1 Угай бэшэг 16 - Библи

Ханзын дэргэдэхи дуушадай уялга

¹ Иигэжэ тэдэ Бурханай ханзые асаржа, Давидай зорюута тэрээндэ гэжэ бодхооһон майханай дунда залаба. Бурханда түгэс шатаалта болон амгалан тайбан байдалай үргэлнүүдые үргэбэ.

² Тэрэ түгэс шатаалта ба амгалан байдалай үргэлнүүдые үргэжэ дүүргээд, Эзэнэй нэрээр арад зониие юрөөбэ.

³ Тиигээд тэрэ бүхы израильшуудта, эрэшүүл болон эхэнэрнүүдтэ нэгэ-нэгэ зүһэм хатааһан огноо жэмэсээр бариһан хилээмэ, нэгэ-нэгэ зүһэм шараһан мяха, үзэмэй нэгэ баглаа үгэбэ.

⁴ Эзэнэй ханзын урда Израилиин Бурхан, Эзэнээ магтан алдаршуулхын, соло дуудалгын албанда левидүүдэй заримыень томилбо гэбэл:

⁵ ахалагшаар Асаапые, тэрэнэй удаа хоёрдохииень Захарияае, Иеиэлиие, Шэмирамоодые, Ехиһээлые, Маттитияае, Элиаабые псалтирнууд ба цитранууд дээрэ, мүн Бэнайяае Обээд-Эдоомые, мүн Еиһээлые, мүн Асаапые кимвалнууд дээрэ,

⁶ харин Бэнайяае, Яхазиһээлые, санаартадые Бурханай хэлсээнэй ханзын урда бүреэнүүдые ходо үлеэжэ байхаар томилбо.

⁷ Тэрэ үдэр Давид Эзэндээ эгээл түрүүшын магтаал Асаапаар, мүн тэрэнэй аха, дүүнэрээр зорюулгын, дуулал үнгэргэбэ:

Давидай баяр баясхалангай дуун

⁸ – Эзэниие магтан дуулагты, нэрыень дурдан дуудагты. Арадуудта хэрэгүүд тушаань дуулгагты;

⁹ Эзэн тушаа дуулагты, магтаал үргэгты, гайхамшагта үзэгдэлнүүд тушаань зар тунхаг тараагты.

¹⁰ Нангин нэрыень магтан дуулагты. Эзэндэ эрмэлзэгшэ зоной зүрхэ сэдьхэл баясан байг лэ!

¹¹ Эзэниие болон хүсыень бэдэрэгты, Тэрээн руу хододоо шармайгты,

¹² Тэрэнэй хэһэн гайхамшагта хэрэгүүдые, бэлгэ тэмдэгүүдые, айладхаһан шиидхэбэринүүдыень һаныт.

¹³ Абраһаамай үри һадаһад, Тэрэнэй зарасанар, Тэрэнэй шэлэн һунгаһан Яковай үхибүүд таанар!

¹⁴ Тэрэ бол манай Эзэн Бурхан, бүхы дэлхэйгээр зарга шүүбэри үйлэдэдэг.

¹⁵ Мянгаад үеын туршада үргэлжэлэгшэ Тэрэнэй хэлсээе һанажа ябагты.

¹⁶ Энэ хадаа Абраһаамтай баталһан хэлсээниинь, Исаагта үгэһэн тангаригынь юм.

¹⁷ Тэрэниие Яковта хуули болгон, Израильда хэтэ мүнхын хэлсээн гэжэ баталһан юм.

¹⁸ «Таанадай уг залгамжалан дамжуулха зүйл болгон Ханаһаанай газар дайда үгэхэб» – гэжэ Тэрэ айладхаһан бэлэй.

¹⁹ Тиихэдэ тэдэ тоогоор үсөөн, угаа үсөөн болон хариин газарта ерүүл зон байгаа.

²⁰ Тэдэ үндэһэтэнһээ нүгөө үндэһэтэн руу, элдэб хан түрэһөө нүгөөдэ руу тэнэжэ-түншэжэ ябаа.

²¹ Тэрэ тэдэниие харшалхые хэндэшье зүбшөөгөөгүй, тэдээн тушаа хаашуулдашье зарлиг үгөө:

²² «Тоһолон шэлэһэн зондомни гар бү хүрэгты, лүндэншэдтэмни муу юумэ бү хэгты!»

