Дуунай дуун 7 - Библи

¹ Эрьен хатара, Шуламмиит басаган! Эрьелдэн хатара, маанадта хатараа харуулыш даа! Хатаржа байгаа Шуламмиидые олон басагад, эхэнэрнүүдэй дундаһаа онсолон харахын ушар юун бэ?

Хүбүүн:

² Уг изагууртай басаган! Шаахайтай хүлшни ямар гоёб! Тойрог һайхан гуяшни уран бэлигтэй дарханай урлажа хэһэн бүтээл мэтэ.

³ Түхэреэн һайхан хүйһэншни холилдоһон жэмэсэй архяар хэзээшье дундаршагүй хундага мэтэ. Гоё һайхан бэлхүүһэншни сараана сэсэгээр шэмээд, хуряажа обоолһон шэниисэ мэтэ.

⁴ Булай хөөрхэн хүхэншни эхир хоёр инзаган мэтэ.

⁵ Хүзүүншни заанай яһан самхаг мэтэ. Нюдэншни Бат-Рабим хаалгын хажуудахи Хэшбоон хотын сөөрэмэй гүн уһан мэтэ тунгалаг. Хамаршни Дамааск хотын дээгүүр омог бардам шэртэһэн Ливаан уулын орьёл мэтэ.

⁶ Толгойшни Кармээл уула мэтэ шам дээрэ заларна. Ута хара үһэншни наранай туяада алтарна. Намирһан һайхан үһэндэшни эзэн хааншье дурлана.

⁷ Инагни! Ямар һайхан, ямар дура буляама гоёбши даа!

⁸ Уян һайхан бэешни пальма модонтой сасуулмаар. Булай хөөрхэн хүхэншни үзэмэй дүүрэн багсадал.

⁹ Пальма өөдэ абиржа, жэмэсынь гартаа барихада, уран хоёр хүхэншни уһан үзэмэй багса мэтэ. Анхилма һайхан амисхаалшни алим жэмэстэл адлирхуу.

¹⁰ Дуранай халуун уралшни хамагһаа эрхим үзэмэй дараһан архидал мэтэ. Аманһаам гараһан үзэмэй дараһан архи амараг шамайем баясаан, урал шүдэнэйшни забһараар урдан орохонь болтогой!

Басаган:

¹¹ Би өөрынгөө инагайхиб. Ганса намайе тэрэ хүсэдэг.

¹² Инагни! Хээрэ хүдөө ошоод, хинна сэсэгэй хангал доро һүниин туршада жаргая.

¹³ Үглөө эртэлэн бодоод, уһан үзэмэй сэсэрлигтэ орожо, сэсэгэй дэльбэ задаржа, анар модоной сэсэглэхые амараг шамтайгаа харая. Тэндэ ошоод, хайра дуранай дээдые харамгүй үгэхэб шамдаа!

¹⁴ Хүсэлэй гал бадарааха эдитэй хайра дуранай алим анхилна. Орохо хаалгын урдахана дура буляама жэмэс байна. Инагни! Хуушан, шэнэ гэлтэгүй, хадагалжа нөөсэлһэн жэмэсһээ хайрата шамда үгэхэлби!