2 Угай бэшэг 4 - Библи

Һүмын хэрэгсэлнүүд

¹ Соломоон хаан үргэлэй гуулин шэрээ бүтээлгэбэ. Тэрэнэй ута-үргэниинь аб адлихан, хорин тохой, харин үндэрынь арбан тохой һэн.

² Тэрэ гуулин түмэрөөр томо түхэреэн амһарта бүтээжэ, Далай гэжэ нэрлэбэ. Утаашаа тэрэ арбан, гүнзэгынь табан, тойруулан гушан тохой хэмжүүртэй һэн.

³ Тэрэ далайн эрмэг тойруулан бухын хүрэгөөр шэмэглэлнүүд хэгдээ. Арбан тохой хэмжүүртэй Далайе тэдэ хоёр шугамаар бүһэлжэ, Далайтай нэгэн ниитэ мэтээр шудхаатай байгаа.

⁴ Тэрэ далай арбан хоёр шудхамал буха дээрэ тодхоотой: гурбаниинь хойто зүг руу, гурбаниинь баруун, үшөө гурбан урда, мүн лэ гурбан зүүн зүгүүд руу харанхай бэлэй. Далай тэдээн дээрэ табяатай, бухануудай уусанууд досоошоо, түб руугаа эрьенхэй байгаа.

⁵ Далайн амһартын хана альганай шэнээн зузаан, захань аягын эрмэгтэл, һалбарһан бадма сэсэг мэтээр надхаад байна. Тэрэ далай гурбан мянган баата уһанай багтаамжатай байгаа.

⁶ Угааха арбан амһарта тэрэ хүүлэжэ, таба табаар хоёр талаар табюулба. Түгэс шатаалта үргэл үргэхэ юумэн тэндэ зайладаг һэн. Далай соо санаартад бэеэ угаадаг байгаа.

⁷ Хэхэ ёһотой хэм соонь арбан алтан дэнгэй табюур хаан хүүлэжэ, нангин үргөө соо табяад, таба табаар хоёр талаар табюулба.

⁸ Арбан алтан шэрээ бүтээлгэжэ, нангин үргөө соо таба табаар хоёр талаар тэрэ табюулаа бэлэй. Шуһа сүршэхэ алтан зуун аяга мүн лэ тэрэ хүүлэбэ.

⁹ Хоёр хашаа Соломоон барюулба: нэгэнь санаартадай хашаа; нүгөөдэнь үргэн гэгшын дотор хашаа, тэрээн руу орохо үүдэнүүд гуулин түмэрөөр дабтаһан байгаа.

¹⁰ Тэрэ Далайе баруун талада, Һүмын зүүн урда зүгтэ табюулаа һэн.

¹¹ Хураам-Абии тогоо, хүрзэхэнүүдые, сүршэхэ аягануудые дархалба. Хураам-Абии Соломоон хаанай захиралтаар Бурханай гэртэ хэжэ байгааша бүхы ажалаа дүүргээ бэлэй. Тэрэнэй бүтээһэн хэрэгсэлнүүдые онсолон дахин нэрлэбэл:

¹² хоёр бахана; бахананууд дээрэ табюур; тэдэ табюурнуудые хушаһан шүүмэр;

¹³ шүүмэрнүүд дээрэ дүрбэн зуун сүмбэрүү сэсэг, хоёр шугамаар шүүмэр бүхэн дээрэ;

¹⁴ табюурнууд, тэдээн дээрэ угаалгын һабанууд;

¹⁵ нэгэ далай, мүн далайе тэлэн үргэгшэ арбан хоёр буха;

¹⁶ тогоо, хүрзэхэнүүдые, һэрээ тэрэ хээ. Соломоон хаанай захиралтаар Эзэнэй Һүмэдэ зорюулаатай эдэ бүхы хэрэгсэлнүүдые Хураам-Абии гуулин мэлигэр түмэрөөр хээ бэлэй.

¹⁷ Иордан голой хажууда, Суккоот болон Цэрэдаа хоёрой хоорондо шабар дүрсэнүүд руу гуулин шудхан тэдэ бүтээлнүүд хаанай захиралтаар бүтээгдээ һэн.

¹⁸ Иигэжэ Соломоон хаанай захиралтаар хэрэгсэлнүүд угаа олоор хэгдэжэ, хэды шэнээн гуулин түмэрэй гаргашалагдаһые мэдэхын аргагүй байгаа бэлэй.

¹⁹ Бурханай гэрэй үшөө бусад хэрэгсэлнүүдые Соломоон хаан дархалуулба: үргэлэй алтан шэрээ, Эзэнэй урда табигдадаг талхан үргэлэй шэрээнүүдые;

²⁰ хамагай нангин газарай урда носоодог ёһоор носоохо дэнгүүдые табюурнуудтайнь сэбэр алтаар;

²¹ сэсэгүүдые, дэнгүүдые, хабшуурнуудые – булта эгээл шанартай шэжэр алтаар;

²² хайша, сүршэдэг аяга, уталгын амһарта, бойпуурнуудые, хайруул сэбэр алтаар. Хамагай нангин газар руу ородог дотор үүдэнүүд, мүн Һүмын гол таһалгын үүдэнүүдшье алтаар хэгдэнхэй байгаа.