2 Угай бэшэг 23 - Библи

Атаалияагай эсрэг буһалгаан

¹ Долоодохи жэлэй ябажа байхада Ёядаа санаартан хэрэг эрхилхэ эдэбхи үүсхэл гарган, сэрэгэй ноёдтой хэлсээ холбоотой болобо. Хэдтэйб гэбэл, Ероһаамай хүбүүн Азаарияатай, Ёханаанай хүбүүн Ишмаһээлтэй, Обээдэй хүбүүн Азаарияатай, Адаяа гэгшын хүбүүн Маашэяатай, Зихриигэй хүбүүн Элишапаадтай.

² Тэдэ Иудын бүхы хотонуудаар ябажа, левидүүдые болон айл хотонуудай удамаршадые суглуулжа, Иерусалим руу ерүүлбэ.

³ Тэндэ Бурханай гэр соо тэдэ суглараад, Ёһаашда туһалха тухай хаантай хэлсээ баталба. Ёядаа иигэжэ тэдээндэ хэлэбэ: – Давидай үри һадаһад хододоо хаан шэрээ эзэлэн һууха гэжэ Эзэн айладхаа һэн шуу. Тиимэһээ хаанай хүбүүн хаан байха ёһотой.

⁴ Таанад иимэ юумэ хэгты: субботодо ажалдаа гараха ёһотой санаартадай болон левидүүдэй гурбанай нэгэ бүлэг Һүмын үүдэнүүдые харууһалаг,

⁵ нүгөөдэнь хаанай ордониие, гурбадахинь гол үүдые харууһалан байха. Бүхы арад зон Эзэнэй гэрэй хашаанууд соо байха.

⁶ Санаартад болон левидүүдһээ бэшэ хэншье Эзэнэй гэр руу орохо ёһогүй. Санаартад болон левидүүд арюудхалай ёһолол хүүлэһэн, тиимэһээ орохо эрхэтэй. Харин бусад бүхы зон Эзэнэй айладхал сахин, газаа байха зэргэтэй.

⁷ Левидүүд зэр зэбсэгээ баряад, хааниие алишье талаһаань аршалан, бүһэлэн тойрожо зогсогты! Хаанашье ошоходонь, хааниие үдэшэгты! Һүмэ руу ороһон хүн алуулха!

⁸ Ёядаа санаартанай захирһан бүхы юумыень левидүүд болон Иудын арад зон дүүргэбэ. Субботын үдэр харуулай албанда гарагшад, мүн тэрэ үдэр амарагшад өөһэдынгөө зуутануудай дарганартай хамта ерэбэ, юуб гэхэдэ, Ёядаа санаартан харуул таһалдангүй зогсохо ёһотой гээд хэлээ бшуу.

⁹ Ёядаа Эзэнэй һүмэ соо Давид хаанай хадагалаанда байһан жадануудые, ехэ ба бага бамбай хуягуудые зуутадай дарганарта тарааба.

¹⁰ Тиигээд тэрэ хүн бүхэндэ зэр зэбсэг барюулаад, хааниие зүг бүхэнһөө харууһалжа, Һүмын урда талаһаа хойто тала хүрэтэр, мүн һүмын хорёо соохи үргэлэй шэрээн дэргэдэ табиба.

¹¹ Ёядаа болон хүбүүдынь хаанай хүбүүн Ёһаашые газаа гаргаад, хаанай титим үмэдхүүлжэ, хаанай нэрэ түрын тэмдэг барюулжа, оливын тоһо толгойдонь түрхеэд, хаан болоһыень соносхобо. Арад зон: «Хаан мандаха болтогой!» – гэжэ хашхаралдабад.

¹² Атаалияа хаанда магтаал дуудан гүйлдэһэн арад зонниие дуулаад, Эзэнэй һүмэдэ ошобо.

¹³ Атаалияа хаашуулай зогсодог баханануудай хажууда үндэр тайзан дээрэ хааниие, сэрэгэй дарганарые, эбэр бүреэ үлеэгшэдые болон хүхилдэн байһан арад зониие хараад, эбэр бүреэнүүдэй хүнхинэн зэдэлхые, хүгжэмэй зэмсэг бариһан дуушадай магтаал дуулаһые шагнаад, хубсаһаяа таһар удхар шууламсаараа: – Урбалта! Урбалта! – гэжэ хашхарба.

¹⁴ Санаарта Ёядаа бүлэг сэрэгүүдые ударидадаг зуутадта хандажа: – Тэрэ эмые Һүмэһөө гаргагты, тэрэнэй тала баригшадые алагты! – гэжэ захирба. Эзэнэй һүмэ соо тэрэниие бү алагты гэжэ санаартан хэлэбэ.

¹⁵ Атаалияае барижа гаргаад, хаанай ордоной Моридой хаалта үүдэн тээшэ абаашаад алаба.

¹⁶ Санаарта Ёядаа арад зоноо Эзэнэй арад болгохын тула Эзэндэ үнэн сэхэ байха тухай хэлсээ Эзэнэй болон өөрын, арад түмэнэй, хаанай хоорондо баталба.

¹⁷ Тиигээд тэдэ бултадаа Баалай һүмэдэ ошожо һандаргаад, үргэлэй шэрээнүүдые, бурхадай һүрэгүүдые үй бута сохёод, Баалай санаарта Маттааниие үргэлэй шэрээнүүдэй урда алаба.

¹⁸ Санаартад болон левидүүдтэ Эзэнэй һүмын ажал хэрэгүүдые ябуулхыень Ёядаа даалгаба. Тэдэ Давид хаанай зарлигай ёһоор, харуулда зогсохо, Моисейн хуулиин ёһоор, Эзэндэ түгэс шатаалта үргэлнүүдые үргэхэ уялгатай бэлэй. Мүн найр наадануудай үедэ баяр баясхалан, дуу хүгжэм дэлгэрүүлхэ ёһотой һэн.

¹⁹ Арюун бэшэ хэн нэгэнэй орохогүйн тула тэрэ Эзэнэй гэрэй үүдэнүүдэй хажууда харуул табиба.

²⁰ Тиигээд зуутанай дарганар, түшэмэлнүүд, арадай удамаршад, бүхы арад зон Ёядаа санаартантай хамта хааниие Эзэнэй һүмэһөө гаргаад, гол үүдэнүүдээр хаанай ордон руу ороторынь үдэшэн ябажа, хаан шэрээдэнь заларуулба.

²¹ Бүхы арад зон баярлажа хүхилдэбэ. Атаалияагай һэлмээр сабшуулан алуулагдаһан хойно хото дотор амгалан тайбан байдал тогтоо һэн.