3 Хаан түрэнүүд 14 - Библи

Еробоһаамай удам хан шэрээһээ бууха гэжэ Ахияа зүгнэнэ

¹ Тэрэ үедэ Еробоһаамай хүбүүн Абияа үбшэлбэ.

² Еробоһаам һамгандаа: – Еробоһаамай һамган гэжэ шамайе танихаар бэшэ болотороо зүһээ хубилгаад, Шилоо руу ошо. Энэ арад түмэнэй хаан болохош гэжэ намда хэлэгшэ Ахияа лүндэншэ тэндэ ажаһуудаг.

³ Арбан хүбэриг хилээмэ, бообо, зүгын бала абаад, тэрээндэ ошо. Хүбүүнтэй юун болохые тэрэ шамда хэлэжэ үгэхэ, – гэбэ.

⁴ Еробоһаамай һамган тон тиимээр хэбэ, Шилоо руу ошоод, Ахияагай гэртэ ерэбэ. Үндэр наһатай болоһон Ахияагай нюдэд харахаяа болинхой байгаа.

⁵ Эзэн Ахияада: – Анхара, Еробоһаамай һамган үбшэн хүбүүн тухайгаа шамайе асуухаяа ерэжэ ябана. Тэрэ зүһээ хубилгаад ерэхэ. Ши тэрээндэ иимэ харюу үгөөрэй, – гэжэ заажа үгэбэ.

⁶ Үүдээр орожо ябааша тэрэнэй абяа дуулаад, Ахияа: – Еробоһаамай һамган, оро наашаа. Юундэ зүһээ хубилгаабши? Би шамда муу мэдээ хэлэхэб.

⁷ Израилиин Эзэн Бурхан иигэжэ айладаа гээд Еробоһаамда ошожо хэлэ: «Юрын улад зоной дундаһаа Би шамайе үргэжэ, Минии арад түмэн болохо Израилиин удамарша болгон табяаб.

⁸ Давидай уг удамһаа хан түрэ һалгаажа, шамда үгөө бэлэйб. Харин ши Минии һургаал заабаринуудые сахижа, Намда таатай хэрэгүүдые үйлэдэн, бүхы зүрхэ сэдьхэлээрээ Намайе даган ябаһан Давид богоолдомни адли бэшэ байбаш.

⁹ Шамһаа урид байгааша зонһоо ши бүри муу хэрэгүүдые эрхилжэ, ондоо бурхад, шудхамал шүтөөнүүдые бүтээжэ, Минии уур хүргэбэш, Намһаа буруу харабаш.

¹⁰ Энээнэйш түлөө Би шинии, Еробоһаамай, уг удам дээрэ гай гасалан татахаб, бага, томо бүхы эрэ үринэрыеш усадхахаб. Хог үтэгжэл юушье үлөөнгүй галдадагтал, шинии уг удамые галдан хаяхаб.

¹¹ Еробоһаамай гэр бүлын хэн нэгэнэй хото дотор наһа барабал, тэрэниие нохойнууд таһа татан эдихэ, хээрэ хэн нэгэнэйнь үхэбэл, огторгойн жэгүүртэн тэрэниие тоншожо эдихэ. Юуб гэбэл, иигэжэ Би, Эзэн, айладаа мүн!»

¹² Мүнөө гэртээ ошо. Хото руугаа оромсооршни, үхибүүншни наһа бараха.

¹³ Израильшууд бултадаа тэрэнэй хойноһоо гашуудаха, хүдөөлүүлхэ, юуб гэбэл, Израилиин Эзэн Бурхан Еробоһаамай гэр бүлэһөө тэрээндэл тааламжатай һайн зүйл оложо, Еробоһаамай гэр бүлэһөө гансал тэрэ зүб гуримаар хүдөөлүүлэгдэхэ.

¹⁴ Израильда шэнэ хааниие Эзэн табиха, тэрэнь тэрэл үдэртөө Еробоһаамай уг удамые үгы хэхэ. Энэ һаяар болохо гээд һананаб.

