2 Хаан түрэнүүд 15 - Библи

Тэжээһэн буруун тэргэ эбдэхэ

¹ Тэрэнэй удаа Абшалоом өөртөө моридтой дайшалхы тэргэ, табин хүнһөө бүридэһэн харуултай болобо.

² Тэрэ эртэ үглөөгүүр бодожо, хотын хаалгануудай хажуудахи харгы дээрэ зогсодог байба. Зарга хэрэгтэй хэн нэгэнэй хаанда мүргэн шүүбэрилүүлхэеэ ерэжэ ябабал, Абшалоом тэрэниие дуудажа, иигэжэ асуудаг һэн: – Ши хаанаһаабши? – Израилиин тэрэ обогһооб, – гэжэ тэрэ хүнэй харюусахадань,

³ Абшалоом тэрээндэ иигэжэ хэлэдэг байгаа: – Харыш даа, шинии хэрэг һайн, зүб байна. Харин хаанай зүгһөө шамайе шагнаха хүн байхагүй.

⁴ Үшөө нэмэн тэрэ иигэдэг һэн: – Оо, намайе энэ уласай зарга шүүгшээр томилоо гээшэ һаань, зарга хэрэгтэй хүн бүхэн намда ерэжэ, би тэдэние зүбөөр шүүбэрилдэг байха һэм!

⁵ Хэн нэгэнэй тэрээндэ дүтэлжэ, һүгэдэн мүргэхэ гэбэл, тэрэ тэбэрин тааладаг һэн.

⁶ Үнэн зүбые бэдэрэн хаанда ерэһэн хүн бүхэндэ Абшалоом иимээр хандадаг байгаа. Иигэжэ тэрэ Израилиин зоной зүрхэ сэдьхэлые татадаг болобо.

⁷ Дүрбэн жэлэй үнгэрһэнэй удаа Абшалоом хаанда иигэжэ хэлэбэ: – Эзэндэ үргэһэн тангаригаа минии бэелүүлхын тула намайе Хэброон руу табиит.

⁸ Танай богоол болохо би Араамай Гэшүүртэ байхадаа, «хэрбээ Эзэнэй намайе үнэхөөр Иерусалим руу бусаагаа һаань, би Эзэндэ үргэл хэхэб» гэжэ тангариглаа һэм.

⁹ Хаан тэрээндэ харюусаба: – Амар амгалан ябаарай даа. Иигэжэ тэрэ Хэброон руу ошобо.

¹⁰ Абшалоом Израилиин бүхы обог аймагуудаар тагнуулшадые эльгээжэ, иигэжэ захиба: – Эбэр бүреэгэй абяа дуулахадаа, таанар «Абшалоом Хэброоной хаан болоо!» гэжэ хашхаралдаарайгты.

¹¹ Абшалоомтой хамта хоёр зуун хүн Иерусалимһаа гаран ошоо һэн. Тэдэ юушье боложо байһыень мэдээгүй, уригдаад лэ ошоһон зон бэлэй.

¹² Абшалоом үргэл хэхэдээ хүниие ябуулжа, Давидай зүбшэгшэ Ахитоопэлые Гилоо хотоһоонь дуудажа асаруулба. Иигэжэ шанга нюуса хэлсээн байгуулагдажа, Абшалоомтой нэгэдэн ниилэхэ зоной тоо олон боложол байгаа бэлэй.

Давид Иерусалимһаа тэрьедэбэ

¹³ Тиихэдэ Давидта мэдээ асарагша нэгэн ерэжэ, иигэжэ дуулгаба: – Израильшууд Абшалоомой тала баряад байна.

¹⁴ Тиихэдэнь Давид Иерусалимда өөртэйнь хамта байһан бүхы түшэмэлнүүдтээ иигэжэ хэлэбэ: – Тэрьедэхэ ёһотойбди. Үгы һаа, Абшалоомдо бултадаа алуулхабди. Түргэлэе! Тэрэнэй маанадые баряадүй, гай ушаруулан, зониие һэлмээр сабшан усадхаадүйдэнь гаран ошоё.

¹⁵ Тэдэнь хаанда харюусаба: – Үндэр түрэлтэ хаан! Танай хэлэһээр лэ бүхы юумэ хэхэбди.

¹⁶ Хаан гаража, тэрэнэй хойноһоо гэр бүлэнь, бүхы түшэмэлнүүдынь дахан ошобо. Харин гэрээ һахюулан, хаан арбан бага һамгадаа үлөөбэ.

¹⁷ Хаан болон тэрэнэй бүхы зон хотоһоо гаран ябажа, Бэт-Мэрхаада тогтобо.

¹⁸ Хамаг түшэмэлнүүд хажуудань зогсобо. Бэеыень аршалаашад бултадаа, хэрээдүүд ба пэлидүүд бултадаа, мүн хаантай хамта Гаатһаа ерэһэн зургаан зуун хүн бүгэдэ хаанай урдуур жагсаалаар ябан үнгэрбэ.

