2 Угай бэшэг 30 - Библи

Хэзэкияа Паасхын һайндэр тэмдэглэнэ

¹ Израилиин Эзэн Бурханда Паасха хэхэеэ Иерусалим руу, Эзэнэй Һүмэдэ, ерэхэ тухай зар тунхаг Хэзэкияа Израилиин болон Иудын бүхы газар дайдаар эльгээжэ, Эпрааимай болон Мэнашшээгэй обогуудай зондо бэшэг бэшэбэ.

^2-4 Олохон санаартад бэеэ арюудхаадүй, арад зон Иерусалимда суглараадүй байһанһаа боложо, Паасхые саг соонь үнгэргэжэ шадахагүй байба. Тиимэһээ Паасхые хоёрдохи һарада һайндэрлэхэ гэһэн шиидхэбэри хаан, түшэмэлнүүдынь ба Иерусалимда сугларааша зон зүблөөн дээрэ шиидэбэ.

⁵ Бэшэн тогтооһоной ёһоор Паасха үнинэй үнгэргөөгүй һэн тула мүнөө одоол һайнаар үнэгргэхын тула Иерусалим руу ошохо тухай бүхы Израиляар, Бэһээр-Шээбэһээ Даан хүрэтэр, зарлан тунхаглаха гээд тэдэ тогтообо.

⁶ Иигэжэ хаанай болон түшэмэлнүүдэйнь бэшэгүүдые абанхай элшэд Израилиин болон Иудын газар дайдаар ябажа, хаанай захяа заабаряар иигэжэ хэлэн байба: – Израилиин арад зон, Абраһаамай, Исаагай болон Израилиин Эзэн Бурханда эрьегты! Ассириин сэрэгэй һүүлээр амиды мэндэ үлөөшэ танай зондо Тэрэ тиихэдэ эрьехэл.

⁷ Үбгэ эсэгэнэртнай болон арадайтнай заримашуул өөрынгөө Эзэн Бурханиие шүтэнгүй байгаа, тиихэдэнь Тэрэ олохонииень усадхаа. Энээниие таанад өөһэдөө хараат. Тэдээндэл адли бү байгты.

⁸ Мүнөө үсэрхэжэ бү байгыт, эсэгэнэртээ адли бү болыт. Эзэнтэй эблэрыт, хэтэ мүнхэдөө Тэрэнэй арюудхаһан нангин үргөө руу ерэгты, Эзэн Бурхандаа алба хэгты, тиихэдэ Тэрэ таанадта уурлахаяа болихо.

⁹ Эзэндэ эрьехэдэтнай, арад зонииетнай, үхи хүүгэдытнай баряанда баряад байгша зон хайрлажа эхилхэ, тиигээд өөрын газар уһан руу тэдэ бусажа шадаха. Эзэн Бурхантнай энэрхы, хайрлаха сэдьхэлтэй, Тэрээндэ шүтэжэ эхилхэдэтнай, таанадһаа буруу харахагүй.

¹⁰ Эпрааимай ба Мэнашшээгэй обогуудай газарһаа эхилээд, Зэбүлүүнэй обогой газар хүрэтэр элшэнэр ябаба, харин улад зон тэдээниие наадалжа, баһажа байба.

¹¹ Гэбэшье Ашээрэй, Мэнашшээгэй болон Зэбүлүүнэй обогуудай зарим зон дуулажа, Иерусалим руу ерэбэ.

¹² Бурхан үйлэ хэрэг ябуулжа, Иудын улад зониие хаанай болон түшэмэлнүүдэй захяа заабари нэгэн хүн шэнгеэр дүүргэхөөр болгобо.

¹³ Эһээгээгүй Хилээмэнэй һайндэр һайндэрлэхэеэ Иерусалимда хоёрдохи һарада угаа ехэ улад зон сугларба.

¹⁴ Иерусалим соо байгааша үргэлэй болон уталгын шэрээнүүдые тэдэ һандаргаажа, Кидрооной хүнды руу хаяба.

