1 Угай бэшэг 23 - Библи

Левидүүд

¹ Давид үндэр наһатай болоод, ажаһуудалай утые гаталжа садахадаа, өөрынгөө хүбүүн Соломоониие Израилиин хаанаар табиба.

² Израилиин бүхы тайжануудые, санаартадые, левидүүдые суглуулба;

³ гушан наһанһаа дээшэ левидүүд тоологдобо; тэдэнэй энэ тоо гушан найман мянган хүн болобо.

⁴ Тэдэнһээ Эзэнэй гэртэ алба хэхээр томилогдоошод – хорин дүрбэн мянган, хинадаг дарганар болон зарга шүүгшэд – зургаан мянган,

⁵ мүн харуулшад дүрбэн мянган, хүгжэмэй элдэб зэмсэгүүд дээрэ Эзэниие магтан дуулагшад – дүрбэн мянган,

⁶ Давид тэдэниие Левиин Гэршооной, Кэһаадай, Мэрариин бүлэгүүд болгон таһалба.

⁷ Гэршоонһоо Лаадан ба Шимэй.

⁸ Лааданай хүбүүд: ахань Ехиһээл, Зэтаам, Ёһээл гурбан;

⁹ Шимэйн хүбүүд: Шэломоот, Хазиһээл, Һараан гурбан. Тэдэнэр Лааданай обогой гулбаанууд.

¹⁰ Шимэйн үшөө хүбүүд: Яахат, Зинаа, Еһүүш ба Бэрияа. Шимэйн хүбүүд дүрбэн:

¹¹ Яахат ахань, хоёрдохинь Зинаа, Еһүүш Бэрияа хоёр үсөөн хүбүүдтэй тула эсэгынгээ гэртэ тэдэнэр нэгэ тоодо ороо.

¹² Кэһаадай хүбүүд: Амраам, Ицһаар, Хэброон, Үззиһээл дүрбэн.

¹³ Амраамай хүбүүд: Аһароон ба Моисей. Аһароон хамагай нангин бүтээлнүүдтэ зорюулагдан абтаа, тэрэ, мүн тэрэнэй хүбүүд хэтэдээ Эзэнэй шарайн урда алба бэелүүлхэ, Тэрэнэй нэрэһээ үреэлдэ хүртөөхэ, Тэрээндэ алба хэхэ уялгатай.

¹⁴ Харин Моисей Бурханай хүн, тэрэнэй хүбүүд левиин обогто оруулагданхай.

¹⁵ Моисейн хүбүүд: Гэршоом ба Элиээзэр.

¹⁶ Гэршоомой ехэ хүбүүн Шэбүһээл.

¹⁷ Элиээзэрэй хүбүүн – Рэхабияа. Элиээзэр ондоо хүбүүгүй байгаа. Харин Рэхабияа олон хүбүүдтэй байһан.

¹⁸ Ицһаарай ехэ хүбүүн Шэломоот.

¹⁹ Хэброоной хүбүүд: Ерияа, хоёрдохинь Амарияа, гурбадахинь Яхазиһээл, дүрбэдэхинь Екамэһаам.

²⁰ Үззиһээлэй хүбүүд: ехэнь Михаа, хоёрдохинь Ишшияа.

²¹ Мэрариин хүбүүд: Маһлии ба Мушии. Маһлиин хүбүүд: Эльазаар ба Кииш.

²² Эльазаар наһа бараа, тэрэ хүбүүгүй, харин басагадтай байгаа; тэдэнэй дүү Киишэй хүбүүд тэдэниие өөртөө абаа.

²³ Мушиигай хүбүүд: Маһлии, Эдээр, Ерэмоот гурбан.

Левидүүдэй уялганууд

²⁴ Левиин эдэ хүбүүд гэрнүүдээрээ, эсэгэнэрэйнгээ отогуудай гулбаануудаар бүхыдөө тоологдоод, хорин наһанһаа, мүн тэрэнһээ дээшэ наһатай хүнүүдые Эзэнэй гэртэ алба хэхээр ябуулдаг һэн.

²⁵ Давидай хэлэһэнэй ёһоор: – Израилиин Эзэн, Бурхан өөрынгөө арадта амгалан байдал үршөөжэ, тэрэниие Иерусалимда хэтын хэтэдэ түбхинүүлээ,

²⁶ левидүүд майхан һүмэ, мүн эдээндэ хабаатай хэрэгсэлнүүдые үргэлхэ ёһогүй байһан.

²⁷ Давидай һүүлшын заабариин ёһоор, Левидүүд хорин наһатайһаа, мүн тэрэнһээ дээшэ наһатай хүнүүд бүридхэлдэ абтаа,

²⁸ Эзэндэ алба хэхын тула Аһарооной хүбүүдэй хажууда байжа, Бурханай гэрэй дэргэдэ элдэб алба бэелүүлхын, мүргэлэй нангин Һүмэ, хашаа, мүн тэрээндэ хабаатай элдэб барилганууд соохи ариг сэбэрые сахиха,

²⁹ хилээмэнэй үргэлэй шэниисын гурилай, дурадхалай хилээмэнэй, эһээбэригүй, болгоһон, шараһан хилээмэнэй хэмжүүрнүүдые, шэгнүүрые сахин адаглаха,

³⁰ Эзэндээ үглөө, үдэшэ бүри баяр хүргэжэ, алдар соло дуулалгые заншалта болгон хинаха,

³¹ дүримүүдэй гуримаар Эзэнэй урда хододоо бэелүүлэгдэдэг гарагай долооной, шэнэ һарын эхинэй, тоогой ёһоор һайндэрнүүдтэ Эзэндэ зорюулагдаһан түгэс шатаалта бүхы үргэлнүүдые бэелүүлхэ,

³² Эзэнэй гэртэ алба хэхэдээ, өөһэдынгөө аха, дүүнэрые, Аһарооной хүбүүдые, майхан һүмэ, харууһалха уялгануудынь эдэ мүн.