Египедһээ гаралга 8 - Библи

Хоёрдохи хэһээлтэ: баханууд

¹ Эзэн Моисейдэ зарлиг болобо: Фараондо ошожо хэлэхэш: – Эзэн иигэжэ айладана: «Намда зорюулһан үргэл тахилаа бүтээхыень Өөрым арадые таби.

² Табяагүй һаашни, орон нютагташ жэрхэдэһэ хүрэхөөр муухай хара соохор бахануудые табихам.

³ Нил мүрэн соо үй түмэн баханууд исалха, багтажа ядан уһанһаа гаража, ордон соошни, байдаг таһалгадашни, унтадаг орон шэрээдэшни мүлхижэ ерэхэ. Түшэмэл албатанайш, улад зонойш гэрнүүдтэ, гал зуухадатнай, эһээбэри талхандатнай орохо.

⁴ Жэрхэдэһэ хүрэхөөр хара соохор баханууд шамда, арад зон, түшэмэлнүүдтэш аһалдан гарахал!»

⁵ Эзэн Моисейдэ айладаба: – Египедэй уһа голнууд, Нил мүрэн болон хамаг уһа сөөрэмүүд дээгүүр дулдытай гараа дэлгэн дэежэ, Египедэй газарые бахануудаар бүрхөөг гэжэ Аһароондо хэлэ.

⁶ Аһарооной уһа голнууд тээшэ гараа дэлгэн дэехэдэнь, баханууд гаража, Египедые бүрхөөбэ.

⁷ Үнөөхи эльбэшэд баһал тиимэ эльбэ хэхэ шадалаа харуулба – Египедэй газар дайда руу бахануудые эльгээбэ.

⁸ Фараон Моисей Аһароон хоёрые дуудажа ерүүлээд хэлэбэ: – Эзэндэ зальбаржа, намһаа, минии албатан арадһаам эдэ бахануудые зайлуулагты! Тиихэдэтнай Израиль угсаатаниие Бурхандаа үргэл хэхыень табихаб.

⁹ – Эдэ муухай баханууд ямар сагта танай гэрнүүдһээ үгы болохо ёһотойб гэжэ болзор тогтоон томилыш! Шинии түлөө, ноёд түшэмэлнүүдэйш, албатан арадайш түлөө Эзэндэ зальбархадам, баханууд гансал Нил мүрэн соо үлэхэ, – гэжэ Моисей фараондо хэлэбэ.

¹⁰ Үглөөдэр гэжэ фараоной хэлэхэдэ: – Шинии хэлэгшээр лэ болохо. Манай Эзэн Бурхантай тэнсэхэ хэншье үгы гэжэ мэдэжэ абахыншни түлөө энэ хэгдэхэ.

¹¹ Баханууд шамайе, ордонгыеш, түшэмэлнүүдыеш, арад зонииеш орхин зайлаха, гансал Нил мүрэндэ үлэхэ, – гэжэ Моисей хэлэбэ.

¹² Моисей Аһароон хоёр фараонһоо гараба. Моисей Эзэндэ хандажа, фараон руу эльгэһэн бахануудые үгы хэхыень гуйба.

¹³ Эзэн Моисейн гуйлта дүүргэбэ, гэр байшангуудта, хото хорёо соогуур, хүдөөгөөр байһан баханууд үхэбэ.

¹⁴ Үхэһэн бахануудые суглуулжа обоолходонь, хаа-хаанагүй үмхэйн үнэр танар гутаба.

¹⁵ Харин фараон баханууд үгы болоо гэжэ мэдэхэдээ, үнөөхи үсэд зандаа диилдэн, үгыень дуулахаяа болибо даа. Эзэнэй урид айладаһаниинь бэелбэ.

Гурбадахи хэһээлтэ: илааһан

¹⁶ Эзэн Моисейдэ айладаба: – Дулдыгаа далайжа, газарай тооһо шорой шабхада гэжэ Аһароондо хэлэл даа, бүхы Египедэй шорой тооһон илааһан боложо хубилха.

