Аввакуум 3 - Библи

Аввакуумай Эзэндэ этигэл найдал

¹ Аввакуум лүндэншын зальбарал-гашуудал дуун:

² Эзэн! Тан тухай мэдээ дуулаад, би һүрдэн айжа байнам. Эзэн! Манай энэ үе сагта гайхамшагта хэрэгүүдээ бүтээгыт! Уур хилэнтэй байгаа сагтаа үршөөл тухайгаа бү мартыт!

³ Тэмаанһаа болон Параан хадаһаа Арюун Бурхан заларжа байна. Тэрэнэй һүр жабхалан тэнгэри дүүрэн хушаа, дэлхэй Тэрэнэй алдар солоор дүүрэн байна.

⁴ Тэрэнэй туяа наранай гэрэл мэтэ, гарһаань туяанууд сасаран байна. Тэндэл хүсэ шадалынь хоноотой.

⁵ Урдань тахал үбшэн ябана, хойноһоонь һүйдхэлтэй хамшаг дахана.

⁶ Тэрэнэй зогсоходо, дэлхэй доһолбо. Харахадань, арадууд шэшэрбэ. Мүнхэ хада ууланууд хамхарба, эртэ урдын толгойнууд унаба. Эдэ хадаа Тэрэнэй эртэ урда сагта сэнгэдэг зүргэ замууд бэлэйл.

⁷ Кушаан болон Мидианай майхангуудай айһандаа шэшэрэн байхые хараа һэм.

⁸ Моридоо унаад, абаралай тэргэнүүдтээ залараад ерэһэнтнай гол мүрэнүүдтэ сухалдаһандаа, үгышье һаа, далайда уурлаһандаа гэжэ гү?

⁹ Годли табихаар бэлэн болгожо, Та һурша номоо татаат. Газар дэлхэйе гол мүрэнүүдээр хахалан хубаабат.

¹⁰ Хада ууланууд Таниие хараад, доһолон шэшэрбэ, аадар бороо адхарба. Газарай гүнэй уһан шууяжа, долгидынь үндэртэ хүрэн шааяба.

¹¹ Харбаатай годлинуудайтнай туяа гэрэлдэ, ялалзаһан жадануудайтнай туяанда гайхан,

¹² уур сухалтай газар дэлхэйгээр Та алхалжа, зэбүүрхэн арадуудые дэбһэнэт.

¹³ Өөрын арад түмэнэй абарал болон, шэлэжэ тоһолон ёһолһон хаанаа абархын тула Та гаража ерээ бэлэйт. Нүгэлтэй муу арадай удамаршые Та сохижо, дууһан нюсэгэлэн орхинот.

¹⁴ Түшэмэлнүүдынь шуурган мэтэ нам руу дугташан, хүсэгүйе һэмээхэн үгы хэхэмнай гэжэ баярлан, намайе хюдахаяа һанаба. Теэд Та удамаршынь өөрынь жадаар нэбтэ хадхабат.

¹⁵ Та моридоороо далай тэнгисээр, ехэ уһанай долгин дээгүүр зам гарган ябабат.

¹⁶ Тэрээн тухай дуулахадаа, досоомни доһолбо, урални шэшэрбэ, яһамни үбдэбэ, зогсоһон газартаа би һалганабаб. Теэд арад зониием сүйдхүүлһэн дээрмэшэндэ һүнэхэ сагай ерэхые би тэсэбэритэйгээр хүлеэхэ ёһотойб.

¹⁷ Инжир модоной сэсэглээшьегүй, үзэмэй модоной үрэ жэмэс үгөөшьегүй, чидун модоной ургаашьегүй, таряаланда юуншье ургаагүй, хашаанда хонигүй, һарабша доро үхэргүй болоошье һаань,

¹⁸ би Эзэндэ баясан байхаб, юуб гэхэдэ, Тэрэ минии Абарагша Бурхан мүн!

¹⁹ Эзэн Бурхан – минии хүсэ шадал. Тэрэ хүлыем һогооной хүл мэтэ болгожо, үндэр газарнуудаар намайе ябуулхал! Дуунай бүлэгэй хүтэлбэрилэгшэдэ: хүбшэргэйтэ зэмсэгэй дууряалга доро.