2 Угай бэшэг 34 - Библи

Ёшияа – Иудын хаан

¹ Ёшияа найма наһатайдаа хаан боложо, гушан нэгэн жэлэй туршада Иерусалимда хааншалаа.

² Тэрэ Эзэндэ таарамжатай үйлэ хэрэгүүдые хэжэ, зүүн баруун тээшээ хадуурангүйгөөр, өөрынгөө үбгэ эсэгэ Давидай жэшээ даган, зүб замаарнь ябаа.

³ Үшөө гүлмэр залуу байхадаа, хааншалалгынгаа наймадахи жэлдэ элинсэг эсэгэ Давидай Бурханда тэрэ мүргэжэ эхилээ. Хааншалалгынгаа арбан хоёрдохи жэлдэ Иудын болон Иерусалимай газар дайдые обоонууд дээрэ түхеэрһэн үргэлэй шэрээнүүдһээ, Ашэраа бурханда зальбардаг сарса модон шүтөөнүүдһээ, һиилэһэн, шудхаһан дүрсэнүүдһээ тэрэ сүлөөлбэ.

⁴ Захирһанайнь ёһоор Баалнуудта зорюулагдаһан үргэлэй шэрээнүүдые болон тэдээндэ дүтэ байгааша уталга ууюулдаг шэрээнүүдые албатаниинь үгы хэбэ. Ашэраа бурханай хүрэгүүдые, шудхаһан бусад хүрэгүүдые Ёшияа бута сохибо. Тиигээд хумхаа тооһон болотор бутаргаад, тэдээндэ үргэл үргэгшэ зоной хүүр дээрэ тэрэ хиидхүүлбэ.

⁵ Тэдээндэ үргэл үргэгшэ санаартадай араг яһые үргэлэй шэрээнүүд дээрэнь тэрэ шатааба. Иигэжэ тэрэ Иуда болон Иерусалимые бузарһаань арюудхаба.

⁶ Мэнашшээ, Эпрааим, Симеоной, мүн Напталиигай хотонуудаар тэрэ һэлмээр сабшан иимэ хэрэгүүдые ябуулба.

⁷ Үргэлэй шэрээнүүдые болон Ашэраа бурханай мүргэлтэй мододые Ёшияа үгы хэбэ. Хүрэгүүдые тооһон болотор тэрэ бута сохибо, уталгын бүхы шэрээнүүдые Израилиин газар дайдаар һалгааба. Тиигээд тэрэ Иерусалим руу бусаа һэн.

Ёшияа Һүмые шэнэлэн бодхоно

⁸ Арбан наймадахи жэлээ хааншалжа байхадаа, газар дайда болон Бурханай Һүмэ арюун болгоһоной удаа тэрэ Ацаалияагай хүбүүн Шапааниие, хотын дарга Маашэяае, Ёахаазай хүбүүн, түүхэ бэшэгшэ Ёһаае Эзэнэй һүмэ заһабарилхыень эльгээбэ.

⁹ Һүмын үүдэ харууһалагша левидүүд Мэнашшээгэй, Эпрааимай болон Израилиин бусад обогуудай зоной, Иудын болон Бэньямиинэй, Иерусалимай уладай Бурханай энэ һүмэ руу асарагша алта мүнгые суглуулаа бэлэй. Тэрэ мүнгые эдэ гурбан ахамад санаартан Хилкияада үгэбэ.

¹⁰ Удаань энэ мүнгэн Эзэнэй һүмэ заһабарилжа байгааша хүдэлмэришэдтэ дамжуулха зорилготойгоор тэрэ заһабарилгын ажал хинагша зондо үгтөө һэн.

¹¹ Үшөө Иудын хаашуулай муудхааһан гэрнүүдые заһабарилха хэрэгтэ хабтагайлжа хайһан шулуунуудые, гэр модо худалдажа абахыень модошо дархашуулда, барилгашадта тэрэ мүнгэнһөө үгтөө бэлэй.

¹² Бурханда этигэдэг зон тэндэ хүдэлөө. Тэдэниие хинахаар Мэрариин үри һадаһад, левидүүд Яахат ба Обадияа, Кэһаадай үри һадаһад Захарияа ба Мэшуллаам табигдаа. Хүгжэмэй зэр зэмсэгүүд дээрэ наадажа шададаг бүхы левидүүд

¹³ ашаа тэлэн ябааша зоной ажал хинадаг, мүн бүхы ажалшадые хинан байгаа. Левидүүдэй заримань бэшээшэд, хинадаг дарганар, үүдэ харууһалагшад байгаа бэлэй.

¹⁴ Эзэнэй һүмэ руу асарааша алта мүнгэ тэдэнэй гаргажа байхада, Хилкияа санаарта Моисейгээр дамжуулһан Эзэнэй Хуулиин ном олобо.

¹⁵ Тиигээд Хилкияа Шапаан бэшээшэдэ хандажа: – Би Эзэнэй һүмэ соо Хуулиин ном олооб, – гээд, хуйламал бэшэг Шапаанда үгэбэ.

¹⁶ Шапаан тэрэ хуйламал бэшэгые хаанда абаашаад, иигэжэ дуулгаба: – Албатантнай даалгагдаһан бүхы юумэ хэнэ.

¹⁷ Эзэнэй һүмэ соо олодоошо алта мүнгэ адхажа, хинагшадта болон хүдэлмэришэдтэ дамжуулаа.

