2 Угай бэшэг 2 - Библи

Һүмэ бариха хэрэгтэ бэлэдхэл

¹ Эзэндэ мүргэдэг Һүмэ болон хаанай ордон бариха тухай Соломоон захирба.

² Дала мянган хүниие барилгын модо, шулуу зөөхэ, ная мянгые хада хабсагайһаа шулуу сабшаха ажалда тэрэ татаба. Мүн тиихэдэ гурба мянга зургаан зуун хүниие тус ажал хүдэлмэри харгалзалха уялгатайгаар тэрэ томилоо бэлэй.

³ Тиигээд Тиирэй Хураам хаанда Соломоон иимэ гуйлта эльгээбэ: – Минии эсэгэ Давидай өөртөө ордон барижа байхада та үнэтэ хуша модо олоор эльгээдэг һэнта. Мүнөө намда тиигэжэ туһалхагүй гүт?

⁴ Эзэн Бурхандаа магтаал соло үргэхэ Һүмэ би барижа байнхайб. Тэндэ бидэ анхилма һайхан үнэртэй уталга ууюулхабди, нангин хилээмэ саг үргэлжэ дурадхан байхабди, түгэс шатаалта үргэлнүүдые үглөө, үдэшэ бүри, Амаралтын үдэр, Һарын шэнэ, Эзэн Бурхандаа магтаал соло үргэхэ һайндэр бүхэндэ үргэжэ байхабди. Израилиин арад зоной хэтэ мүнхэдөө энээниие сахин байха тухай Эзэн Бурхан захираа бэлэйл.

⁵ Минии барижа эхилһэн Һүмэ хадаа угаа ехэ, юуб гэхэдэ, манай Бурхан бусад бурхадһаа угаа ехэ юм.

⁶ Гэбэшье Тэрэнэй багтахаар Һүмэ хэн барижа шадахаб? Огторгойн уудамшье Тэрээние багтаажа шаданагүй бшуу! Тиин Тэрээндэ Һүмэ барижа байхаар Би хэн гээшэбиб? Гансал Тэрээндэ уталга ууюулха газар зохёон бариха шадалтайб.

⁷ Мүнөө намда уран дарханиие эльгээжэ хайрлыт. Тэрэ алташа, мүнгэшэ, гуулинша, түмэршэ дархан байха ёһотой, бүдтэй ажал хэхэ дүрэ шадалтай, мүн һиилэхэ ажал мэдэхэ байха зэргэтэй. Танай эльгээһэн тэрэ дархан минии эсэгэ Давидай хүлһэлэн асарһан уран дархашуултай хамта эндэ, Иудын хан түрэдэ болон Иерусалимда, ажал хэхэ.

⁸ Танай албатан Ливаанай ой модо бэлдэхэдээ дүрэтэй бэрхэ гээд мэдэнэм. Намда үнэтэ хуша модо, кипарис, зандан ой модо эльгээгыт. Минии албатан тиишээ ошожо, танай ажалшадтай хамта ажал хэхээр бэлэн байна.

⁹ Юуб гэхэдэ, намда угаа олон модон хэрэгтэй. Ехэ мантан, гайхалтай һонин Һүмэ би бариха һанаатайб.

¹⁰ Модо бэлдэгшэ танай албатанда би хорин мянган кооро шэниисэ, тон тиимэ хэмжүүртэй ешмээн, хорин мянган баата үзэмэй дараһан архи, тон тиимэ хэмжүүрэй оливын тоһо үгэхэб.

¹¹ Тиирэй хаан Хураам Соломоондо иимэ харюу бэшээд, эльгээбэ: – Эзэн Өөрын арад түмэндэ дуратай байһандаа таниие хаан болгон дээрэнь табяа.

¹² Огторгой болон газар бүтээгшэ, Давид хаанда сэсэн мэргэн, ухаатай хүбүү үршөөгшэ Израилиин Эзэн Бурхан үреэл буянтай! Тэрэ хүбүүниинь Эзэндэ Һүмэ болон хаанта ордон өөртөө бариха эрдэм ухаатай.

¹³ Мүнөө би танда сэсэн мэргэн, эрдэмтэй бэрхэ Хураам-Абии гэжэ хүниие эльгээнэб.

¹⁴ Тэрэнэй эхэ Израилиин Даан обогой, эсэгэнь Тиир хотын хүн. Хураам-Абии гэгшэ алташа, мүнгэшэ, гуулинша, түмэршэ, шулууша, модошо дархан, ямаршье нарин, үнэтэй бүдые элдэб үнгэтэй болгон будаха шадабаритай, һиилэхэдээ бэрхэ, даалгаһан даабарииетнай тон наринаар дүүргэжэ шадаха. Тэрэ танай дархашуултай болон эсэгынтнай, минии нүхэр Давидай, һургаһан дархашуултай хамта ажал хэхээр бэлэн.

¹⁵ Зай, тэрэ хэлээшэ шэниисэ, ешмээн, оливын тоһо болон үзэмэй дараһан архияа мүнөө эльгээгыт.

¹⁶ Танда хэды хэрэгтэйб, тэды модо бидэ Ливаанда отолон унагаагаад, хамталан уяжа, һала болгоод, далайгаар Яафа хүрэтэр табихабди. Танай албатан тэндэһээ тэрэ модо абажа, Иерусалим руу абаашаха.

¹⁷ Израилиин орон нютагта ажаһуугааша ерүүл зониие Соломоон, Давид эсэгынгээ хэзээ нэгэтэ тоолоһондол адляар, тооложо, зуун табин гурбан мянга зургаан зуун хүн гээд элирүүлбэ.

¹⁸ Тэдэнэй далан мянгыень барилгын модо, шулуу зөөхэ ажалда, наян мянгыень шулуу хада уулаар сабшаха ажалда тэрэ томилбо. Тиигээд гурбан мянга зургаан зуун хүниие тэрэ шэлэжэ, хүдэлмэришэдэй хойноһоо хинаха, ажал дүүрэн хүсэндэнь ябуулхаар томилоо бэлэй.