2 Угай бэшэг 3 - Библи

Соломон Һүмэ барина

¹ Соломооной эсэгэ Давид Һүмын оршохо газар үни тодорхойлһон байгаа. Тэрэ газарынь хадаа Иерусалимда, Эзэнэй Давидта зааһан Мориһаа гэжэ хада дээрэ, евүүс хүн Арнаанай орооһо сохидог һуурида бэлэй. Соломоон тэндэ Эзэнэй Һүмын барилга эхилбэ.

² Хаан түрые зонхилжо эхилһэнһээ хойшо дүрбэдэхи жэлэй хоёрдохи һарада тэрэ барилга захалаа бэлэй.

³ Бурханай Һүмын һууриие Соломоон утаашаа жаран тохой, хүндэлөөшөө хорин тохой гээд табяа һэн.

⁴ Һүмэ руу орохо талаһаа үшөө нэгэ таһалга баригдаа. Тэрэ Һүмын хүндэлөөшөө байгша хэмжүүр хорин тохой үргэн, дээшээ зуун хорин тохой үндэр, досоо талаһаа шэжэр алтаар хушаатай һэн.

⁵ Гол таһалга кипарис модоор, эгээл һайн алтаар гоёон хушагдажа, пальма модоной болон гэнжын түхэл маягууд һиилэгдээ бэлэй.

⁶ Соломоон хаан гол таһалгые гоё һайхан үнэтэ шулуунуудаар шэмэглээд, Парвааһимһаа асарагдаһан алтаар

⁷ гэрэй хушалтын модо досооһоонь, богоһонуудые, хана, үүдэнүүдые хушаба. Тиигээд тэрэ ханануудаар далитай амитад – херүүбүүдые һиилүүлээ бэлэй.

⁸ Һүмэ соо эгээл нангин газар тэрэ таһалан хэхэдээ, ута-үргэниинь аб адли, хорин тохой тэбхэрхэн газар таһалан амяарлаад, зургаан зуун талаант шэжэр алтаар хушаба.

⁹ Табин шээкэл алтан ганса хадааһануудые шудхахада гаргашалагдаа бэлэй. Дээдэ таһалгануудые тэрэ мүн лэ алтаар хушаба.

¹⁰ Удаань тэрэ хоёр херүүбые һиилэн хүүлэжэ, Эзэнэй Һүмын эгээл нангин газарта табюулаад, алтаар хушан шэмэглэбэ.

^11-13 Херүүб бүхэн хоёр далитай, табан тохой утатай нэгэ далинь хана хүрэн дэбеэтэй, мүн лэ иимэ утатай нүгөө далинь хоёрдохи херүүбэй дэбеэтэй далитай шэргэлдэн байгаа. Тэдэ амитад хүл дээрэ зогсонхой, энэ таһалга руу ородог газар тээшэ нюураараа шэглэнхэй бэлэй. Иигэжэ хоёр амитадай дүрбэн дали хорин тохой утаашаа дэбеэтэй, эгээл нангин таһалгын бүхы үргэниие эзэлэнхэй һэн.

¹⁴ Эгээл нангин газар-таһалга гол таһалгаһаа бүд хүшэгөөр таһалагдаатай бэлэй. Тэрэ хүшэгэ хүхэ, үдхэн улаан мүн улаан үнгэтэй бүдөөр, мүн нарин улһаар хэгдэнхэй һэн. Дээрэнь тэрэ херүүбүүдэй дүрсэнүүдые урлан шэрүүлбэ.

Хоёр зэд бахана

¹⁵ Һүмын урда тээ табиха хоёр бахана тус тустаа гушан табан тохой үндэртэй бодхоожо, Соломоон бахана бүхэн дээрэ табан тохой үндэртэй мунса байгуулба.

¹⁶ Тэрэ гэнжэ хүүлэжэ, гэнжээр баханануудай дээдэ талые шэмэглүүлбэ. Тиигээд тэрэ зуун анар жэмэс һиилэн дархалуулжа, гэнжэдэ бүхэлэн гоёолгобо.

¹⁷ Удаань хаан баханануудые Һүмын урда тээ үүдэнэйнь баруун ба зүүн талада табижа, баруун талын баханые Яхиин, зүүн талынхиинь Бооһаз гэжэ нэрлэбэ.