1 Угай бэшэг 5 - Библи

Рэүбээнэй үри һадаһад

¹ Израилиин ууган хүбүүн Рэүбээн. Харин тэрэ эсэгынгээ орон унтариие бузарлажа, Израилиин ууган хүбүүнэй алдар нэрэ Иосифой хүбүүдтэ дамжуулагдаад, түрүүшын гээд бэшэгдэхэгүй байһан юм.

² Өөһэдынгөө аха, дүүнэр сооһоо Иуда эгээл шадалтайнь байһан, ёһотойл ударидагша тэрээнһээ гараһан, гэбэшье ууган хүбүүнэй эрхэ Иосифто даалгагдаһан түүхэтэй.

³ Израилиин ууган хүбүүн Рэүбээнэй хүбүүд: Эноох, Паллуу, Хэцроон болон Хармии.

⁴ Ёһээлэй үринэр: тэрэнэй хүбүүн Шэмаяа, Шэмаяагай хүбүүн Гоог, Гоогой хүбүүн Шимэй,

⁵ Шимэйн хүбүүн Михаа, Михаагай хүбүүн Рэһаяа, Рэһаяагай хүбүүн Бааһал,

⁶ Бааһалай хүбүүн Беэраае Ассириин хаан Тиглаат-Пилэсээр баряанда туужа абаашаһан юм. Беэраа Рэүбээнэй обогой тайжа байһан.

⁷ Тэдэнэй аха дүүнэр, тэдэнэй бүлэнүүд, тэдэнэй угай бэшэг иимэ: ахалагшань Еиһээл, тиигээд Захарияа,

⁸ удаань Азаазай хүбүүн Бээла. Азаазай эсэгэ Шэмаа, Шэмаагай эсэгэ Ёһээл. Бээла Ароһээртэ ажаһуугаа, газар дайдань Нэбоо болоод Бааһал-Мэһоон хүрэтэр нэмжыдэг бэлэй.

⁹ Галаадай газар дээрэ Рэүбээнэй үри һадаһадай үхэр мал хэмгүй олон ушарһаа тэдэ Евфрат мүрэнһөө эхилһэн сүл губи хүрэтэр, зүүлжээ газараар ажаһуудаг һэн.

¹⁰ Тэдэнэр Саулай ударидалгын үедэ һагаарнуудтай дайлалдаад, диилээд, Галаадай зүүн талын бүхы дайдаар майхангууд соо ажаһуудаг болоһон түүхэтэй.

Гаадай үри һадаһад

¹¹ Гаадай хүбүүд тэдэнэй шанха урда, Башаанһаа эхилээд, Салэхаа хүрэтэр ажаһуудаг байгаа;

¹² Башаанда Ёһээл ахалагшань байгаа, хоёрдохинь Шапаам, тиигээд Янай болон Шапаат болонод.

¹³ Аха, дүүнэрынь гэр бүлэтэеэ долоон байгаа гэбэл: Михаээл, Мэшуллаам, Шэбаа, Ёрай, Якаан, Зияа болон Ээбэр.

¹⁴ Бүүзэй, Яхдоогой, Ешишайн, Михаээлэй, Галаадай, Ярооһаагай, Хуриин, Абиһааилай хүбүүд эдэ болоно.

¹⁵ Гуниин Авдиэлиин хүбүүн Ахии уг зоноо толгойлдог байгаа.

¹⁶ Тэдэ Галаадта, Башаанда, хажуугаархи һууринуудтань, Шарооной бэлшээри газарнуудаар холын заха хүрэтэрынь ажаһуугаа.

¹⁷ Иудын хаан Ётаамай, Израилиин хаан Еробоһаамай үенүүдтэ тэдэнэр тоодо абтаһан юм.

¹⁸ Рэүбээнэй, Гаадай үри һадаһадай дунда, Мэнашшээгэй хахад обогой дунда һэлмэ болон бамбай баридаг, һурша номоор харбадаг, байлдаанда шадабаритай дүшэн дүрбэн мянган долоон зуун жаран дайшалхы эрэшүүл байһан юм.

¹⁹ Тэдэнэр һагаарнуудтай, Етүүртэй, Напииштай, Нодаабтай дайлалдаба.

²⁰ Байлдаанай үедэ тэдэнэр Бурханда ехээр этигэн найдажа мүргэбэ. Тэдэниие Бурхан дуулаба, һагаарнуудые, бүхы зөөри зөөшэнүүдыень тэдэнэртэ эзэмдүүлэн үгэбэ.

²¹ Иигэжэ тэдэ үхэр малыень эзэмдэн абаа: табин мянган тэмээ, хоёр зуун табин мянган жэжэ мал, хоёр мянган элжэгэ. Зуун мянган хүниие баряанда абаа.

²² Энэ байлдаан Бурханай байгаа! Олон сэрэгшэд алуулаа! Рэүбээнэй үри һадаһад сүлэлгэдэ туугдан ошотороо һагааршуудай газарта ажаһуугаа бэлэй.

Мэнашшээгэй хахад обогой үри һадаһад

²³ Мэнашшээгэй хахад обогой үри һадаһад Башаанһаа эхилээд, Бааһал-Хэрмоон болон Сэниир мүн Эрмон хада хүрэтэрхи газар дайда дээрэ ажаһуугаа; тэдэнэр угаа олон байгаа.

²⁴ Тэдэнэй үенүүдэй тайжанууд: Эпээр, Ишии, Элиээл, Азриһээл, Ерэмияа, Һодаабьяа болон Яхдиһээл гэгшэд – шиираг эрэшүүл, мэдээжэ бүһэтэн, обог зоноо хүтэлбэрилэгшэд болоно.

²⁵ Израилиин улад зондо зай гаргахаяа бусад арадуудые үлдэһэн, өөрын үбгэ эсэгэнэрэй Бурханай урда тэдэ нүгэл хэжэ, тэдэ арадуудай бурхадта мүргэжэ эхилбэ.

²⁶ Тиихэдэнь Израилиин Бурхан Пүүлэй, Ассириин хаанай һүр һүлдыень үргэбэ, Тиглаат-Пилэсээрэй, Ассириин хаанай, һүл һүлдыень дэмжэн, Рэүбээнэй, Гаадай, Мэнашшээгэй хахад обогой үри һадаһадые Халаа, Хабуур болон Һараа, Гозаан мүрэн шадархи нютагуудта ябуулаа, тэдэнэр мүнөөшье болотор тэндээ.