Египедһээ гаралга 9 - Библи

Табадахи хэһээлтэ: малай тахал

¹ Эзэн Моисейдэ айладаба: – Фараондо ошоод иигэжэ хэлэ: Еврейнүүдэй Эзэн Бурхан: «Намда үргэл хэхыень Минии арадые табииш!

² Табяагүй, барижа байгаа һааш,

³ хүдөө байгаа бүхы малдаш – моридтош, элжэгэ тэмээнүүдтэш, сар үхэртэш, хони ямаандаш – Эзэнэй хүндэ гар бууха, аймшагтай үхэл тахал эхилхэ!

⁴ Харин Египедэй зоной малда шэнгеэр бэшэ, Израильшуудай малда Эзэн ондоогоор хандаха: нэгэшье малынь үхэхэгүй», – гэжэ айладана.

⁵ Тиигээд энэ орон нютагта энэ үйлэ үглөө болохо гэжэ Эзэн саг гаргаба.

⁶ Үглөөдэр үглөөнь Эзэн амалһанаа бүтээжэ, Египедэй зоной малыень хуу үхүүлбэ. Харин израильшуудай мал яабашьегүй.

⁷ Фараон хүниие мэдэхыень эльгээбэ, тиихэдэнь, нээрээшье, Израилиин улад зоной нэгэшье мал гарза болоогүй байба. Гэбэшье үсэдөө алдабагүй, тэдэниие табибагүй.

Зургаадахи хэһээлтэ: яра эдеэрэтэй шарха

⁸ Эзэн Моисей Аһароон хоёрто айладаба: – Зуухаһаа дүүрэн адха үнэһэ абаад, фараоной хараһаар байтар тэнгэри өөдэ Моисей хаяг.

⁹ Тиихэдэнь тэрэ үнэһэн Египедтэ тооһон болон орьёлжо, хүнүүдэй, мал амитанай бэедэ яра шарха гараха.

¹⁰ Тэдэ зуухаһаа үнэһэ абажа, фараоной хажууда ошобо. Моисей үнэһэ тэнгэри өөдэ сасаба. Тиихэдэнь хүнүүдэй, мал амитанай бэедэнь яра эдеэрэтэй шарха гаража эхилбэ.

¹¹ Фараоной эльбэшэд Моисейтэй мүрысэжэ шадахаяа болибо: тэдэнэй, Египедэй бүхы зоной бэедэ яра шарха бии болобо.

¹² Гэбэшье Эзэн фараоной үсэдые хүдэлгэжэ, тэрэ үгэ дуулабагүй. Моисейдэ Эзэнэй урид айладаһаарнь лэ болобо.

Долоодохи хэһээлтэ: шанга аадар мүндэр

¹³ Эзэн Моисейдэ зарлиг болобо: – Үглөөдэр үглөөгүүр эртэ бодожо, фараондо ошоод иигэжэ хэлэхэш: Эзэн, еврейнүүдэй Бурхан, иигэжэ айладана: «Намда зорюулһан үргэл тахилаа бүтээхыень Минии угсаата арадые табииш!

¹⁴ Энэ удаа бүришье аймшагтай хэһээлтэ шамда, түшэмэлнүүдтэш, бүхы арад зондош амасуулхам. Намтай тэнсэхэ хэншье дэлхэй дээрэ үгы гэжэ шинии мэдэхын тулада!

¹⁵ Хүсэтэ гараа далайжа, шамда ба шинии албатан арадта тарбаган тахал халдахаагаа һаам, газарай нюрууһаа үгы болохо һэнта.

¹⁶ Гэбэшье Өөрын хүсэ шадал шамда харуулжа, Өөрын нэрэ соло бүхы дэлхэйгээр суурхуулхын тула Би шамайе амиды үлөөнэб.

¹⁷ Мүнөө болотороо Минии арадта бэрхэшээл ушаруулан, арадыемни табиха дурагүй байнаш.

¹⁸ Үглөөдэр үглөө энэл сагта урдань Египет орондо үзэгдөөгүй шанга аадар мүндэр оруулхам!

