2 Угай бэшэг 14 - Библи

Асаа – Иудын хаан

¹ Абияа наһа баража, Давидай хото соо тэрэниие элинсэг хулинсагуудтайнь хамта хүдөөлүүлбэ. Орондонь Асаа хүбүүниинь хаан шэрээдэ заларба. Хааншалгынь эхинһээ арбан жэлэй туршада Иудын орон нютаг амгалан тайбан байдалда байба.

² Эзэн Бурханайнгаа үгэ соонь байжа, Асаа Эзэндэ таатай дэмбэрэлтэй хэрэгүүдые эрхилэн байгаа.

³ Хариин шүтөөнүүдэй үргэлэй шэрээ болон обоонуудые тэрэ үгы хэжэ, бахана хүрэгүүдыень бута сохибо, Ашэраа бурханда мүргэдэг газарай мододые унагаан сабшаба.

⁴ Элинсэг хулинсагайнгаа Эзэн Бурханда мүргэдэг, һургаал ёһонуудыень болон захяа заабаринуудыень сахин байха тушаа Иудын улад зондо тэрэ хэлэбэ.

⁵ Иудын хан түрын бүхы хотонуудаар мүргэдэг обоонуудые болон уталга ууюулдаг шэрээнүүдые тэрэ болюулба. Хааншалгынь үедэ амгалан тайбан байдал тогтоо бэлэй.

⁶ Эзэн энхэ тайбан байдал үршөөжэ, тэрэ жэлнүүдтэ дайн дажар үгы, юрэдөө, газар дайда амгалан, тиимэһээ Асаа Иудын хан түрын хотонуудые хэрэм ханануудаар бүхэлөө һэн.

⁷ Иудын улад зондо тэрэ иигэжэ хэлэбэ: – Эдэ хотонуудые бүхэлэн, самхагуудтай, үүдэ, шэбхэнүүдтэй ханануудаар хүреэлэе. Эзэн Бурхандаа мүргэхэдэмнай, Тэрэ бидэндэ бүхы талаһаа тэгшэ энхэ тайбан байдал үршөөгөө. Тиимэһээ газар уһан маанадайнгаа байһаар. Тэдэ иигэжэ барилга ябуулжа, амжалта туйлаа бэлэй.

⁸ Асаа хэды сэрэгтэй байгааб гэбэл, бамбай, жадануудтай Иудын обогой гурбан зуун мянган, бамбайтай, мүн һурша номоор харбадаг хоёр зуун наян мянган Бэньямиин угай эрэлхэг зонтой бэлэй.

⁹ Эфиопиин Зээрах нэгэ сая сэрэгтэй болон гурбан зуун дайшалхы тэргэтэй юумэн тэдэндэ добтолжо, Марэшаа хүрэтэр ерэбэ.

¹⁰ Асаа урдаһаань ерэжэ, тэдэ Марэшаагай хажууда Цэпатаа гэдэг нюруу газарта байлдаанда жагсаба.

¹¹ Асаа Эзэн Бурханаа дуудан, иигэжэ хэлэбэ: – Эзэн, шанга, шанга бэшэшье сэрэгтэ Та илалта туйлуулнат. Эзэн Бурхамнай, бидэндэ туһалыт. Танда найданабди, Танай нэрэ алдаршуулхаяа иимэ олон сэрэгэй урдаһаа гараабди. Эзэн Бурхамнай, Таниие хэншье диилэжэ шадахагүй.

¹² Асаагай, Иудын бүхы зоной хараһаар байтар Эзэн Эфиопиин сэрэгые хюдажа, эфиопиинхид тэрьедэжэ эхилбэ.

¹³ Асаа сэрэгшэдтэеэ хамта тэдэниие Гэраар хүрэтэр намнажа, бултыень усадхаба. Иигэжэ эфиопиинхид Эзэнэй болон тэрэнэй сэрэгэй урда хюдуулаа бэлэй. Иудынхид угаа ехэ юумэ олзоборилоо һэн.

¹⁴ Тиигээд тэдэ Гэраарай хажуугаархи бүхы хотонуудые хюдаа, юуб гэбэл, Эзэнһээ ехэ айжа байгаа. Тэдэ бүхы хотонуудые дээрмэшэлжэ, угаа ехэ олзо абаа һэн.

¹⁵ Малшадай отогуудыешье тэдэ усадхан дээрмэшэлээ, олон гэгшын хони, ямаа, тэмээнүүдые туужа абаашаа. Иигэжэ тэдэ Иерусалим руу бусаа бэлэй.