¹⁷ Тэрэнииень бүтээбэ. Аһароон дулдыгаар газарай шорой шабхадаба, тэрэ дороо үй түмэн илааһан хүн амитанда добтолбо. Бүхы Египедтэ газарай шорой илааһан боложо хубилаа бэлэй.

¹⁸ Фараоной эльбэшэд бүхы эльбэеэ гаргабашье, илааһа бии болгожо шадабагүй. Үй түмэн илааһан хүн болон амитадта амар заяа үзүүлхэеэ болибо.

¹⁹ Египедэй эльбэшэд «Энэ Бурханай гар ха даа» гэжэ фараондо хэлэбэ. Фараон үсэд зангаа хубилгабагүй, үгэ дуулабагүй. Эзэнэй урид айладаһаарнь лэ болобо.

Дүрбэдэхи хэһээлтэ: һоно батаганаан

²⁰ Эзэн Моисейдэ айладаба: – Үглөөдэр үглөө эртэ бодожо, фараондо ошохо болобош. Гол руу ерэхэдэнь, иигэжэ хэлэхэш: «Эзэнэй айладхал иимэ: Намда үргэл хэхыень Минии арадые табииш!

²¹ Табяагүй һааш, шам руу, түшэмэлнүүд, арад түмэн, ордон рууш һононуудые табихаб. Египедэй хамаг зоной гэр байрадань ба хүл доогуурыньшье һоно батаганаан исалха!

²² Харин Гоошэн нютагта һоно батаганаан үгы байхаар илгахаб: тэндэ Минии арад угсаатан һуудаг юм – тэндэ һоно батаганаан үгы байха. Газар дэлхэйдэ ганса Эзэн бии гэжэ мэдэхыншни түлөө тиигэжэ хэхэб.

²³ Өөрын арадые Би гай оһолһоо аршалхаб, харин шинии арад зониие хэһээхэб. Ерэхэ үглөөгүүр тиимэ дүлгэ үзэгдэхэ».

²⁴ Эзэн үгэдөө хүрэбэ. Үй түмэн һоно батаганаан фараоной ордондо, ноёд түшэмэлэйнь гэрнүүдтэ, бүхы Египедээр дүүрэбэ. Египет орон һоно батаганаанһаа хосорхо туйлдаа хүрэбэ.

²⁵ Фараон Моисей ба Аһароониие дуудажа ерүүлээд хэлэбэ: – Манай газар нютагһаа гарангүй Бурхандаа үргэл хэгты.

²⁶ Моисей харюудань: – Тиигэжэ болохогүй. Египет арад манай Бурхандаа хэһэн үргэл тахилые бузартай үйлэ, бузгай хэрэг гэжэ нэрлэхэл. Тэдэнэй ойро тахибалнай тэдэ маанадые шулуугаар шэдэжэ алаха бэшэ юм гү?

²⁷ Үгы даа, бидэ сүл губи руу гурбан үдэрэй зайда ошожо, манай Эзэн Бурханай хүндэлэлдэ үргэл бүтээхэ ёһотойбди, – гэбэ.

²⁸ – Би таанадые сүл губи руу Эзэн Бурхандаа үргэл хэхыетнай табихаб, гансал холо бү ошооройгты. Минии түлөө баһа зальбаран үргөөрэйгты, – гэжэ фараоной хэлэхэдэ:

²⁹ – Би иигээд шамһаа гаража, Эзэндэ зальбархам, үглөөдэртөө һоно батаганаанһаа хуу һалаха – фараоншье, түшэмэлнүүдшье, бүхы албатан арадшье. Гэбэшье энээнһээ хойшо фараон маанадые мэхэлхэеэ болиг лэ, Эзэндэ үргэл хэхыень манай угсаатанда һаад бү хэг лэ, – гэбэ Моисей.

³⁰ Моисей фараонһоо гаража, Эзэндэ зальбарба.

³¹ Эзэн Моисейн гуйлтаар фараон болон тэрэнэй түшэмэлнүүдһээ, албатан зонһоонь үй түмэн һоно батаганаа зайлуулжа, нэгыешье үлөөбэгүй.

³² Харин фараон үсэд зангаа хубилгабагүй, зониие табибагүй.