1 Угай бэшэг 18 - Библи

Давид дайсадаа илаба

¹ Тэрэнэй удаа Давид пилиштүүдые илажа, номгоруулба. Тэрэ Гаат хотые тойроод байгаа һууринуудтайнь тэдээнһээ буляан абаба.

² Давид моһаабуудые бута сохибо. Иигэжэ моһаабууд Давидай засаг мэдэржэ, ясаг түлэдэг болобо.

³ Цобаагай хаан Һадаад-Ээзэр Евфрат мүрэнэй нюруугаар өөрынгөө засаг түрые батадхаяа ошожо ябаа. Давид тэрэниие Хамаат хүрэтэр бута сохибо.

⁴ Давид нэгэ мянга дайшалхы тэргэ, долоон мянган морин сэрэг, хорин мянган ябаган сэрэг олзолон абаба. Тэргын моридойнь шүрбэһые тэрэ отолбо, харин зуун тэргэдэ хүрэхөөр моридые мэндэ үлөөгөө һэн.

⁵ Цобаагай хаан Һадаад-Ээзэртэ туһалхаяа Дамааскын араамшуудай ерэхэдэнь, Давид хорин хоёр мянгыень алаба.

⁶ Тиигээд Дамааскын араамшуудые зонхилхо өөрын сэрэг дээрэнь табиба, араамшууд богоолынь боложо, ясаг түлэдэг болоо һэн. Давидай ябаһан газар бүхэндэнь Эзэн туһалжа байгаа.

⁷ Һадаад-Ээзэрэй зоной алтан номо һаадагуудые Давид буляан абажа, Иерусалим руу асарба.

⁸ Һадаад-Ээзэрэй хотонууд болохо Тибхаат болон Күүнһээ Давид угаа ехэ гуулин түмэр мүн лэ дээрмэдэн абаа һэн. Соломоон тэрээгээр гуулин далай, баханануудые, элдэб амһартануудые дархалан бүтээлгээ бэлэй.

⁹ Цобаагай хаан Һадаад-Ээзэрэй хамаг сэрэгые Давидай бута сохиһон тухай Хамаадай хаан Тооһу гэгшэ дуулаад,

¹⁰ тэрэниие мэндэшэлхын, һайе хүргэхын тула Һадораам хүбүүгээ эльгээбэ. Ушарынь хадаа Һадаад-Ээзэр Тооһутай ходо дайлалдажа байгаа бшуу. Һадораам ерэхэдээ, алтан, мүнгэн, гуулин эд зүйлнүүдые асарба.

¹¹ Давид хаан диилэгшэ бүхы уласуудһаа абаһан алта, мүнгэнтэй хамта тэрээнииеньшье Эзэндэ зорюулба. Тэдэ ямар уласуудһааб бэ гэхэдэ, эдоом, моһааб, аммоон, пилишт, амалээг.

¹² Цэруяагай хүбүүн Абишай Дабһата хүндыдэ арба найман мянган эдоомуудые хюдаба.

¹³ Тэрэ Эдоомдо өөрын сэрэг ноёдые һуурижуулба. Эдоомшууд бултадаа Давидай богоолнууд болобо. Давидай ябаһан газар бүхэндэнь Эзэн туһалан байгаа.

Давидай дүтын туһамаршад

¹⁴ Иигэжэ Давид бүхы Израилиин хаан түрэ барижа, арад түмэнөө зүб шударгыгаар зонхилжо байгаа.

¹⁵ Цэруяа эхэтэй Ёһааб сэрэгэй дарга, Ахилүүдэй хүбүүн Ёшапаат түүхэ бэшээшэ,

¹⁶ Ахитуубай хүбүүн Цадоок болон Абиатаарай хүбүүн Абимээлэх санаартад, Шавшаа бэшээшэ,

¹⁷ Ёядаагай хүбүүн Бэнайяа Давидай бэе аршалагша хэрээдүүдэй ба пэлидүүдэй ноён һэн. Давидай хүбүүд хаанай туһамаршад байгаа.