1 Угай бэшэг 22 - Библи

¹ Давид иигэжэ хэлэбэ: – Эзэн Бурханай Һүмэ, мүн израильшуудай үргэлөө шатаан үргэдэг түгэс шатаалта үргэлэй шэрээ эндэ байха.

Һүмэ барилгада Давид бэлдэлгэ хэнэ

² Израилиин газар дээрэ ерүүл бүхы дархашуулые суглуулха гэһэн захиралта Давид гаргаад, Бурханай гэрэй шулуу хайха шулуушадые табиба.

³ Давид гол үүдэнүүдэй хадааһануудые дабтан хэхэ түмэр ехээр, мүн бүгэдые хабсаруулан суглуулгада хэрэгтэй хэмжүүргүй шахуу зэд бэлдэбэ,

⁴ Давидта Сидоон, Тиир хотынхидой бэлдэһэн хуша модон аргагүй ехэ байба.

⁵ Давид иигэжэ хэлэбэ: – Минии хүбүүн Соломоон залуу, үшөө шадал багатай, зүгөөр Бурханда зорюулһан энэ гэр бүхы нютагууд соо ехэ һайхан гээд суутай байхаһаа гадна шэмэглэл урлалнуудынь дабташагүй үзэсхэлэн байхын тула би Соломоондо түгэс бэлэдхэл хэхэ ёһотойб. Давид наһан болотороо аргагүй ехэ ажал бүтээһэн юм.

Соломоондо һургаалай үгэ

⁶ Соломоондоо захиржа, Израилиин Бурханай, Эзэнэй гэр бариха захяа үгэбэ.

⁷ Давид Соломоондо иигэжэ хэлэбэ: – Хүбүүмни! Өөрынгөө Бурханай, Эзэнэй хүндэлэлдэ үнэн зүрхөөрөө гэр бодхоохо хүсэлтэй ябааб;

⁸ зүгөөр Эзэн намда иигэжэ хэлээ һэн: «Олон дай хэжэ, ши ехэ шуһа адхааш. Минии урда газар дээрэ ехэ шуһа адхаһан ушарһаа Намда зорюулһан гэр бодхохо эрхэгүйш.

⁹ Шамда хүбүүн түрэхэ; Соломоон гэжэ нэрэтэй ехэ амгалан тэнюун хүн байха. Тэрэниие тойроһон бүхы дайсадыень номгоруулжа, амгалан байдал тогтоохоб.

¹⁰ Тэрэ Намда зорюулһан гэр бариха, харин Би Эсэгэнь мэтэ, тэрэ Намда хүбүүмни мэтэ болохо. Тэрэнэй хан түрэ Израильда хэтэдээ байха».

¹¹ Хүбүүмни! Тэрэнэй намда хэлэһэнэй ёһоор Эзэнэй гэр бодхоожо, амжалтатай ябахаш. Бурхан шамтаяа байха.

¹² Өөрынгөө Бурханай, Эзэнэй хуули ёһонуудые сахижа яба, шамайе Израилиин толгойлогшоор томилхо. Эзэн шамда удха ёһо, ухаан бодол хэшээхэ.

¹³ Эзэнэй Моисейдэ Израилиин аша туһада үгэһэн захяануудые, хуули ёһонуудыень наринаар бэелүүлжэ ябахадаа, ши хододоо амжалтатай ябахаш. Эрэлхэг зоригтой, юунһээшье айнгүй, сэдьхэл дүүрэн яба.

¹⁴ Бүхы сэдьхэлээрээ Эзэнэй гэрэй барилгада зуун мянган талаант алта, зуун мянган талаант мүнгэ, харин зэд болон түмэрэй хэмжүүр тоогүй ехэ; мүн баһа элдэб түхэлэй модонуудые, шулуунуудые бэлдээб.

¹⁵ Хамаг хэрэгые бүтээхэ шадабаритай модошо дархашуул, отологшод, шулуу хайгшад шамда хүсэд бии.

¹⁶ Алтан, мүнгэн, зэд, түмэр хүрэхөөр бии, эхилэ, тиигээд бэелүүлэ; Эзэн шамтаяа байха.

Соломоондо туһалха тайжануудта захяа

¹⁷ Давид Соломоондо туһалхыень Израилиин бүхы тайжануудта иимэ захяа үгэбэ:

¹⁸ – Бүхы талаһаа амгалан байдал түхөөгшэ Эзэн Бурхан таанадтаяа бэшэ юм гү? Тэрэ газар дээрэ ажаһуугшадые минии гарта дамжуулан үгөө; Эзэнэй, Тэрэнэй арадта газар мэдэлдэнь ороол.

¹⁹ Эзэнээ, Өөрынгөө Бурханиие хүндэлхын тула өөһэдынгөө зүрхэ сэдьхэлые, ухаан бодолые сүм зорюулагты, Эзэнэй хэлсээнэй ханза, хадагалха гэр, Бурханда хабаатай хэрэгсэлнүүдые бүтээхын тула Эзэндээ зорюулһанаа бүтээхын тула эбтэйгээр ябажа, Эзэн Бурханай нангин гэр бодхоогты.