¹⁹ Хаан гаадуудай удамаршан Иттайда иигэжэ хэлэбэ: – Ши юундэ бидэнтэй хамта ябанабши? Хари хүн ха юмши, өөрынгөө газарһаа үлдүүлэнхэйш. Бусажа, нүгөөдэ хаантай хамта үлэ.

²⁰ Ши һаял бидэндэ ерээш. Тиигээд хаагууршье ябахаяа мэдэхэгүй аад, би шамайе мүнөө намтай яба гэжэ баадхаха аалби? Ши өөрынгөө нютаг зониие абаад буса. Үршөөл хайратай, сэхэ сэбэр ябахатнай болтогой!

²¹ Иттай хаанда харюусаба: – Үндэр түрэлтэ хаан! Эзэнэй нэрээр тангаригланаб: танай амидышье, нүгшөөдшье, хаанашье байгаа хадатнай би тэндэл байхаб!

²² Тиимэһээ Давид Иттайда хэлэбэ: – Тиигээ һаа, ошоё. Иигээд гаадай Иттай, тэрэнэй бүхы зониинь үхи хүүгэдтэеэ хамта ошобо.

²³ Нютагаа орхин ошожо ябахадаа бүхы зон шангаар бархиралдан ябаа. Хаан Кидроон горхо гаталха гарасын хажууда байгаа. Бүхы арад зон сүл губи тээшэ замаар шэглэн ябаа.

²⁴ Цадоок болон тэрээнтэй байһан бүхы левидүүд Бурханай хэлсээнэй ханзые абажа ябаа. Тэдэ тус ханзые буулган табиба. Бүхы зоной Иерусалимһаа гаратар Абиатаар үргэл хэжэ байгаа.

²⁵ Хаан Цадоогто хэлэбэ: – Бурханай ханзые хото руу бусаан абааша. Эзэнэй үршөөл хайрада хүртөө гээшэ һаам, Тэрэ намайе дахин бусаажа, Өөрыгөө болон оршодог газараа үзүүлхэ.

²⁶ Харин Тэрэнэй намайе үршөөгөөгүй гээшэ һаань, яахаб, Тэрэ намда һанаһаараа юумэ хүүжэн.

²⁷ Хаан үшөө тэрээндэ иигэжэ хэлэбэ: – Хара даа, өөрынгөө хүбүүн Ахимаац болон Абиатаарай хүбүүн Ёнатааниие аба. Хоюулаа хүбүүдтэеэ хамта амгалан тайбан хото руу бусагты.

²⁸ Таанадһаа мэдээнэй ерэтэр би сүл губида, Иордан голой гарасын дэргэдэ хүлеэн тогтохоб.

²⁹ Цадоок болон Абиатаар Бурханай ханзые Иерусалим руу бусаажа, тэндээ үлэбэ.

³⁰ Давид Элеон хада өөдэ үгсэхэдөө, толгойгоо бүглэн, уйлан, хүл нюсэгэн ябаба. Мүн тэрээнтэй хамта байһан бүхы зон толгойгоо бүглэн, уйлан ябаа һэн.

³¹ Хэн нэгэнэй Давидта: – Абшалоомтой нюуса хэлсээ хэгшэдэй дунда Ахитоопэл байна, – гэжэ хэлэхэдэнь, Давид: – Эзэн, Ахитоопэлэй зүблөөе ухаа удхагүй болгожо үгыт гэжэ би зальбарнаб, – гэбэ.

³² Бурханда мүргэдэг газар болоһон хадын оройдо Давидай гараха үедэ хубсаһаа уринхай, толгой дээрээ шорой адхаһан архэй хүн Хушай урдаһаань ерэжэ ябаба.

³³ Давид тэрээндэ иигэжэ хэлэбэ: – Хэрбээ ши намтай ябабал, намда дарамта болохош.

³⁴ Харин хото руу бусабал, Абшалоомдо «Хаан, би танай зарасаб. Урдань эсэгынтнай зараса байгааб, мүнөө танай зарасаб» гэжэ хэлээрэй, Ахитоопэлэй зүблөөе туһагүй болгожо шадахаш.

³⁵ Тэндэ санаартад Цадоок болон Абиатаар шамтай хамта байха. Хаанай ордон соо дуулаһан лэ юумэеэ тэдээндэ хөөрөөрэй.

³⁶ Цадоогой хүбүүн Ахимаац болон Абиатаарай хүбүүн Ёнатаан тэдэнтэй хамта байха. Дуулаһан юумыетнай тэдэ намда дамжуулха.

³⁷ Тиигээд Давидай нүхэр Хушай хото руу ошобо. Тэрэ үедэ Абшалоомшье Иерусалим руу ерэжэ байгаа бэлэй.