¹⁸ Хаанда мүн лэ тэрэ иигэжэ хэлэбэ: – Хилкияа санаартан намда ном үгөө. Тиигээд тэрэ номые Шапаан хаанда уншаба.

¹⁹ Һургаалай үгэнүүдые хаан дуулахадаа, уйдажа, хубсаһа хунараа удара татаба.

²⁰ Тиигээд хаан Хилкияада, Шапаанай хүбүүн Ахикаамда, Михаагай хүбүүн Авдоондо, Шапаан бэшээшэдэ болон хаанай зараса Асайяада хандан захирба:

²¹ – Ошогты, Эзэнһээ нам тухай, Израилиин, Иудын үлөөшэ арад зон тухай һурагты: Мүнөө олдогшо ном соохи бэшэлгэ бидэндэ ямар удхатайб? Юуб гэхэдэ, энэ ном соо бэшээтэй бүхы юумэ үбгэ эсэгэнэрнай сахин байгаагүй, Эзэнэй үгэ дуулаагүй, тиимэһээ Эзэн маанадта угаа ехэ уур хилэнсэгтэй байна.

²² Хилкияа болон хаанай эльгээгшэ бусад зон Хулдаа гэдэг лүндэншэ эхэнэртэй хөөрэлдэхэеэ ерэбэ. Хулдаа хадаа санаартадай хубсаһа хадагалдаг Шаллуумай һамган бэлэй. Шаллуум болбол Токһаадай хүбүүн, Хасраагай аша бэлэй. Хулдаа Иерусалимай хоёрдохи тойрогто ажаһуудаг һэн. Тэдэнэр ерэһэн хэрэгээ тэрэ эхэнэртэ хэлэбэд.

²³ Хулдаа тэдээндэ иигэжэ хэлэбэ: – Таанадые нам руу эльгээгшэ хүндэ иигэжэ дамжуулагты гээд Израилиин Эзэн Бурхан айладхана:

²⁴ Удахагүй, тон һаядаа Би энэ хотодо, тэндэхи хүнүүдтэ гай тодхор эльгээхэб. Иудын хаанда уншаһан ном соохи бэшэлгэ бүхыдөө бэелүүлэгдэхэ.

²⁵ Юундэб гэхэдэ, тэдэ Намайе орхижо, ондоо бурхадта уталгануудые ууюулдаг байгаа. Иигэжэ тэдэнэй хэһэн хэрэгүүд Минии сухал хүргэбэ. Энэ газарта Минии уур хилэн бушаганажа, унтархагүй.

²⁶ Эзэнһээ асуухаяа таанадые эльгээһэн Иудын хаанда иигэжэ дамжуулагты! «Эзэн, Израилиин Бурхан шамда уншажа үгэһэн номой тэдэ үгэнүүд тухай иигэжэ хэлэнэ:

²⁷ Гэмээ мэдэрһэнэйш түлөө, энэ газар болон ажаһуугшад тушаань Бурханай үгэнүүдые дуулахадаа, даруу номгон болоһонойш түлөө, гашуудан, хубсаһа хунараа удара татаһанайш, Минии урда бархирһанайш түлөө Би шамайе анхарааб гэжэ Эзэн айладхана.

²⁸ Би шамайе үбгэ эсэгэнэртэшни тайбан мордохуулхаб. Ши амгалан тайбанаар өөрынгөө уг удамуудай агы нүхэн хуурсаг соо нойрсохош. Тиихэдээ ши энэ хотодо болон ажаһуугшадтань эльгээһэн Минии гай тодхорые харахагүйш». Энэ харюу хаанда дамжуулагдаба.

Ёшияа арад зон Бурхан хоёрой хоорондохи хэлсээе шэнээр батална

²⁹ Тиихэдэ хаан Иерусалимай ба Иудын бүхы аха захатадые тэрээндэ сугларан ерэхэ захиралта үгэбэ.

³⁰ Тэрэ Эзэнэй һүмэдэ оробо. Тиихэдэнь бүхы Иуда ба Иерусалимда ажаһуугшад, санаартад, лүндэншэд болон бага ехэгүй арад зон барандаа тэрэнэй хойноһоо дахажа, Эзэнэй һүмэдэ оробо. Хаан Эзэнэй һүмэдэ олдоһон Хэлсээ баталгын хуйламал бэшэг тэдээндэ уншажа үгэбэ.

³¹ Хаан өөрынгөө газарта зогсоод, Эзэниие дахан ябаха, энэ ном соо бэшээтэй хэлсээнэй үгэнүүдые бэелүүлхын тула һургаал заабаринуудынь, захиралтануудынь, хуули ёһонуудынь бүхы сэдьхэлһээ, үнэнхэ зүрхэнһөө сахин байха тушаа хэлсээ баталба.

³² Иерусалимда болон Бэньямиинэй газар дайдада байгааша улад зониие бултыень иимэ найдуулга үгэхыень тэрэ захирба. Иерусалимай арад зон элинсэг хулинсагайнгаа Бурхантай баталһан хэлсээнэй ёһоор хэрэгүүдые эрхилдэг болобо.

³³ Израилиин арад зоной бүхы газар уһанһаа жэгшүүрилтэ муухай хүрэгүүдые Ёшияа зайсуулба, Израилиин дайдада байгаа бүхы зондо Эзэн Бурхандаа шүтэн мүргэхые захирба. Тэрэнэй амиды мэндэ байгаа сагта улад зон үбгэ эсэгэнэрэйнгээ Эзэн Бурханаа орхёогүй бэлэй.