Дуунай дуун 1 - Библи

¹ Энэ болбол Соломоон хаанда зорюулһан дуунай эгээл һайхан дуун болоно. Хайрата инагни, таалахашни ямар аятайб! Халуун уралнуудшни хэды амтатайб! Ульһата абьяас дураншни үзэмэй дараһан архиһаа үлүү дэгдээнэл.

Түрүүшын дуун Басаган:

² Амараг шиниимни ойртон ерэхэдэ, агааршье хүрэтэрөө һайхан үнэртэй. Алдар нэрыншни шэхэндэ дуулдахада, ая гүгэлөөр анхилаад аятай. Эмэгтэйшүүл шамайе харамсаараа эльгэлэн ехэ дурлан байна.

³ Алимши, хайратамни, түргэлыш! Гарһаамни хүтэлөөд гүйгыш! Сэдьхэл зүрхэнэйм хаамни, өөрын таһалгада оруулыш! Инаг шиниимни хажууда ерэһэн бүхы басагад жаргалда умбана. Илдам һайхан дураншни үзэмэй дараһан архиһаа үлүү дэгдээнэ. Эмэгтэйшүүл шамайе харамсаараа эльгэлэн ехэ дурлан байна.

⁴ Иерусалим хотын басагад! Хүрин үнгэтэй болобошье, би харахада булай хөөрхэмби. Кэдаар аймагай майхан мэтэ арһанайм үнгэ хүриншье һаа, Соломооной таһалгын хүшэгэдэл үзэмжэ түгэс, үзэсхэлэн гоёб.

⁵ Халуун наранда шаруулаад, харлажа борлоһомни үнэн зүб. Харин үнгэһөөм боложо, дээрэлхэн хараха хэрэггүй шуу! Түрэһэн аханарни намда уурлахадаа, уһан үзэмэй сэсэрлигтэ ажаллуулжа, ажал хүдэлмэридөө шармайһан намда өөрыгөө һанаха сүлөө байгаагүй.

Басаган:

⁶ Сэдьхэл зүрхэнэйм хайратамни, хаана һүрэгөө бэлшээхэш? Үдын наранай шангадахада хаана һүүдэртэ абаашахаш? Хэлыш даа, инагни, намдаа хэлэ! Амараг шамайгаа үгылөөд, бусадай һүрэгэй дундуур нюураа бүглөөд ябахам хайшаа юм?

Хүбүүн:

⁷ Эмэгтэйшүүлэй дундаһаа эгээл һайхан минии амараг! Хаана ошохым мэдэхэгүй һаа, хонин һүрэгэй мүрөөр ябажа, хойноһоом дахан хүрэжэ ерэ! Хонишодой буусын майханай хажууда эшэгэдээ асараад бэлшүүлэ!

⁸ Инагни! Эмниг хангал гүүе хараад, Египедэй хаанай морин тэргын азарга моридой инсагаалдагтал хонгор шамайгаа хараха бүри хүсэл дурамни хөөрөн носоно.

⁹ Даруулга зүүлтээр шэмэһэн хасаршни хэды хөөрхэн бэ! Эрдэни шулуугаар гоёоһон хүзүүншни ямар уяхан бэ!

¹⁰ Ордоной дархашуулай урлажа хээлэһэн мүнгэн угалзатай алтан зүүлтэ шиниимни хүзүүе шэмэхэл.

Басаган:

¹¹ Хаан шамтайгаа хажуулдин хэбтэхэдээ, бэедээ түрхижэ гоёоһон һайхан үнэртэй нард тоһомни оршон тойрондо анхилан байна.

¹² Амарагни, хүхэнүүдэйм хоорондохи һайхан үнэртэй гүгэлэй багсадал аятай гоёор анхилнаш.

¹³ Эн-Гээди нютагай сэсэрлигтэ хээрын сэсэгэй дэльбэтэй инаг шамаяа жэшэнэб.

Хүбүүн:

¹⁴ Амарагни, ямар гоё һайхамши! Ямар үзэсхэлэн гоёбши! Нюдэдшни тагтаа мэтэ һайханууд!

Басаган:

¹⁵ Үзэсхэлэн түгэс инагни! Үнэн сэдьхэлэйм хайратамни! Хүбдэ ногоогоор оро хэе,

¹⁶ хуша модоной тотого доро, нарһан модоной хушалта доро.