2 Угай бэшэг 1 - Библи

Соломооной хааншалалгын эхин

¹ Давидай хүбүүн Соломоон хаан түрэеэ бахим бариба. Эзэн Бурхан тэрэниие хайраараа орхингүй, угаа ехэ хүсэ шадалтай болгон дэгжүүлээ бэлэй.

² Соломоон хаан мянганай, зуунай дарганарта, зарга хэрэгүүдые шиидхэгшэдтэ, обог омогуудай толгойлогшонорто, юрэдөө, Израилиин бүхы ноёдто захиржа,

³ Соломоон ба тэрээнтэй хамта бүхы сугларагша зон Гибэһоон руу мүргэлэй газарта ошобо. Юундэ ошооб гэхэдэ, тэндэ зэлүүд хооһон газарта Эзэнэй богоол Моисейн табиһан Бурханай оршолой Уулзалгын майхан һүмэ байгаа шуу.

⁴ Гэбэшье Бурханай ханза Иерусалимда, Давидай табиһан майхан соо һэн. Давид хаан тэрэ ханзые Кирьяат-Еариимһээ Иерусалим руу асараа бэлэй.

⁵ Хуурай аша, Үриин хүбүүн Бэцалээлэй гуулин түмэрөөр бүтээһэн үргэлэй шэрээ Гибэһоондо, Эзэнэй оршолой нангин майханай урда тээ байгаа. Соломоон ерэгшэ зонтоёо хамта тэндэ Эзэндэ үргэл хэжэ мүргэбэ.

⁶ Эзэнэй оршолой Уулзалгын майхан һүмын урда тээ, гуулин түмэрөөр бүтээһэн үргэлэй шэрээ дээрэ Соломоон хаан түгэс шатаалта үргэлдэ мянган мал асарба.

⁷ Тэрэл һүниндөө Бурхан Соломоондо үзэгдэжэ: – Юун шамда хэрэгтэйб, Намһаа гуйхадаш болохо, – гэжэ айладхаба.

⁸ Соломоон Бурханда: – Минии эсэгэ Давидта Та ехэ энэрэл хайра үзүүлээт. Эсэгэеэ даган хаан болохыемни мүнөө намда зүбшөөгөөт.

⁹ Харин мүнөө, Эзэн Бурхан, минии эсэгэ Давидта найдуулһанаа бэелүүлыт. Газарай шорой мэтэ тоо томшогүй арад түмэнэй хаан болгон намайе табяа хадаа,

¹⁰ мүнөө тэдэниие зонхилхо сэсэн мэргэн ухаа болон эрдэм мэдэсэ намда үршөөгыт. Юуб гэбэл, намһаа бэшэ хэн Танай агууехэ арад зониие зонхилжо шадахаб? – гэжэ хэлэбэ.

¹¹ Бурхан Соломоондо: – Ухаандаа байгааша юумые үнэн сэхэ хэлээш. Баялиг, үнэтэ нөөсэнүүдые, алдар соло, дайсадтаа үхэл, мүн өөртөө ута наһа гуйхын орондо ши хаан болгожо Минии шамайе табихада, тэрэ арадыем зонхилхын тула сэсэн мэргэн ухаа, эрдэм өөртөө гуйбаш.

¹² Сэсэн мэргэн ухаан болон эрдэм шамда үршөөгдэнэ! Энээндэ нэмэжэ, шинии урда болон хойто сагуудай хаашуулда байгаагүй баялиг, үнэтэ нөөсэнүүдые, алдар соло шамда үршөөхэб, – гэжэ айладхаба.

Баян Соломоон хаан

¹³ Соломоон Гибэһоондохи мүргэлэй газарһаа, Уулзалгын майхан һүмэһөө Иерусалим руу бусажа, Израилиие зонхилон байба.

¹⁴ Тиигэжэ Соломоон хаанда нэгэ мянга дүрбэн зуун дайшалхы тэргэ, арбан хоёр мянган морин сэрэг сугларба. Тэдэнээ тэрэ дайшалхы тэргын байрладаг хотонуудаар, мүн өөрын Иерусалим хото соо байрлуулаа.

¹⁵ Соломоон хаанай зонхилхо сагта Иерусалимда алта, мүнгэн юрын шулуундал адли тоологдодог, харин үнэтэ хуша модод набтар газараар ургадаг һөөг бургааһандал адли үдхэн ургадаг бэлэй.

^16-17 Соломоон хаанай наймаашадынь хаандаа моридые Египедһээ, Күээһээ худалдан абадаг һэн. Тэдэ наймаашад Египедһээ дайшалхы тэргэ зургаан зуун шээкэл, мори зуун табин шээкэл мүнгөөр худалдан абадаг һэн. Удаань тэдэ наймаашад араамшуудай болон хээдүүдэй хаашуулда тэдэниие асардаг бэлэй.