Египедһээ гаралга 3 - Библи

Бурхан Моисейе дуудана

¹ Моисей мидиан угсаатанай газарта хадам эсэгэнь болоһон Итроо санаартанай хони адуулдаг һэн. Нэгэтэ хонидоо сүл губи руу тууһаар туужа, Бурханай хада Хорээб тээшэ дүтэлэн ерэбэ.

² Тэндэ аһажа байһан үүргэнын һөөг сооһоо Эзэнэй Эльгээмэл тэрээндэ үзэгдэбэ. Гайхал ехэ, үүргэнын һөөг бургааһан гал дүлөөр соробхилжо байһан аад, шатажа дууһаха хэбэргүй байба.

³ «Дүтэлжэ харахамни, энэ гайхамшаг ямар үзэгдэл гээшэб, яахадаа иигэжэ үүргэнын эшэ шатажа дууһадаггүй юм?» – гэжэ Моисей досоогоо үгүүлбэ.

⁴ Моисейн ерэжэ ябахыень хаража байһан Эзэн Бурхан һөөг сооһоо тэрээндэ хандажа дуудаба: – Моисей! Моисей! – Би шагнанаб, – гэжэ Моисей харюусаба.

⁵ – Иишээ бү дүтэлэ; гуталаа тайла, юуб гэхэдэ, зогсоһон һууриш нангин газар гээшэ, – гэжэ Бурхан айладаба.

⁶ – Би шинии үбгэ эсэгын Бурхан гээшэб, – гэжэ удаань Тэрэ айладаа. – Абраһаамай Бурхан, Исаагай Бурхан, Яковай Бурхан гээшэб. Моисей Бурхан тээшэ харахаяа зүрхэлэнгүй, нюураа халхалаад байба.

⁷ – Би Минии арадай Египедтэ зобожо байхыень харааб, харуулшадай харшалхада туһа эрижэ байхыень дуулааб; Би тэрэнэй зобоһыень мэдээб.

⁸ Египедэй гарһаа аршалан мулталжа, һү тарагай, бал тоһоной дэлбэржэ байдаг үргэн һайхан нютагта, ханаһаан, хээт, эмоор, пэриззии, хиив, евүүс угсаатанай газарта абаашаха гэжэ Би газар түбидэ буужа ерээб, – гэжэ Эзэн айладаба. –

⁹ Израиль угсаатанай гасаланта ёолоон Минии һонорто хүрэбэ. Египет зоной тэдэниие яажа дарлажа байһые Би харабаб.

¹⁰ Иимэ ушарһаа Би шамайе фараондо эльгээхэм: Минии арадые, Израиль угсаатаниие Египедһээ гаргыш даа.

¹¹ – Би хэн аад, фараондо ошожо, Израилиин зониие Египедһээ гаргаха болобо гээшэбиб? – гэжэ Моисей Бурханда хэлэбэ.

¹² – Би шамтай суг хажуудаш байхаб. Минии шамайе эльгээһэнэй дүлгэ тэмдэг иигэжэ тудаха: Египедһээ арадыем гаргаһанайш хойно энэ хада дээрэ Бурханда зальбаран, ёһолол бүтээхэ сагтнай ерэхэ, – гэжэ Бурхан харюусаба.

Бурхан Моисейдэ нэрээ айладана

¹³ Моисей Бурханда үгэлбэ: – Зай, би Израиль угсаатанда ерэжэ хэлэбэ гэлэйб: «Эсэгэнэрэйтнай Бурхан намайе таанадта эльгээбэ». Харин тэдэ намһаа иигэжэ асуухал: «Тэрэ Бурханайш нэрэ хэн бэ?» Тиихэдэнь юун гэжэ харюусаха болонобиб?

¹⁴ Бурхан Моисейдэ айладаба: – Би болбол БИ ХЭТЭДЭЭ ОРШОГШО гээшэб. Израиль угсаатанда «БИ ХЭТЭДЭЭ ОРШОГШО намайе таанадта эльгээгээ» гэжэл хэлээрэй.

¹⁵ Бурхан үшөө иигэжэ айладаа: – Танай эсэгэнэрэй – Абраһаамай Бурхан, Исаагай Бурхан, Яковай Бурхан болохо Эзэн намайе эльгээгээ гэжэ Израилиин хүбүүдтэ хэлэхэш. Минии нэрэ хэтэдээ тиимэ, Намайе угһаа угта тиигэжэл дурдадаг байха зэргэтэй.

¹⁶ Ошо, Израилиин аха захатаниие суглуула. Тэдээндэ иигэжэ дуулга: таанадай эсэгэнэрэй, Абраһаамай, Исаак ба Яковай Бурхан болохо Эзэн намда ерэжэ, иигэжэ айладаал: «Би Египедтэ ямар байдалтай байһыетнай харабаб.

¹⁷ Таанадые Би Египедэй дарлалтаһаа зайлуулжа, ханаһаан, хээт, эмоор, пэриззии, хиив ба евүүс угсаатанай һуудаг, һү тарагаар, бал тоһоор дэлбэржэ байдаг нютагта абаашахам».

¹⁸ Израиль угсаатанай аха захатан шинии үгэ дуулаха, тэдээнтэй сугтаа Египедэй фараондо ошожо, иимэ айладхал хэхэт: «Еврейнүүдэй Бурхан болохо Эзэн манда үзэгдөө; Эзэн Бурхандамнай зорюулһан үргэл хэхыемнай сүл губи тээшэ, гурбан үдэрэй зайда маанадые табиит».

¹⁹ Би мэдэнэм, хүсэтэ гараар баадхаагүй һаа, Египедэй фараон ябахыетнай зүбшөөхэгүй.

²⁰ Би Өөрын хүсэтэ гар Египет руу һунаахаб, эди шэдеэрээ элдэб гайхамшаг үзэгдэл харуулхаб – тиихэдэм лэ таанадые табиха.

²¹ Минии һанаһан соол Египедэй зоной хандаса хубилха: тэндэһээ ябахадаа гар һула ябахагүйт.

²² Эхэнэрнүүдтнай хүршэнүүдһээ алта мүнгэн зүүдхэл, хубсаһа хунар эрижэ абаха, абаһанаа үхи хүүгэдтээ үмдэхүүлхэт! Египедые тиигэжэ хооһолон, олзо ехэтэй гарахат.