁵ Үнэн дээрээ би ямаршье гэм хээгүй аад, өөрын еврей орон нютагһаа хүсөөр гаргагдажа, тэрээнһээ доройтон энэ харанхы нүхэн руу хаягдааб!

¹⁶ Египедэй фараоной ахалагша манзашан нүгөө түшэмэлэй зүүдэ ехэ һайнаар тайлбарилаа гэжэ һанаад, Иосифто хандаба: – Минии зүүдэнэй удха тайлбарилжа үгыт. Би толгой дээрээ хилээмэнэй гурбан дабхар түрсүүг табяад зогсожо байнаб гэжэ зүүдэлээб.

¹⁷ Тон дээрэхи түрсүүг соо фараондо гэжэ бариһан элдэб хилээмэнэй зүйл, тиигээд тэрэниие шубууд тоншоно гэжэ зүүдэ харааб.

¹⁸ – Танай зүүдэнэй тайлбари иимэ, – гэбэ Иосиф. – Гурбан түрсүүг – энэ гурбан үдэр гээшэ.

¹⁹ Гурба хоноод байхада Египедэй хаан таниие түрмэһөө гаргажа, толгойетнай таһа сабшаад, бэеыетнай модондо үлгэхэ. Тиигээд шубууд үхэһэн бэеыетнай тоншожо эдихэ.

²⁰ Гурба хоноод, Египедэй хаанай түрэһэн үдэр боложо, тэрэ бүхы түшэмэлнүүдээ суглуулан, найр наада түхеэрбэ. Тэрэ үдэртөө эзэн хаан ахалагша манзашан болон үзэмэй дараһан архи аягалагшан тухайгаа һанажа, шоронһоо гаргуулан, олоной урда ерүүлээд,

²¹ ахалагша архи аягалагшаниие урид эзэлжэ байгаа тушаалдань бусаажа, тэрэ хаандаа дахин хундага баридаг хүн болобо.

²² Харин ахамад манзашаниие үлгэбэ. Иигэжэ бүгэдэ Иосифой хэлэгшэ, таагшаар болобо.

²³ Египедэй хаанай ахамад архи аягалагша түрмэһөө гараһан болобошье, Иосиф тушаа огто мартажархёо бэлэй.