3 Хаан түрэнүүд 19 - Библи

Элһэн сүл губи руу Изээбэлһээ Элияагай тэрьедэлгэ

¹ Элияа гэгшын хэһэн бүхы үйлэ хэрэгүүдые, лүндэншэдые һэлмээр усадхаһан тушаа Ахааб Изээбэлдэ хөөрэжэ үгэбэ.

² Тиихэдэнь Изээбэл Элияада хүниие эльгээжэ: – Хэрбээ минии үглөөдэр энэ сагта тэдэ лүндэншэдтэл адли шамайе усадхаагүй һаам, бурхад намайе үгы хэг лэ! – гэжэ дамжуулба.

³ Элияа айжа, ами наһаяа абархын тула Иудын Бэһээр-Шээбэ руу ошобо. Тэндэ зарасаяа үлөөгөөд,

⁴ өөрөө бүхэли үдэр алхалан, сүл губи руу ерээд, һаглагар модоной һүүдэр доро һуугаад, үхэхые хүсэн байба. Тэрэ иигэжэ хэлэбэ: – Намда хүрөөл даа. Үхэһэн хүнһөө үлүү бэшэб, тиимэһээ, Эзэн, ами наһыем абыт!

⁵ Тэрэ һаглагар модон доро хэбтэжэ, унташаба. Гэнтэ Эльгээмэл тэрээндэ хүрэжэ: – Бодожо эдеэлэ, – гэбэ.

⁶ Элияагай харахада, толгойнь хажууда халуун шулуунууд дээрэ хилээмэн, амһарта соо уһан байба. Тэрэ эдеэлээд, ундалаад, дахин унташаба.

⁷ Эзэнэй Эльгээмэл дахин бусажа, тэрээндэ хүрөөд: – Бодожо, эдеэлэ, юуб гэбэл, аян замшни холо, – гэбэ.

⁸ Тэрэ бодожо, эдеэлээд, ундалаад, хоолһоо хүсэ ороод, дүшэн үдэрэй, дүшэн һүниин туршада Бурханай Хорээб хада хүрэтэр ябаба.

⁹ Тэндэ тэрэ агы нүхэн руу ороод, хонобо. Гэнтэ Эзэн тэрээндэ хандажа: – Элияа, ши эндэ юу хэнэбши? – гэжэ асууба.

Хорээб хада дээрэ Элияада Эзэнэй үзэгдэл

¹⁰ – Түмэн Сэрэгтэ Эзэн, би Танда албалхын тула бии шадалаараа шармайдагби. Теэд Израилиин арад зон Тантай хэһэн хэлсээгээ эбдэжэ, Танда тахил үргэдэг үргэлэй шэрээнүүдые һандаргаажа, лүндэншэдыетнай һэлмээр сабшан усадхаа. Би гансаараа үлөөб, харин намайешье алаха гэжэ забдана, – гэжэ тэрэ хэлэбэ.

¹¹ Эзэн харюусаба: – Газаашаа гараад, Минии урда, хада дээрэ зогсо. Зай, Эзэн үнгэржэ, асари ехэ хүсэтэй һалхи эльгэхэдэнь, хаданууд хамхаржа, хабсагайнууд бутаржа байба. Гэбэшье тэрэ һалхин дотор Эзэн байгаагүй. Һалхинай удаа газар хүдэлбэ. Гэбэшье газар хүдэлэлгын дотор Эзэн байгаагүй.

¹² Удаань гал дүлэн болобо. Гэбэшье гал дотор Эзэн байгаагүй. Галай удаа аалихан шэбэнээн дуулдаба.

¹³ Тэрэниие дуулахадаа, Элияа нюураа нэмэргээрээ орёожо, агын аманда гаража зогсобо. Зай, тэрэ дуу шэмээ тэрээнһээ иигэжэ асууба: – Элияа, юу эндэ хэнэбши?

¹⁴ – Түмэн Сэрэгтэ Эзэн, би Танда албалхын тула бии шадалаараа шармайдагби. Теэд Израилиин арад зон Тантай хэһэн хэлсээгээ эбдэжэ, Танда тахил үргэдэг үргэлэй шэрээнүүдые һандаргаажа, лүндэншэдыетнай һэлмээр сабшан усадхаа. Би гансаараа үлөөб, харин намайешье алаха гэжэ забдана, – гэжэ тэрэ хэлэбэ.

¹⁵ – Яба, Дамааскын сүл губи руу ошо. Тиишээ ерэжэ, Хазаһээлые Араамай хаан болгон тоһоло.

¹⁶ Нимшиигэй хүбүүн Еһүүе Израилиин хаан болгон тоһоло. Шапаадай хүбүүн, Абээл-Мэхолаагай Элишаае өөрынгөө орондо лүндэншэ болго.

¹⁷ Хазаһээлэй һэлмэһээ зугадаһан хүн Еһүүгэй гарта орожо үхэхэ. Еһүүгэй һэлмэһээ зугадагша хүн Элишаагай гарта орожо үхэхэ.

¹⁸ Гэбэшье Би долоо мянган хүниие Израильда амиды мэндэ үлөөгөөб. Тэдэ бултадаа Баалда һүгэдөөгүй, тэрэниие үнсэн таалаагүй, – гэжэ Эзэн айладаба.

Элишаае лүндэншын ажалда Эзэнэй дуудалга

¹⁹ Элияа тэндэһээ ябажа, Шапаадай хүбүүн Элишаае газар хахалжа байхадань олобо. Арбан хоёр паар үхэртэй, өөрөө арбан хоёрдохи паар үхэрэй хажууда тэрэ ажал хэжэ байба. Элияа хажуугаарнь гарахадаа, тэрээн дээрэ нэмэргэеэ табиба.

²⁰ Элишаа үхэрнүүдээ орхёод, Элияа гэгшын хойноһоо гүйн: – Аба, эжыгээ таалаад, удаань таниие дахаад ябахыемни зүбшөөгыт, – гэбэ. Элияа тэрээндэ: – Ошо, тиигээд бусаарай. Би яахабиб даа, – гэжэ хэлээ һэн.

²¹ Элишаа тэрэниие орхин ошожо, нэгэ паар үхэрые тахил болгон үүсэлэн гаргаад, буулгыень эбдэн түлижэ, үхэрэй мяха шанаад, зондо үгэбэ, тэдэнь эдибэ. Удаань тэрэ ошожо, Элияа гэгшын туһамаршан болоод, дахаад ябаа һэн.