²³ Эзэндэ дуу дуулагты, бүхы дэлхэй, Эзэндэ дуулагты. Абарһан тухайнь үдэрһөө үдэртэ дуулгагты! Тэрэнэй алдар солые үндэһэтэдэй дунда,

²⁴ Тэрэнэй гайхамшагта хэрэгүүдые бүхы арадуудай дунда тунхаглагты!

²⁵ Юуб гэбэл, Эзэн агууехэ, угаа магтагдаха, бүхы бурхадһаа үлүү Тэрээнһээ аймаар.

²⁶ Юуб гэбэл, бусад арадуудай бурхад – хооһон шүтээнүүд, харин Эзэн огторгой бүтээһэн юм.

²⁷ Нэрэ хүндэ болон һүр жабхалан урдань, хүсэ шадал ба үзэсхэлэн байдал нангин газартань оршодог.

²⁸ Арад зоной обогууд, Эзэниие магтагты, Эзэнэй алдар соло ба хүсэ шадал магтагты!

²⁹ Эзэндэ нэрынь шанараар алдар соло дуудагты! Үргэл асаржа, урдань ерэгты. Гэгээн солынь үзэсхэлэн соо Эзэндэ һүгэдэн мүргэгты! Бүхы дэлхэй, Тэрэнэй урда шэшэрэн байгты!

³⁰ «Эзэн бол Хаан!» гэжэ үндэһэтэдэй дунда хэлэгты. Юртэмсэ нээрээ бата бэхи тогтоогдонхой, ганхахагүй.

³¹ Огторгой баясаг, газар дэлхэй хүхиг!

³² «Эзэн ударидана!» гэжэ арадуудай дунда хэлсэг! Тэнгис далай болон досоонь байгаа бүхы юумэн нэерэг лэ!

³³ Тала газар болон дээрэнь байгааша бүхы юумэн баярлана, ойн модод бултадаа баясан дуулана, Эзэнэй урда! Юуб гэбэл, Тэрэ заларан ерэжэ байна, газар дэлхэйе шүүбэрилхээр заларжа байна.

³⁴ Эзэндэ магтаал үргэгты, юуб гэбэл, Тэрэ һайн, энэрэл хайрань хэтэ мүнхэдөө!

³⁵ Дуудагты: «Абарагша Бурхамнай, маанадые абарыт, бидэниие суглуулыт, хариин арадуудһаа зайлуулыт, Танай нангин нэрые магтаха боломжо бидэндэ үгыт, Танай алдар солоор бахархахамнай болтогой!»

³⁶ Израилиин Эзэн Бурхан хэтын хэтэдэ магтагдахань болтогой! Бүхы зон «Болтогой!» гэжэ хэлээ, Эзэниие магтаа.

³⁷ Давид Эзэнэй хэлсээнэй ханзын урда Асаапые, мүн тэрэнэй аха, дүүнэрые үлөөжэ, ханзын урда хододоо, үдэр бүри алба хэхыень уялгаба.

³⁸ Обээд-Эдоомые, мүн тэрэнэй аха, дүүнэрые, бүхыдэнь жаран найман хүн Едүтүүнэй хүбүүн Обээд-Эдоомые, мүн Хосаае, үүдэнэй харуулшанаар,

³⁹ харин Гибэһооной үндэртэ оршодог Эзэнэй байрын урда Цадоок санаартаниие, тэрэнэй аха, дүүнэрые,

⁴⁰ Тэрэнэй Израильда захиһанай, Эзэнэй хуули соо бэшэгдэһэнэй ёһоор Эзэндэ зорюулагдаһан үглөөнэй болон үдэшын түгэс шатаалта үргэлэй шэрээ дээрэ үргэл бэелүүлхын түлөө;

⁴¹ Тэрэнэй үршөөл хайра хэтын хэтэдэ оршоно гэжэ Эзэниие магтан алдаршуулхын тула Һэмаан Едүтүүн хоёр болон бусад шэлэгдэжэ, тэдээнтэй хамта байгаа.

⁴² Һэмаан Едүтүүн хоёр бүреэнүүд, кимвалнууд болон хүгжэмэй бусадшье зэмсэгүүд дээрэ наадажа байгаа; Едүтүүнэй хүбүүдые үүдэнэй дэргэдэ табиба.

⁴³ Бүхы хүн зон гэр гэртээ харибад; Давидшье өөрынгөө гэрые үреэн адислахаяа ошобо.