¹⁹ Үхэр малаа хушалта һарабша доро хорохыень суглуулаг, газаагуур задагай байһан хамаг юумэеэ хушаг гэжэ хэлэ. Газаа, хүдөөдэ үлэһэн, хушалта доро хороогүй хүн, үхэр мал мүндэртэ сохюулжа хосорхо».

²⁰ Эзэнэй үгэһөө һүрдэһэн фараоной түшэмэл ноёд яаралтай түргэн барлагуудаа, мал һүрэгүүдээ суглуулжа, гэр хушалта доро оруулба.

²¹ Харин үгэдэнь анхараагүй ноёд зоноо, мал һүрэгүүдээ хүдөө талаһаа асарангүй орхибо.

²² Эзэн Моисейдэ зарлиг болобо: – Гараа огторгой өөдэ дэлгэн дэехэдэш, Египет орондо айхабтар шанга аадар мүндэр бууха. Тэрэ Еипедэй газар дайдаар зониие, мал, ургамал ногоо сохихо.

²³ Моисей дулдыгаа огторгой өөдэ дэлгэн дэебэ. Эзэнэй хүсэлөөр тэнгэри дуугаржа, сахилгаан сахилжа, залин мүндэртэ аадар орожо эхилбэ. Бүхы Египет ороноор Эзэн мүндэр буулгаба.

²⁴ Египет орондо урдань хэзээдэшье үзэгдөөгүй ехэ мүндэр оробо, сахилгаан сахилба.

²⁵ Хаа-хаанагүй хүдөө талада оройтоһон зон, мал мүндэртэ сохюулжа хосорбо. Ургамал ногоон һалаба, модо һөөгүүд хуха сохюулба.

²⁶ Гансал Гоошэн нютагта мүндэр оробогүй – тэндэ Израиль угсаатан һуудаг бэлэй.

²⁷ Фараон Моисей Аһароон хоёрые дуудажа асаруулаад хандаба: – Энэ удаа би нүгэлтэй байһанаа мэдэрнэб; Эзэнтнай үнэниие айладаа юм байна, харин минии болон албатан арадайм буруу элирбэ гээшэ.

²⁸ Эзэндэ зальбарыш даа: тэнгэриин дуу сахилгаа, аадар мүндэр болюулаг лэ. Би таанадые бэшэ барихагүйб, ошохо тээшэтнай табихалби. Моисей тэрээндэ иигэжэ харюусаба:

²⁹ – Хотоһоо гаран сасуу Эзэн тээшэ гараа дэлгэн дэехэдэм, тэнгэриин дуу сахилгаан, аадар мүндэр тэрэ дары болихо, газар дэлхэйдэ гансал Эзэн гэжэ мэдэхыншни түлөө тиимэ үйлэ болоно.

³⁰ Гэбэшье ши болон шинии түшэмэлнүүд Эзэн Бурханһаа үшөөл айнагүй гэжэ тухайлнам.

³¹ Ешмээн эдеэшэжэ, маалинга үрэһэеэ гүбеэгүй байһан дээрэһээ мүндэртэ ехээр сохюулһан,

³² шэниисэ болон хара таряан хожом таригдаһан шалтагһаа мүндэрһөө хохидоогүй байба.

³³ Моисей фараониие орхин, хотоһоо гарахадаа, Эзэн руу гараа дэлгэн дэебэ, тиихэдэнь тэнгэри дуугархаа болибо, мүндэр гансата замхаба, бороо тогтобо.

³⁴ Тэнгэриин һүрөөтэ дуун, аадар мүндэр болибо гэжэ фараон харамсаараа дахяад нүгэл хэжэ, түшэмэлнүүдтэеэ хамта үсэрхэжэ эхилбэ.

³⁵ Фараон үсэд хатуу зангаараа Израилиин зониие табиха дурагүй зандаа байба. Эзэнэй уридшалан Моисейдэ айладаһаарнь лэ болобол даа.