Амоос 1 - Библи

¹ Тэкооһада хони үүсхэбэрилэгшэ Амоосой үгэнүүд гэбэл, энэ. Газарай хүдэлхын хоёр жэлэй урда тээ, Уззияагай Иудын хаан, Ехоһаашай хүбүүн Еробоһаамай Израилиин хаан байха үе сагта Эзэн тэрээндэ Израиль тушаа үзэгдэл харуулһан юм.

² Амоос иигэжэ хэлээ: Сион хадаһаа Эзэн арсаландал архирха, Иерусалимһаа хоолойнь ханхинан нижаганаха. Хонидой бэлшээринүүд хуурай болон гашуудаха, Кармээл хадын орой шарлан-харлан хатаха.

Эзэн Дамааскые шүүбэрилэн хэһээнэ

³ Эзэн иигэжэ айладхаа: Дамааскын улад зон гэмээ нэмээһээр. Шиидхэһэнээ Би болюулхагүйб. Хурса түмэрөөр Галаадые хуха жэжэлэн татаһандань,

⁴ Хазаһээлэй ордон руу гал эльгэхэб, Бэн-Һадаадай хэрэмүүд галда дүрэхэ!

⁵ Дамааск хотын хаалга эбдэхэб, Аавэн нюруугай уладые хюдахаб, Бэт-Ээдэнэй удамаршые һалгаахаб! Араамай арад зон баряанда сүлэгдэн Киир руу туугдаха.

Эзэн пилиштүүдые шүүбэрилэн хэһээнэ

⁶ Эзэн иигэжэ айладхаа: Гаазай улад зон гэмээ нэмээһээр. Шиидхэһэнээ Би болюулхагүйб. Бүгэдэ улад зониием баряанда туужа абаашаад, Эдоомдо богоолшолгодо дамжуулһандань

⁷ Гаазай хана руу гал эльгэхэб, хэрэмүүдынь галда дүрэхэ!

⁸ Ашдоод, Ашхэлооной удамаршадые усадхан үгы хэхэб, Экроон руу гараа далайжа, даран-сохин һалгаахаб, Пилиштын үлөөшэ зон хосорхо! – гэжэ Эзэн Бурхан соносхоо.

Эзэн Тиирые шүүбэрилэн хэһээнэ

⁹ Эзэн иигэжэ айладхаа: Тиирэй улад зон гэмээ нэмээһээр. Шиидхэһэнээ Би болюулхагүйб. Аха дүүнэрэй хэлсээ мартаад, баряанда байгша бүгэдэ зониие Эдоомдо богоолшолгодо дамжуулһандань

¹⁰ Тиирэй хана руу гал эльгэхэб, хэрэмүүдынь галда дүрэхэ!

Эзэн Эдоомые шүүбэрилэн хэһээнэ

¹¹ Эзэн иигэжэ айладхаа: Эдоомой улад зон гэмээ нэмээһээр. Шиидхэһэнээ Би болюулхагүйб. Һэлмэ гартаа далайнхай, аха дүүгээ намнаһанайнь, түрэл гэжэ хайрлаагүйнь, хододоо уур сухалтай хэрзэгы ааша гаргажа, хилэнсэглэн байһанайнь түлөө

¹² Тэмаан руу гал эльгэхэб, Боцраагай хэрэмүүд галда дүрэхэ!

Эзэн Аммооной уладые шүүбэрилэн хэһээнэ

¹³ Эзэн иигэжэ айладхаа: Аммоон улад зон гэмээ нэмээһээр. Шиидхэһэнээ Би болюулхагүйб. Хилэеэ үргэдхэхын тула хээлитэй эхэнэрнүүдэй гэдэһые Галаадта сүйжэ байһандань

¹⁴ Раббаагай ханада гал табихаб! Байлдаата үдэр хашхараан дундуур, шуургата үдэр һалхин дундуур хэрэмүүдынь галда дүрэхэ!

¹⁵ Хааниинь сүлэлгэдэ туугдаха. Түшэмэл ноёдыньшье тэрээнтэй хамта туугдан баряанда ошохо!