Дуунай дуун 6 - Библи

¹ Эмэгтэйшүүлэй дундаһаа эгээл һайхамнай! Амарагшни хайшаа ошооб? Али харгыгаар ябааб? Шамтай хамта бэдэрэел!

Басаган:

² Минии амараг сэсэрлигтэ орожо, сэсэгэй мандал руу ошоо. Сэнгэлэй дээдые эдлэн, сараана сэсэг түүжэ байна.

³ Амараг тэрэмни ганса минии! Би өөрөө гансал тэрэнэйб. Сараана сэсэгэй дунда тэрэмни сэнгэлэй дээдые эдэлжэ байна.

Табадахи дуун Хүбүүн:

⁴ Инагни, ши үзэмжэ түгэс Тирцаа хото мэтэш, үнэхөөр һайхан Иерусалим хото мэтэш, нюдэ буляама, илдам һайхан. Үй олон туг намируулһан үзэсхэлэнтэ хото мэтэ эрхим һүрөөтэйш.

⁵ Хөөрхэн нюдөөрөө бү шэртэ намайе! Хүсэлэй гални дүлэтэн байна. Миндаһан үһэншни намилзан хүдэлхэдөө, Галаадай хадаһаа уруудан буугааша ямаан һүрэгые һануулна.

⁶ Дун сагаан шүдэншни һаяхан нооһоо угаалгаад, голһоо гараһан хонид мэтэ үзэмжэтэй. Хундан сагаан тэрэ хонид эхир хурьга гарганхай, һубайрһан нэгэньшье үгы.

⁷ Һанжаһан гивлүүрэй саанаһаа улаа бутарма хоёр хасаршни зохидоор хубааһан анар жэмэс мэтэ нюдэ буляама үзэсхэлэн гоё.

⁸ Эзэн хаан жаран хатантай, наян һайхан бага һамгатай, басагад тоо томшогүй.

⁹ Харин хөөрхэн сагаан тагтаамни! Өө мөөгүй амарагни! Олоной дундаһаа угаа һайхан. Минии дуратай амараг хүнэй ганса мэтэ онсо һайхан. Олон хүүгэдтэй эжынгээ хубида онсо хайратайнь тэрэмни бэлэй. Эхэнэрнүүд тэрэниие харабал, «Бүгэдэһөө жаргалтайнь» гэжэ хэлэдэг. Хатан хаан, бага һамгадшье хайратымни хараад, бахардан магтаа.

Иерусалим хотын басагад:

¹⁰ Үүрэй толон мэтэ ялагар, һүниин һара мэтэ һайхан, үдэрэй наран мэтэ гэрэлтэй, үзэсхэлэн гоёнь хэн бэ? Тэрэ болбол минии амараг. Үй олон туг намируулһан, үзэсхэлэнтэ хото мэтэ эрхим һүрөөтэй.

Хүбүүн:

¹¹ Талын ногоорхые харахаяа, уһан үзэмэй мододой сэсэглэжэ, анар модоной нахилзан задархые харахаяа һамарай модоной сэсэрлиг руу би уруудан буугааб.

Басаган:

¹² Уянгын нүлөөндэ абтахадаа, би ухаагаараа бодохо сүлөөгүй хун тайжынгаа хажууда ошоод, морин тэргэдэнь һууһан байбаб.