2 Угай бэшэг 8 - Библи

Соломооной бусад хэрэгүүд

¹ Эзэнэй Һүмэ болон хаанай ордон хорин жэлэй туршада бариһанайнгаа удаа

² Соломоон Хураам хаанай үгэһэн хотонуудыешье барижа, Израилиин улад зониие тэндэ байрлуулба.

³ Тэрэ Хамаат-Цобаагай газар уһанда дайлажа, эзэлээ бэлэй.

⁴ Зэлүүд хооһон газарта Тадмоор гэжэ хото, мүн эдеэ хоол нөөсэлһэн хотонуудые Хамаадта тэрэ баряа һэн.

⁵ Бүхэ хэрэмтэй, зузаан ханатай, бүхэ үүдэн, суургатай Дээдэ болон Доодо Бэт-Һороониие тэрэ мүн лэ барюулба.

⁶ Баһалаат гэжэ хото, эдеэ хоол нөөсэлһэн бүхы хотонуудые, моридые болон дайшалхы тэргэнүүдые хадагалһан хотонуудые, юрэдөө, Иерусалимда, Ливаанда, бүхы харьяата газар дээрээ барихаяа һанагша юумэеэ Соломоон барюулба.

^7-8 Израилиин зон хээт, эмоор, пэриззии, хиив, евүүс яһатанда добтолжо, газарынь эзэмдээ бэлэй. Тэдэнэй амиды үлэһэн үлдөөсын үхи хүүгэдые, юрэдөө, Израилиин арадһаа бусад зониие, Соломоон зарасанар болгобо. Тэдэ мүнөөшье болотор зарасанарынь зандаа байна.

⁹ Израилиин арад зониие Соломоон хара ажалда зарадаггүй, тэдэ сэрэгшэд, сэрэгэй ноёд, захирагшад, дайшалхы тэргэнүүдэй болон морин сэрэгэй ноёд болон ябадаг һэн.

¹⁰ Соломооной барилгануудта хабаадагша арадые зонхилогшо табан зуун табин харгалзалагша тушаалтан табигдаа бэлэй.

¹¹ Һамгаяа, фараоной басагые, Соломоон Давидай хотодохи ордонһоо ондоо ордон руу, тусхай тэрээндэ гэжэ баригдаһан ордон руу, нүүлгэбэ. Тэрэ иигэжэ хэлээ бэлэй: «Минии һамганшье һаа, тэрэ Израилиин Давид хаанай ордон соо байха ёһогүй, юуб гэхэдэ, энэ газарта ханза оршоно, энэ арюудхагдаһан газар гээшэ».

¹² Һүмын урда тээ табюулһан үргэлэй шэрээ дээрэ Соломоон Эзэндэ түгэс шатаалта үргэл үргэбэ.

¹³ Моисейн ёһо һургаалнуудые сахин, түгэс шатаалта үргэлнүүдые тусхай үдэрнүүдтэ – амаралтын үдэртэ, Һарын шэнэдэ, жэлэй гурбан ехэ һайндэрнүүдтэ: Эһээбэригүй хилээмэнэй һайндэртэ, Түрүүшын ургаса хуряалгын һайндэртэ ба Отогуудай һайндэртэ – үргэдэг байха гэжэ тэрэ дурадхаа һэн.

¹⁴ Давид эсэгынгээ захиралта дүүргэн, санаартадай үдэр бүриин ажал, санаартадта туһалдаг левидүүдэй Бурханиие магтан дуулаха ажалаа жэншэдгүй ябуулхаар гурим Соломоон эмхидхэбэ. Һүмын хашаа бүхэндэ харуул тэрэ табюулаа. Бурханай хүн болохо Давид эсэгынь захяа тиимэ байгаа юм.

¹⁵ Иигэжэ Давид хаанай санаартад болон левидүүд тухай, нөөсэнүүд тушаа захиралта жэншэдгүй сахигдаа һэн.

¹⁶ Иигэжэ Соломоон барилга дүүргэбэ. Тэрэ Һүмын һуури табяа, тэрэл түгэсэтэрнь баряа. Эзэнэй Һүмэ дууһан бүтэн болоо бэлэй.

¹⁷ Удаань Соломоон эдоом арадай газар дайдада оршодог далайн эрьедэхи Эциһоон-Гээбэр болон Элоот руу ошобо.

¹⁸ Хураам тэрээндэ далайн онгосонуудые болон далайгаар тамархадаа дүршэлтэй зарасануудые эльгээгээ бэлэй. Соломооной албатад тэдэнэй онгосонуудта һуужа, Опиир орон руу тамаран ошожо, дүрбэн зуун табин талаант шэжэр алта Соломоон хаанда асараа һэн.