¹⁵ Хоёрдохи һарын арбан дүрбэдэхи үдэр тэдэ Паасхын хурьгадые үүсэлэн гаргаба. Санаартад болон левидүүд эшэжэ, бэеэ арюудхаба. Тиигээд тэдэ Эзэнэй Һүмэ руу түгэс шатаалта үргэл асарба.

¹⁶ Бурханай хүн Моисейн хуули ёһоор, тэдэ Эзэнэй Һүмэ соо өөрын һуури эзэлбэ. Левидүүд санаартадта үргэлэй шуһа дамжуулан үгэжэ, санаартад тэрэ шуһые үргэлэй шэрээ дээрэ дуһалуулба.

¹⁷ Бэеэ арюудхаагүй зон эндэ олон байжа, тэдэ Паасхын хурьгадые гаргажа шадахагүй һэн тула левидүүд орондонь тэдэ хурьгадые үүсэлэн гаргажа, Эзэндэ зорюулан үргөө бэлэй.

¹⁸ Эпрааимай, Мэнашшээгэй, Иссахаарай болон Зэбүлүүнэй обогуудай олохон зон бэеэ арюудхаагүй байгаа. Гуримай ёһоор тэдэ Паасха эдихэ ёһогүй һэн, гэбэшье эдибэ, юуб гэхэдэ, Хэзэкияа тэдэнэй түлөө зальбаран мүргөө: – Эзэн һайн, хүлисэхэ

¹⁹ бүгэдые, хэн үбгэ эсэгэнэрэйнгээ Эзэн Бурханда үнэнхэ зүрхэнһөө шүтэжэ эхилнэб, бэеэ арюудхаагүйшье һаа!

²⁰ Эзэн Хэзэкияае дуулажа, арадые хүлисэбэ.

²¹ Иерусалимда сугларагша Израилиин арад түмэн Эһээгээгүй Хилээмэнэй һайндэр долоон үдэрэй туршада угаа хүхилдэн үнгэргэбэ. Левидүүд болон санаартад Эзэниие магтан дуулахада хэрэгтэй хүгжэмэй зэбсэгүүд дээрэ наадан, Эзэндэ магтаал үдэр бүри үргэн байгаа.

²² Эзэнэй һайндэрые һайнаар үнгэргэжэ байгааша левидүүдые Хэзэкияа магтаба. Амгалан байдалай түлөө үргэл үргэн, үбгэ эсэгэнэрэйнгээ Эзэн Бурханиие магтан, иигэжэ долоон хоногой туршада тэдэ һайндэрэй эдеэ бариба.

²³ Сугларагшад үшөө долоон хоногой туршада һайндэрлэхэ гэжэ шиидээд, эдэ долоон хоногые хүхилдэн сэнгэн үнгэргэбэ.

²⁴ Иигэжэ Иудын Хэзэкияа хаан нэгэ мянган буха болон арба мянган хони улад зондо үгөө бэлэй. Мүн лэ түшэмэлнүүд нэгэ мянган буха, арба мянган хони үгэбэ. Санаартадшье олоор бэеэ арюудхаад байгаа.

²⁵ Иудаһаа, Израильһаа ерээшэд, санаартад болон левидүүд, Израилиин болон Иудын хан түрэнүүдтэ ажаһуугааша ерүүл зон, юрэдөө, бултадаа хүхилдэн сэнгэн байгаа бэлэй.

²⁶ Иерусалимда агууехэ хүхилдөөн-сэнгээн болоо һэн. Израилиин хаан, Давидай хүбүүн Соломоонойшье үе сагһаа хойшо иимэ ехэ баяр сэнгээн Иерусалимда үзэгдөөгүй бэлэйл.

²⁷ Санаартад болон левидүүд улад зондо үреэл гуйн, Эзэндэ зальбарба. Огторгойдохи нангин үргөө сооһоо Эзэн тэдэнэй зальбарһан абяа дуулаа бэлэй.