Эфесэйхиндэ 4 - Библи

Христоосой бэеын эрхэтэнүүдэй эблэрэлгэ

¹ Эзэндэ алба хэжэ байһан дээрэһээ хаалтада һууһан би Бурханай таанадта даалгаһан уялгада зохистойгоор амидарагты гэжэ ехэтэ гуйнаб.

² Ходо даруу, номгон, тэсэбэритэй байгты. Бэе бэедээ тэсэбэритэйгээр хандажа, өөһэдынгөө хайра дурые харуулжа байгты.

³ Арюун Һүлдын таанадта хайрлаһан, энхэ тайбанаар таанадые холбоһон нэгэдэлые сахиха гэжэ бүхы хүсэ шадалаараа оролдогты.

⁴ Бурханай таанадые дуудаһан найдуулгын гансал хадань таанад нэгэ бэе гээшэт, нэгэ Арюун Һүлдэтэй байнат.

⁵ Гансал Эзэн, гансал һүзэг этигэл, гансал уһан арюудхалга бии.

⁶ Бүхы юумэн дээгүүр, бүхы юумэн соо болон бүхы юумээр дамжан ажаллажа байһан гансал Бурхан – бүхы хүнүүдэй Эсэгэ бии юм.

⁷ Христоосой маанадта үгэхэ гэжэ шиидэһэн хэмжээгээр хүн бүхэмнай онсо абьяас бэлигтэ хүртэбэ.

⁸ Тиимэһээ Нангин Бэшэг соо иигэжэ бэшээтэй: «Тэрэ үндэр газарта дабшан гараа, баряанда зониие абаа, хүнүүдые бэлэгтэ хүртөөгөө».

⁹ «Үндэр газарта дабшан гараа» гэдэгынь баһа ямар удхатай юм? Урдань Тэрэнэй газарай доодо үнсэгтэ бууһыень харуулна бэшэ гү?

¹⁰ Газарай доодо үнсэгтэ бууһан Нэгэн замбуулиниие Өөрөөрөө дүүргэхын тула тэнгэриһээ дээгүүр дэгдэһэн лэ Нэгэн бэшэ аал?

¹¹ Тэрэл хүнүүдые абьяас бэлигтээ хүртөөбэ, хэһэг зониие элшэнэр болгожо табиба, үшөө хэһэг зониие лүндэншэд болгожо табиба, зарим зониие Һайн Мэдээсэл номнохыень табиба, бусадые һүзэглэгшэдэй хүтэлэгшэдөөр, багшанараар томилбо.

¹² Тэрэ Бурханай хүнүүдые Бурханда алба хэхэ ажалда бэлдэхын тула, Христоосой бэеые бодхоохын тула тиигээ.

¹³ Тиимэһээ бидэ бултадаа нэгэ этигэл һүзэгтэй болохо, Бурханай Хүбүүниие мэдэрхэ ёһотойбди. Бидэ Христоосой хүсэд болбосорһон хэмжээндэ хүрэн, хүсэд болбосорһон хүнүүд болохо ёһотойбди.

¹⁴ Тиин бидэ уһанай долгиндо, али һалхинай һэршэгэнэлгэдэ абтаһан юумэндэл ямаршье һургаалда абтан хэлбэлзэдэг, хүнэй мэхэ гоходо орожо, ехэ шадамараар мэхэлүүлдэг балшар хүүгэд байхаяа болиёл.

¹⁵ Тиигэхын орондо хайра дураар дүүрэжэ, үнэн сэхые хэлэжэ байбал, бидэ толгой болохо Христоосто алишье талаһаа ойртон ургахабди.

¹⁶ Христоосой хүтэлбэри доро бэеын эрхэтэнүүд бүхэ зангилаагаар холбогдонхой байһанһаа боложо бэе өөрөө бүрин бүтэн байна. Эрхэтэн бүхэн өөрынгөө хэхэ ёһотой үүргые дүүргээд, бүхы бэе хайра дурын ашаар ургажа, өөрыгөө бүрилдүүлнэ.

Хуушан амидаралһаа шэнэ амидарал руу шэглэхэ

^17-18 Дэмы хооһон бодолтой, оюун ухааниинь балартаһан ондоо яһатанда адли бэеэ абажа ябахаяа болигты гэжэ би таанадые Эзэнэй нэрээр гуйнаб. Сэдьхэл зүрхэниинь шулуундал адли шэрүүн байжа, Бурханиие мэдэрхэ гэжэ огто хүсэхэгүй байһан дээрэһээ тэдэнэр Бурханай хайрлажа байһан амидаралһаа хасагдаба.

¹⁹ Һэшхэлээ бүрин алдан, тэдэнэр ямаршье хэмжээ ханалые мэдэнгүй хуули буса юумэ үйлэдэжэ, өөһэдыгөө ташаяангы хүсэлэнгүүдэй мэдэлдэ үгөө.

²⁰ Христоос тухай һургахадаа таанадта тиимэ юумэ заагаагүй юм.

²¹ Таанад Тэрээн тухай дуулаат, Тэрээнһээ һуража абаат. Тэрэ болбол үнэн зүб юм.

²² Тэрээнһээ иимэ юумэндэ һураат: хуурмаг хүсэлэнгүүдээрээ өөһэдыгөө һүнөөн, урданайхяараа амидархаяа болигты.

²³ Зүрхэ сэдьхэлтнай, һанал бодолтнай хубилан шэнэрхэ ёһотой.

²⁴ Бурханай дүрые һажааһан үнэн сэдьхэлтэй, арюун гэгээн амидаралтай шэнэ хүн боложо хубилагты.

²⁵ Тиимэһээ худал юумэ хэлэхэеэ болёод, дүтынгөө хүндэ хүн бүхэнтнай үнэниие хэлэжэ байг, ушарынь хэлэхэдэ, бидэ бултадаа нэгэ бэеын эрхэтэнүүд гээшэбди.

²⁶ Уур сухалда абтаһаншье һаа, нүгэл шэбэл бү үйлэдэгты, наранай орохоһоо урда уур сухалтнай бууран намдаг.

²⁷ Шолмосто шургажа орохо боломжо бү үгэгты.

²⁸ Юумэ хулуудаг байбал, дахин юумэ хулуухаяа болёод, гараараа аша туһатай юумэ хэжэ, дутажа зүдэржэ байһан хүнүүдтэй юумээрээ хубаалдажа, үнэн зүбые баримталан амидаржа байгты.

²⁹ Хорото үгэнүүд аманһаатнай бү гараг. Шагнажа байһан хүнүүдтэ хэрэгтэй, һүзэгыень бэхижүүлхэ аргатай, аша туһатайл үгэнүүдые хэлэжэ байгты.

³⁰ Ойртожо байгаа тэрэ Үдэр таанадай сүлөөтэй болохые баталан, Бурхан таанад дээрэ Арюун Һүлдын тамга табяа. Тиимэһээ Арюун Һүлдые бү гуниглуулагты.

³¹ Гомдохо голхорхоёо, хорон үгэнүүдые хэрэглэхэеэ, уур сухалаа хүрэхэеэ, хэрүүл гаргахаяа, хардахаяа, бусадшье эдэ мэтын харата муухай юумэ үүсхэхэеэ огтолон болигты.

³² Харин бэе бэеэ энхэрэн, хайрлажа ябагты, Бурханай Христоосоор дамжан таанадые хүлисэһэндэл адляар бэе бэеэ хүлисэжэ байгты.