¹⁵ Уһанда найгажа байһан зэгсэ мэтээр Эзэн Израилиие сохихо, үбгэ эсэгэнэртэнь үгөөшэ энэ һайн газарһаа израильшуудые гаргаха, Евфрат мүрэнһөө сааша тэдэниие хаяха. Ушарынь гэбэл, тэдэ Ашэраа бурханай хүрэгүүдые бүтээжэ, Эзэнэй уур хүргөө.

¹⁶ Еробоһаамай нүгэлэй түлөө, Израилиин уладые нүгэлдэ оруулһанайнь түлөө Эзэн Израилиие орхихо, – гэжэ хэлэбэ.

¹⁷ Еробоһаамай һамган бодожо, Тирцаа руу бусаба. Гэрэйнгээ богоһо алхамсаарнь, үхибүүн наһа барашаба.

¹⁸ Өөрынгөө богоол, Ахияа лүндэншөөр дамжуулан Эзэнэй айладаһанай ёһоор, бүхы израильшууд тэрэнэй хойноһоо гашуудан, хүдөөлүүлбэ.

¹⁹ Еробоһаамай бусад хэрэгүүд – яажа дайлалдаһан, яажа хааншалһаниинь Израилиин хаашуулай угай бэшэг соо бэшээтэй.

²⁰ Тэрэ хорин хоёр жэлэй туршада хааншалаа, тиигээд наһа барахадань, орондонь Надааб хүбүүниинь хан шэрээ эзэлбэ.

Иудын хаан – Рэхобаам

²¹ Соломооной хүбүүн Рэхобаам дүшэ нэгэ наһатайдаа Иудын хаан болоһон байна. Өөртэнь мүргэн зальбардаг байхын тула Израилиин обогуудай газар дайдаһаа Эзэнэй шэлэн абааша Иерусалим хотодо тэрэ арбан долоон жэлэй туршада хааншалаа. Эхэнь Аммооной Наһамаа бэлэй.

²² Иудын улад зон Эзэндэ таагүй хэрэгүүдые эрхилжэ, эсэгэнэрэйнгээ нүгэл бүри арьбадхан, Эзэниие уурлуулба.

²³ Үндэр толгой бүхэнэй оройдо, һаглагар модон бүхэн доро тэдэ мүргэлэй обоонуудые, онгонуудые, Ашэраа бурханай хүрэгүүдые байгуулан бариба.

²⁴ Мүн янхан эрэшүүл тэрэ газарта байгаа. Израилиин улад зонһоо Эзэнэй намнан холодуулагша арадуудай жэгшүүритэй муухай хэрэгүүдые тэдэ хэдэг байгаа.

²⁵ Рэхобаамай табадахи жэлээ хааншалжа байха үедэ Египедэй хаан Шишаак Иерусалимда добтолжо,

²⁶ Эзэнэй Һүмын болон хаанай ордоной баялигуудые олзолон абаба. Бүхы юумэ тэрэ хуряан абаа, Соломооной хэһэн бүхы алтан бамбайнуудыешье абаа.

²⁷ Тэрэ алтан бамбайнуудай орондо Рэхобаам гуулин бамбайнуудые бүтээлгээд, хаанай ордоной үүдэ харууһалагша сэрэгэй ноёдто үгэбэ.

²⁸ Хаанай Эзэнэй Һүмэ руу ошоходонь, харуулшад тэдэ бамбайнуудые абаад ябадаг һэн, удаань харуулай таһаг руу дахин абаашагша бэлэй.

²⁹ Рэхобаамай хэһэн бүхы бусад хэрэгүүд тушаа Иудын хаашуулай угай бэшэг соо бэшээтэй.

³⁰ Рэхобаам ба Еробоһаам бүхы наһаараа дайсад байгаа.

³¹ Рэхобаам наһа баража, Давидай хото соо уг удамайнгаа булаша бунхан соо хүдөөлүүлэгдэбэ. Эхэнь Аммооной Наһамаа бэлэй. Абияам хүбүүниинь орондонь хаан шэрээ эзэлбэ.