2 Угай бэшэг 13 - Библи

Абияа – Иудын хаан

¹ Еробоһаамай арбан наймадахи жэлээ хааншалжа байха үедэ Абияа Иудын хаан болоһон байна.

² Тэрэ гурбан жэлэй туршада Иерусалимда зонхилоо. Эхэнь Михайяа гэжэ нэрэтэй, Гибаагай Үриһээлэй басаган бэлэй. Абияа болон Еробоһаам дайлалдаба.

³ Дүрбэн зуун мянган хүнһөө бүридэһэн сэрэгээ Абияагай байлдаанда табихада, Еробоһаам найман зуун мянган сэрэг урдаһаань гаргаба. Хоёр талаһаа эрхим, зоригтой сэрэгшэд табигдаа гэжэ онсолмоор.

⁴ Хадалиг Эпрааим газарай Цэмарааим хада өөдэ Абияа гаража, иигэжэ дуугарба: – Еробоһаам болон бүхы Израилиин арад зон, намайе шагнагты!

⁵ Израилиин Эзэн Бурхан Давидтай дабһанда мүнхэдөө хадагалагдаһан хэлсээ баталжа, тэрээндэ болон уг удамдань Израилиин хан шэрээ хэтэ мүнхэдөө дамжуулаа гэжэ мэдэнэгүй гээшэ гүт?!

⁶ Теэд Набаадай хүбүүн Еробоһаам өөрын эзэн хаан Соломооной урдаһаа буһалгаалан бодоо.

⁷ Хажуугаарнь хооһон, хэндэшье хэрэггүй зон сугларжа, хүсэтэйбди гэжэ өөһэдыгөө харуулхын тула Соломооной хүбүүн Рэхобаамай урдаһаа тулан бодоо һэн. Рэхобаам залуу байгаа, урдаһаань харюу үгэхэ дүй дүршэлгүй һэн.

⁸ Давидай уг удамда Эзэнэй үгэгшэ хаанта засагай урдаһаа мүнөө таанад дайлалдаха гэжэ байна гээшэ гүт?! Угаа олон сэрэгтэйт, бурхад болгон таанадта Еробоһаамай дархалуулжа үгэгшэ алтан хүрэгүүдтэйт.

⁹ Эзэндэ алба хэдэг Аһарооной угай санаартадые болон левидүүдые таанад үлдэжэ, хари газарай арадуудай зониие санаартад болгон табяат. Буха болон долоон хони абаад ерэһэн лэ хүн таанадай хуурмаг бурхадуудай санаартан бологшо.

¹⁰ Харин бидэ Эзэн Бурхантаяа хамта байһаарбди. Бидэ Тэрэнээ орхёогүйбди, Аһарооной угай санаартад Эзэнээ тахиһаар, левидүүд тэдээндэ туһалһаар лэ байна.

¹¹ Үглөө, үдэшэ бүхэндэ тэдэ Эзэндэ түгэс шатаалта үргэл үргэнэ, уталгануудые ууюулна, сэбэр шэрээ дээрэ талхан үргэл табина, үдэшэ бүри алтан дэн, бусад дэнгүүдые носооно; бидэ Эзэн Бурханайнгаа һургаал сахинабди, харин таанад тэрэниие орхинхойт.

¹² Харыт, маанадые ударидан, бидэнтэй хамта Бурхан байна, урдаһаатнай байлдаа эрхилһэнэй дохёо үгэдэг үхэр бүреэнүүдтэеэ хамта Бурханай санаартад бии. Израилиин улад зон! Элинсэг хулинсагайнгаа Эзэн Бурханай урдаһаа байлдаа бү үүдхэгты. Юуб гэбэл, амжалта туйлахагүйт.

¹³ Еробоһаам тэдэниие тойрохоор хойно талаһаань бүлэг ябуулба. Иигэжэ тэрэ сэрэгтэеэ хамта Иудын зоной урда тээнь, харин эльгээгшэ бүлэгынь хойто таладань байгаа бэлэй.

¹⁴ Иудын зоной харахада, урда, хойто талаарнь байлдаан боложо байба. Тэдэ Эзэндэ зальбаран гуйжа, санаартад үхэр бүреэгээ үлеэбэ.

¹⁵ Иудын зон байлдаанай хашхараа үргэбэ. Тэдэнэй хашхархада, Бурхан Еробоһаамые болон Израилиин бүхы сэрэгшэдые Абияа болон Иудын хараһаар байтар хюдаа бэлэй.

¹⁶ Израилиин сэрэгшэд Иудын сэрэгһээ тэрьедэн гүйбэ; Бурхан тэдэниие Иудаар диилүүлээ һэн.

¹⁷ Абияа сэрэгээрээ тэдэниие шанга даража, Израилиин табан зуу мянган эрхим сэрэгшэд алуулба.

¹⁸ Израилиин улад зон номгоржо, Иудын зон үбгэ эсэгэнэрэйнгээ Эзэн Бурханда найдадаг байһандаа илалта туйлаба.

¹⁹ Абияа Еробоһаамые мүрдэн намнажа, тэрээнһээ Бэт-Ээл хотые һууринуудтайнь хамта, Ешанаа хотые һууринуудтайнь, Эпроониие һууринуудтайнь хамта эзэмдэн абаа бэлэй.

²⁰ Абияагай мэндэ байгаа сагта Еробоһаам дахин хүсэтэй боложо шадаагүй. Эзэн тэрэниие хюдажа, тэрэ наһа бараа һэн.

²¹ Харин Абияа угаа ехэ хүсэ шадалтай боложо, арбан дүрбэн һамга абажа, хорин хоёр хүбүүтэй, арбан зургаан басагатай болоо һэн.

²² Абияагай бусад хэрэгүүд, хэлэһэн үгэнүүдынь, наһанайнь харгы Иддоо лүндэншын бэшэг данса соо зураглагданхай.